ಅಂಕಾರಾ: ಎರಡು ಪ್ರಬಲ ಭೂಕಂಪನಕ್ಕೆ ಟರ್ಕಿ ಮತ್ತು ಸಿರಿಯಾ ನಲುಗಿರುವ ಮಧ್ಯೆಯೇ ಮತ್ತೊಂದು ಭೂಕಂಪ ಉಭಯ ದೇಶಗಳನ್ನು ನಡುಗಿಸಿದೆ. ರಿಕ್ಟರ್ ಮಾಪಕದಲ್ಲಿ 6.4 ತೀವ್ರತೆಯ ಕಂಪನ ದಾಖಲಾಗಿದೆ. ಇದರಿಂದ ಸಾವಿನ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.
ಹೊಸ ಭೂಕಂಪನದಲ್ಲಿ ಮೂವರು ಸಾವನ್ನಪ್ಪಿದ್ದು, 213 ಮಂದಿ ಗಾಯಗೊಂಡಿದ್ದಾರೆ ಎಂದು ಟರ್ಕಿಯ ಆಂತರಿಕ ಸಚಿವ ಸುಲೇಮಾನ್ ಸೊಯ್ಲು ಹೇಳಿದ್ದಾರೆ. ಮತ್ತೆ ಮೂರು ಕಟ್ಟಡಗಳು ಕುಸಿದುಬಿದ್ದಿದ್ದು, ಅದರಲ್ಲಿ ಜನರು ಸಿಲುಕಿರುವ ಬಗ್ಗೆ ರಕ್ಷಣಾ ಕಾರ್ಯಗಳು ನಡೆಯುತ್ತಿವೆ. ಅವಶೇಷಗಳಡಿ ಐವರು ಸಿಲುಕಿಕೊಂಡಿದ್ದಾರೆ ಎಂದು ಟರ್ಕಿ ವಿದೇಶಾಂಗ ಸಚಿವರು ಹೇಳಿದ್ದಾರೆ. ಎರಡು ವಾರಗಳ ಹಿಂದೆ ನಡೆದ ಭೂಕಂಪದಲ್ಲಿ ಸುಮಾರು 50 ಸಾವಿರಕ್ಕೂ ಹೆಚ್ಚು ಜನರು ಬಲಿಯಾಗಿದ್ದಾರೆ.
ಹೊಸ ಭೂಕಂಪದಲ್ಲಿ ಹಲವಾರು ಕಟ್ಟಡಗಳು ಕುಸಿದಿವೆ. ಜನರು ಅದರೊಳಗೆ ಸಿಲುಕಿಕೊಂಡಿದ್ದಾರೆ. ಮೊದಲ ಭೂಕಂಪನದ ಬಳಿಕ ಜನರು ತಮ್ಮ ಮನೆಗಳಿಗೆ ಹಿಂದಿರುಗಿ ಹಾನಿಗೊಳಗಾದ ಕಟ್ಟಡಗಳಿಂದ ವಸ್ತುಗಳನ್ನು ಸ್ಥಳಾಂತರಿಸುವ ಯತ್ನದಲ್ಲಿದ್ದಾಗ ಹೊಸ ಕಂಪನಕ್ಕೆ ಸಿಲುಕಿದ್ದಾರೆ. ವಾಲಿಕೊಂಡಿದ್ದ, ಹಾನಿಗೀಡಾಗಿದ್ದ ಮನೆಗಳು, ಕಟ್ಟಡಗಳು ನಿನ್ನೆಯ ಕಂಪನಕ್ಕೆ ಸಂಪೂರ್ಣ ನೆಲಕಚ್ಚಿವೆ ಎಂದು ಅಲ್ಲಿನ ಅಧಿಕಾರಿಗಳು ತಿಳಿಸಿದ್ದಾರೆ.
ನಿನ್ನೆಯ ಹೊಸ ವಿದ್ಯಮಾನದಲ್ಲಿ ಟರ್ಕಿಯಲ್ಲಿ ಕನಿಷ್ಠ 8 ಜನರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸಿರಿಯಾದಲ್ಲಿ 6 ಜನರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ. ಇದೇ ವೇಳೆ ಹಟೇ ಪ್ರದೇಶದಲ್ಲಿ ರಕ್ಷಣಾ ಕಾರ್ಯಾಚರಣೆಯ ವೇಳೆ 3 ಅಂತಸ್ತಿನ ಕಟ್ಟಡದೊಳಗೆ ಸಿಕ್ಕಿಬಿದ್ದ ಒಬ್ಬಾತನನ್ನು ರಕ್ಷಿಸಲಾಗಿದೆ. ಇನ್ನೂ ಮೂವರು ಅವಶೇಷಗಳಡಿ ಸಿಲುಕಿದ್ದಾರೆ ಎಂದು ಮಾಹಿತಿ ಲಭ್ಯವಾಗಿದೆ. ಶೋಧ ಕಾರ್ಯ ನಡೆಯುತ್ತಿದೆ ಎಂದು ರಕ್ಷಣಾ ಪಡೆಗಳು ತಿಳಿಸಿವೆ.
ಟರ್ಕಿ, ಸಿರಿಯಾಗೆ ಸೋಮವಾರ ಶಾಪ: ಟರ್ಕಿ, ಸಿರಿಯಾ ಪ್ರಬಲ 2 ಭೂಕಂಪಗಳ ಬಳಿಕ ನಿನ್ನೆ ಮತ್ತೊಂದು ಕಂಪನ ಉಂಟಾಗಿದ್ದು, ಸಿರಿಯಾದಲ್ಲಿ ಅದರ ವ್ಯಾಪ್ತಿ ಹೆಚ್ಚಿದೆ. ಉಭಯ ದೇಶಗಳ ಗಡಿಯ ಬಳಿ ಇದು ಅಪ್ಪಳಿಸಿದೆ. ಇದರಿಂದ ಸಿರಿಯಾದಲ್ಲಿ 100 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಕಟ್ಟಡಗಳು ಕುಸಿದು ವ್ಯಾಪಕ ಹಾನಿ ಉಂಟಾಗಿದೆ ಎಂದು ವೈಟ್ ಹೆಲ್ಮೆಟ್ಸ್ ನಾಗರಿಕ ರಕ್ಷಣಾ ಗುಂಪು ಹೇಳಿದೆ.
ಹೊಸ ಕಂಪನದಲ್ಲಿ ಗಾಯಗೊಂಡ 30 ಜನರನ್ನು ಸಿರಿಯನ್ ಅಮೆರಿಕನ್ ಮೆಡಿಕಲ್ ಸೊಸೈಟಿ ಫೌಂಡೇಶನ್ನ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ. ಕಂಪನವು ಈಜಿಪ್ಟ್ ಮತ್ತು ಲೆಬನಾನ್ನಲ್ಲಿಯೂ ಇದರ ಅನುಭವವಾಗಿದೆ ಎಂದು ವರದಿಯಾಗಿದೆ.
ಭೂಮಿಯೊಳಗೆ ಶಿಲಾಪದರಗಳ ಸಡಿಕೆಲಿಕೆಯಿಂದಾಗಿ ಸಣ್ಣ ಪ್ರಮಾಣದ ಕಂಪನಗಳು ಉಂಟಾಗುತ್ತಿದ್ದು, ಟರ್ಕಿಯಲ್ಲಿ ಭೀತಿ ಮುಂದುವರಿದಿದೆ. ಆ್ಯಂಬುಲೆನ್ಸ್‌ಗಳು ಮತ್ತು ರಕ್ಷಣಾ ಸಿಬ್ಬಂದಿಗಳ ರಕ್ಷಣಾ ಕಾರ್ಯಾಚರಣೆ ಸಾಗಿದೆ. ಫೆಬ್ರವರಿ 6 ರಂದು ಸಂಭವಿಸಿದ ಕಂಪನದ ನಂತರ ಹೊಸ ಕಂಪನಕ್ಕೆ ಹಾನಿಗೊಂಡಿದ್ದ ಎಲ್ಲ ಕಟ್ಟಡಗಳು, ಸೇತುವೆಗಳು ಕುಸಿದಿವೆ. ಭೂಮಿ ಬಿರುಕುಗಳು ಆಳವಾಗಿವೆ. ಇದರಿಂದ ತುರ್ತು ಸೇವೆಗಳಿಗೆ ಅಗತ್ಯವಿರುವ ಸ್ಥಳವನ್ನು ತಲುಪಲು ಕಷ್ಟಕರವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದರು.
ಓದಿ: ಭೂಕಂಪನ: ಅವಶೇಷಗಳಡಿ ಸಿಲುಕಿದ್ದ ಬಾಲಕಿ ರಕ್ಷಿಸಿದ ಶ್ವಾನದಳದ ಜೂಲಿ, ರೋಮಿಯೋ
