ಅನ್ನಾಪೊಲಿಸ್ (ಅಮೆರಿಕ) : ಮೇರಿಲ್ಯಾಂಡ್‌ನ ಅನ್ನಾಪೊಲಿಸ್‌ನಲ್ಲಿರುವ ಖಾಸಗಿ ನಿವಾಸದಲ್ಲಿ ನಡೆದ ಸಾಮೂಹಿಕ ಗುಂಡಿನ ದಾಳಿ (Mass shooting) ಯಲ್ಲಿ ಕನಿಷ್ಠ ಮೂವರು ಸಾವನ್ನಪ್ಪಿದ್ದಾರೆ ಮತ್ತು ಮೂವರು ಗಾಯಗೊಂಡಿದ್ದಾರೆ ಎಂದು ಭಾನುವಾರ ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಅನ್ನಾಪೊಲಿಸ್ ಯುನೈಟೆಡ್ ಸ್ಟೇಟ್ಸ್‌ ನ ಕ್ಯಾಪಿಟಲ್ ಹಿಲ್ನಿಂದ 30 ಮೈಲಿ ದೂರದಲ್ಲಿದೆ. ರಾಜ್ಯದ ರಾಜಧಾನಿ ನಗರವಾದ ಪ್ಯಾಡಿಂಗ್‌ಟನ್ ಪ್ಲೇಸ್‌ನ ಥೌಸಂಡ್ ಬ್ಲಾಕ್‌ನಲ್ಲಿ ಗುಂಡಿನ ಚಕಮಕಿ ಹಾಗೂ ಗುಂಡಿನ ದಾಳಿ ನಡೆದಿದೆ. ಶಂಕಿತನನ್ನು ಬಂಧಿಸಲಾಗಿದೆ ಎಂದು ಅನ್ನಾಪೊಲಿಸ್ ಪೊಲೀಸ್ ಮುಖ್ಯಸ್ಥ ಎಡ್ ಜಾಕ್ಸನ್ ಹೇಳಿದ್ದಾರೆ.
ಆರಂಭಿಕ ವರದಿಗಳ ಪ್ರಕಾರ ಕನಿಷ್ಠ ಓರ್ವ ವ್ಯಕ್ತಿ ಸಾವನ್ನಪ್ಪಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದರು. ಆದರೆ ನಂತರದ ವರದಿಗಳ ಪ್ರಕಾರ ಮೂವರು ಸಾವನ್ನಪ್ಪಿದ್ದಾರೆ. ಬದುಕುಳಿದವರ ಪರಿಸ್ಥಿತಿಯ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿದಿಲ್ಲವಾದರೂ, ಓರ್ವ ವ್ಯಕ್ತಿಯನ್ನು ತುರ್ತು ಚಿಕಿತ್ಸಾ ಕೇಂದ್ರಕ್ಕೆ ಸ್ಥಳಾಂತರಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಘಟನೆಯಿಂದ ಸಾರ್ವಜನಿಕರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ ಎಂದು ಅನ್ನಾಪೊಲಿಸ್ ಪೊಲೀಸರು ಘಟನಾ ಸ್ಥಳದಲ್ಲಿ ಮತ್ತು ಆನ್ಲೈನ್ ಮೂಲಕ ತಿಳಿಸಿದ್ದಾರೆ.
ವಾಟರ್‌ಫ್ರಂಟ್‌ ಪ್ರದೇಶದ ಹತ್ತಿರ ನಗರದ ಮಧ್ಯಭಾಗದ ದಕ್ಷಿಣದಲ್ಲಿ ಗುಂಡಿನ ದಾಳಿ ನಡೆದಿದೆ. ಈ ಪ್ರದೇಶದಲ್ಲಿ ಹಲವಾರು ಪೊಲೀಸ್ ಕಾರುಗಳು ಕಂಡುಬಂದವು. "ಈ ಘಟನೆಯು ಆಕಸ್ಮಾತ್ ಆಗಿ ನಡೆದ ಘಟನೆಯಲ್ಲ. ಆರೋಪಿಯೊಬ್ಬನನ್ನು ಈಗಾಗಲೇ ಬಂಧಿಸಲಾಗಿದೆ ಮತ್ತು ಆತನಿಂದ ಶೂಟಿಂಗ್ಗೆ ಬಳಸಲಾದ ಶಸ್ತ್ರಾಸ್ತ್ರವನ್ನು ವಶಪಡಿಸಿಕೊಳ್ಳಲಾಗಿದೆ" ಎಂದು ಜಾಕ್ಸನ್ ಸುದ್ದಿಗಾರರಿಗೆ ತಿಳಿಸಿದರು.
ರಾಜ್ಯದ ಸೆನೆಟರ್ ಆಗಿರುವ ಸಾರಾ ಎಲ್ಫ್ರೆತ್ ಘಟನೆಯ ಬಗ್ಗೆ ಫೇಸ್ಬುಕ್ನಲ್ಲಿ ಬರೆದಿದ್ದಾರೆ. ಈ ಘಟನೆ ಮಾತಿಗೆ ನಿಲುಕದ ದುರಂತವಾಗಿದೆ. ಈ ಸಂಜೆ ನಮ್ಮ ಸಮುದಾಯವು ಊಹೆಗೂ ಮೀರಿದ ದುರಂತ ಅನುಭವಿಸಿದೆ. ಹಲವಾರು ಸಾವುನೋವುಗಳು ಮತ್ತು ಗಾಯಗಳು ವರದಿಯಾಗಿವೆ. ಶಂಕಿತನೊಬ್ಬ ಬಂಧನದಲ್ಲಿದ್ದು, ಸಾರ್ವಜನಿಕರಿಗೆ ಯಾವುದೇ ದೊಡ್ಡ ಬೆದರಿಕೆ ಇಲ್ಲ. ದಯವಿಟ್ಟು ಅನ್ನಾಪೊಲಿಸ್ ಪೊಲೀಸ್ ಇಲಾಖೆ ಮತ್ತು ಅನ್ನಾಪೊಲಿಸ್ ಅಗ್ನಿಶಾಮಕ ಇಲಾಖೆಯ ಸಿಬ್ಬಂದಿಯ ಪ್ರಯತ್ನಗಳನ್ನು ಸ್ಮರಿಸಿ ಎಂದು ಅವರು ಬರೆದಿದ್ದಾರೆ.
ಶೂಟಿಂಗ್ ನಡೆದ ಸ್ಥಳದ ಹತ್ತಿರದಲ್ಲೇ ಗ್ರಾಜ್ಯುಯೇಷನ್ ಡೇ ಪಾರ್ಟಿ ನಡೆಯುತ್ತಿತ್ತು. ಶೂಟಿಂಗ್ಗೂ ಈ ಸಮಾರಂಭಕ್ಕೂ ಏನಾದರೂ ಸಂಬಂಧವಿದೆಯಾ ಎಂಬುದು ತಿಳಿದಿಲ್ಲ. ಘಟನೆಯ ಬಗ್ಗೆ ಹೆಚ್ಚಿನ ಮಾಹಿತಿಗಳು ಇನ್ನಷ್ಟೇ ಬರಬೇಕಿವೆ.
ಈ ವರ್ಷ ಇಲ್ಲಿಯವರೆಗೆ ಅಮೆರಿಕದಾದ್ಯಂತ 200 ಕ್ಕೂ ಹೆಚ್ಚು ಸಾಮೂಹಿಕ ಗುಂಡಿನ ದಾಳಿಗಳು ನಡೆದಿವೆ. ಗನ್ ವಯಲೆನ್ಸ್ ಆರ್ಕೈವ್ ಪ್ರಕಾರ ನಾಲ್ಕು ಅಥವಾ ಅದಕ್ಕಿಂತ ಹೆಚ್ಚು ಜನರು ಗಾಯಗೊಂಡ ಅಥವಾ ಕೊಲ್ಲಲ್ಪಟ್ಟ ಘಟನೆಯನ್ನು ಇದು ಸಾಮೂಹಿಕ ಗುಂಡಿನ ದಾಳಿ ಎಂದು ವ್ಯಾಖ್ಯಾನಿಸಲಾಗುತ್ತದೆ. ಈ ಅಂಕಿ - ಅಂಶಗಳು ಮನೆಗಳಲ್ಲಿ ಮತ್ತು ಸಾರ್ವಜನಿಕ ಸ್ಥಳಗಳಲ್ಲಿ ನಡೆಯುವ ಗುಂಡಿನ ದಾಳಿಗಳನ್ನು ಒಳಗೊಂಡಿವೆ. ಕಳೆದ ವಾರದಲ್ಲಿ ಟೆಕ್ಸಾಸ್‌ನಲ್ಲಿ ಇಬ್ಬರು, ಹೂಸ್ಟನ್‌ನ ಉತ್ತರದ ಕ್ಲೀವ್‌ಲ್ಯಾಂಡ್‌ನಲ್ಲಿರುವ ಮನೆಯಲ್ಲಿ ಐವರು ಕೊಲ್ಲಲ್ಪಟ್ಟರು ಮತ್ತು ಡಲ್ಲಾಸ್ ಬಳಿಯ ಅಲೆನ್‌ನಲ್ಲಿರುವ ಶಾಪಿಂಗ್ ಮಾಲ್‌ನಲ್ಲಿ ಎಂಟು ಮಂದಿ ಸಾವನ್ನಪ್ಪಿದ್ದಾರೆ.
ಇದನ್ನೂ ಓದಿ : Life Insurance: ಜೀವವಿಮಾ ಮಾರುಕಟ್ಟೆಗೆ ಮತ್ತೊಂದು ಕಂಪನಿ ಎಂಟ್ರಿ: Go Digitಗೆ ಐಆರ್ಡಿಎಐ ಅನುಮೋದನೆ
