ನಾಯಿ, ಬೆಕ್ಕು ಮೊಲಗಳ ಮಾರಾಟಕ್ಕೆ ನಿಷೇಧ:ನ್ಯೂಯಾರ್ಕ್​ ಆಡಳಿತದ ಮಹತ್ವದ ನಿರ್ಧಾರ

ಈ ಕಾನೂನಿನ ಪ್ರಕಾರ ಬ್ರೀಡರ್​ಗಳು ವರ್ಷಕ್ಕೆ ಒಂಬತ್ತಕ್ಕಿಂತ ಹೆಚ್ಚು ಪ್ರಾಣಿಗಳನ್ನು ಮಾರಾಟ ಮಾಡುವಂತಿಲ್ಲ. ಒಂದು ವೇಳೆ ಅಂಗಡಿ ಮಾಲೀಕರು ಹೊಸ ನಿಯಮಗಳನ್ನು ಉಲ್ಲಂಘಿಸಿದಲ್ಲಿ ಅವರ ಮೇಲೆ $1,000 ದಂಡ ವಿಧಿಸಲಾಗುತ್ತದೆ.

ನ್ಯೂಯಾರ್ಕ್​: ನ್ಯೂಯಾರ್ಕ್​ನ ಪೆಟ್​ ಸ್ಟೋರ್​ಗಳಲ್ಲಿ ವಾಣಿಜ್ಯ ದೃಷ್ಟಿಯಿಂದ ನಡೆಯುವ ಸಂತಾನೋತ್ಪತ್ತಿ ಕಾರ್ಯಾಚರಣೆ ಹತೋಟಿಗೆ ತರುವ ನಿಟ್ಟಿನಲ್ಲಿ ಪೆಟ್​ ಸ್ಟೋರ್​ಗಳಲ್ಲಿ ನಾಯಿಗಳು, ಬೆಕ್ಕುಗಳು ಮತ್ತು ಮೊಲಗಳ ಮಾರಾಟಕ್ಕೆ ನಿಷೇಧ ಹೇರುವ ಹೊಸ ಮಸೂದೆಗೆ ಗುರುವಾರ ನ್ಯೂಯಾರ್ಕ್​ ಗವರ್ನರ್ ಕ್ಯಾಥಿ ಹೊಚುಲ್ ಅಂಗೀಕಾರ ಸೂಚಿಸಿದ್ದಾರೆ.

ಪೆಟ್​ ಸ್ಟೋರ್​ಗಳು ಮತ್ತು ಇತರ ಸಾಮೂಹಿಕ ಸಂತಾನೋತ್ಪತ್ತಿ ಕೇಂದ್ರಗಳಲ್ಲಿ ಬ್ರೀಡ್​ ತಯಾರಿಸಲು ಪ್ರಾಣಿಗಳನ್ನು ಸಂಗ್ರಹಿಸಿಟ್ಟುಕೊಳ್ಳುವುದು ಮಾತ್ರವಲ್ಲದೇ ಅವುಗಳ ಮೇಲೆ ಕ್ರೌರ್ಯ ನಡೆಯುತ್ತದೆ. ಅವುಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು 'ದ ಅಮೆರಿಕನ್​ ಸೊಸೈಟಿ ಫಾರ್​ ದ ಪ್ರಿವೆನ್ಷನ್​ ಆಫ್​ ಕ್ರ್ಯುಯೆಲ್ಟಿ ಟು ಅನಿಮಲ್ಸ್​' ಸೇರಿದಂತೆ ಕೆಲವು ಪ್ರಾಣಿದಯಾ ಕಾರ್ಯಕರ್ತರು ವರ್ಷಗಳಿಂದ ಒತ್ತಾಯಿಸುತ್ತಲೇ ಬಂದಿದ್ದರು.

ಮಾರಾಟಕ್ಕೆ ಷರತ್ತುಗಳು ಅನ್ವಯ: 2024 ರಲ್ಲಿ ಈ ಮಸೂದೆ ಕಾನೂನಾಗಿ ಜಾರಿಗೆ ಬರಲಿದ್ದು, ಅಪಘಾತದಲ್ಲಿ ರಕ್ಷಿಸಿದ ಅಥವಾ ರಸ್ತೆ ಬದಿಯಲ್ಲಿ ಬಿಟ್ಟು ಹೋದ ಪ್ರಾಣಿಗಳನ್ನು ರಕ್ಷಿಸಿ ದತ್ತುಪಡೆಯುವ ಪೆಟ್​ ಸ್ಟೋರ್​ಗಳು ಕಾರ್ಯನಿರ್ವಹಿಸಲು ಈ ಕಾನೂನು ಅನುಮತಿಸುತ್ತದೆ. ಈ ಕಾನೂನಿನ ಪ್ರಕಾರ ಬ್ರೀಡರ್​ಗಳು ವರ್ಷಕ್ಕೆ ಒಂಬತ್ತಕ್ಕಿಂತ ಹೆಚ್ಚು ಪ್ರಾಣಿಗಳನ್ನು ಮಾರಾಟ ಮಾಡುವಂತಿಲ್ಲ.

ನಿಯಮ ಉಲ್ಲಂಘಿಸಿದಲ್ಲಿ ಭಾರಿ ದಂಡ: ಅದಷ್ಟೇ ಅಲ್ಲದೆ ಹಿಂದೆ ಸಾಕುಪ್ರಾಣಿಗಳನ್ನು ಮಾರಾಟ ಮಾಡುತ್ತಿದ್ದ ಚಿಲ್ಲರೆ ಅಂಗಡಿಗಳು ಮುಂದೆಯೂ ಕಾರ್ಯನಿರ್ವಹಿಸಬಹುದು. ಸಾಕುಪ್ರಾಣಿಗಳ ಸರಬರಾಜು ಮತ್ತು ಇತರ ಪರಿಕರಗಳನ್ನು ಮಾರಾಟ ಮಾಡಬಹುದು. ದತ್ತು ಪ್ರಾಣಿಗಳಿಗೆ ತಮ್ಮಲ್ಲಿ ಜಾಗ ನೀಡಬಹುದು. ಕಾರ್ಯಕರ್ತರು ರಕ್ಷಿಸಿ ತಂದ ಪ್ರಾಣಿಗಳನ್ನು ತಮ್ಮ ಜಾಗದಲ್ಲಿರಿಸಿಕೊಳ್ಳಲು ಬಾಡಿಗೆ ವಿಧಿಸುವ ಅವಕಾಶ ಒದಗಿಸಲಾಗಿದೆ. ಒಂದು ವೇಳೆ ಅಂಗಡಿ ಮಾಲೀಕರು ಹೊಸ ನಿಯಮಗಳನ್ನು ಉಲ್ಲಂಘಿಸಿದ್ದಲ್ಲಿ ಅವರ ಮೇಲೆ $1,000 ದಂಡ ವಿಧಿಸಲಾಗುತ್ತದೆ.

ಮಸೂದೆ ಸಹ-ಪ್ರಾಯೋಜಿಸಿದ ಸ್ಟೇಟ್​ ಸೆನ್. ಮೈಕೆಲ್ ಜಿಯಾನಾರಿಸ್ ಮಾತನಾಡಿ, ನಾಯಿಮರಿಗಳ ಸಂತಾನೋತ್ಪತ್ತಿ ಕೇಂದ್ರಗಳು ಪ್ರಾಣಿಗಳನ್ನು ಅನೈರ್ಮಲ್ಯ ಸ್ಥಿತಿಯಲ್ಲಿ ಇಟ್ಟುಕೊಳ್ಳುವುದು ಮಾತ್ರವಲ್ಲದೇ ಅವುಗಳನ್ನು ನಿರ್ಲಕ್ಷ್ಯದಿಂದ ನೋಡಿಕೊಳ್ಳಲಾಗುತ್ತದೆ ಎಂಬುದು ತಿಳಿದುಬಂದಿದೆ. ಅವುಗಳನ್ನು ರಕ್ಷಿಸಲು ಈ ಕಾನೂನು ರೂಪಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಈ ಹಿಂದೆಯೂ ಕೆಲವು ದೇಶಗಳಲ್ಲಿ ಸಾಕುಪ್ರಾಣಿಗಳ ಮಾರಾಟ ನಿಷೇಧಿಸಲಾಗಿದ್ದು, ಕ್ಯಾಲಿಫೋರ್ನಿಯಾ ಸಾಕುಪ್ರಾಣಿಗಳ ಮಾರಾಟ ಬ್ಯಾನ್​ ಮಾಡಿದ ಮೊದಲ ದೇಶ. 2019ರಲ್ಲಿ ಬ್ಯಾನ್​ ಮಾಡಿತ್ತು. ನಂತರದಲ್ಲಿ ವಾಷಿಂಗ್ಟನ್, ಮೈನೆ, ಮೇರಿಲ್ಯಾಂಡ್ ಮತ್ತು ಇಲಿನಾಯ್ಸ್ ಕೂಡ ಇದೇ ಕಾನೂನುಗಳನ್ನು ಅನುಸರಿಸಿವೆ.

ಹೊಸ ಮಸೂದೆಗೆ ಕೆಲವರ ಅಸಮಾಧಾನ: ಕೆಲವು ಪೆಟ್ ಶಾಪ್ ಮಾಲೀಕರು, ಮಸೂದೆಗಾಗಿ ರಾಜ್ಯಪಾಲರು ಮತ್ತು ರಾಜ್ಯ ಶಾಸಕರನ್ನು ಟೀಕಿಸಿದ್ದಾರೆ. ಈ ಕಾನೂನು ಮೂಲ ಸಮಸ್ಯೆಗೆ ಪರಿಹಾರವಾಗದೆ ತಮ್ಮ ವ್ಯವಹಾರಗಳಿಗೆ ಹಾನಿ ಮಾಡುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಕಂಬಳ ಕೂಟ ನಿಷೇಧಿಸುವಂತೆ ‘ಪೇಟಾ’ ಮೇಲ್ಮನವಿ: ತೀರ್ಪು ಕಾಯ್ದಿರಿಸಿದ ಸುಪ್ರೀಂಕೋರ್ಟ್ ಸಾಂವಿಧಾನಿಕ ಪೀಠ