ನ್ಯೂಯಾರ್ಕ್(ಅಮೆರಿಕ) : ಸಿವಿಲ್ ವಂಚನೆ ಆರೋಪ ಪ್ರಕರಣದಲ್ಲಿ ವಿಚಾರಣೆ ಎದುರಿಸುತ್ತಿರುವ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ವಕೀಲ ಮೈಕೆಲ್ ಕೊಹೆನ್ ಸಾಕ್ಷ್ಯ ನುಡಿದಿದ್ದಾರೆ. ಡೊನಾಲ್ಡ್ ಟ್ರಂಪ್ ವಿರುದ್ಧ ತಮ್ಮ ಸಂಸ್ಥೆಯ ಹಣಕಾಸು ವ್ಯವಹಾರದ ಮೌಲ್ಯವನ್ನು ಹೆಚ್ಚುವರಿಯಾಗಿ ತೋರಿಸುವ ಮೂಲಕ ನೂರಾರು ಮಿಲಿಯನ್ ಡಾಲರ್ ಸಾಲ ಪಡೆದು ವಂಚನೆ ಮಾಡಿರುವ ಆರೋಪ ಇದೆ. ಈ ಸಂಬಂಧ ನ್ಯೂಯಾರ್ಕ್ ನ್ಯಾಯಾಲಯವು ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ವಿಚಾರಣೆ ನಡೆಸುತ್ತಿದೆ.
ನ್ಯಾಯಾಲಯದಲ್ಲಿ ಮೈಕೆಲ್ ಕೊಹೆನ್ ಅವರು, ಡೊನಾಲ್ಡ್ ಟ್ರಂಪ್ ಅವರ ಆಸ್ತಿಯನ್ನು ಹೆಚ್ಚುವರಿಯಾಗಿ ತೋರಿಸುವ ನಿಟ್ಟಿನಲ್ಲಿ ಕೆಲಸ ಮಾಡಿದ್ದೇನೆ. ಟ್ರಂಪ್ ಅವರು ನನ್ನನ್ನು ಸರಣಿ ವಂಚಕ ಎಂದು ಬಿಂಬಿಸಲು ಯತ್ನಿಸಿದರು ಎಂದು ಹೇಳಿದ್ದಾರೆ. ಇನ್ನು, ಟ್ರಂಪ್ ಬ್ಯಾಂಕ್ಗೆ ತೆರಿಗೆ ವಂಚನೆ ಮಾಡಿರುವುದನ್ನು ಕೊಹೆನ್ ಬಹಿರಂಗಪಡಿಸಿದ್ದಾರೆ. ಮೈಕೆಲ್ ಕೊಹೆನ್ ಅವರು ದಶಕಗಳ ಕಾಲ ಟ್ರಂಪ್ ಬಳಿ ವಿಶ್ವಾಸಯುತ ವಕೀಲರಾಗಿ ಕಾರ್ಯನಿರ್ವಹಿಸಿದ್ದರು.
ವಂಚನೆ ಪ್ರಕರಣದಲ್ಲಿ ಕೊಹೆನ್ ಅವರೂ ಪ್ರಮುಖ ಆರೋಪಿಯಾಗಿದ್ದು, ಟ್ರಂಪ್ ಜೊತೆ ಸೇರಿ ಕೊಹೆನ್ ಕೂಡ ಬ್ಯಾಂಕ್ ಸೇರಿದಂತೆ ವಿಮೆದಾರರಿಗೆ ಹಾಗೂ ಇತರರಿಗೆ ಸಂಪತ್ತನ್ನು ಹೆಚ್ಚು ಇರುವುದಾಗಿ ತೋರಿಸಿ ವಂಚಿಸಿದ್ದಾರೆ ಎಂದು ನ್ಯೂಯಾರ್ಕ್ ಅಟಾರ್ನಿ ಜನರಲ್ ಲೆಟಿಟಿಯಾ ಜೇಮ್ಸ್ ಹೇಳಿದ್ದಾರೆ. ಈ ವೇಳೆ ಕೊಹೆನ್, ಟ್ರಂಪ್ ಅವರು ತಾವು ಚುನಾಯಿತರಾಗಿ ಆಯ್ಕೆಯಾದ ಆಧಾರದ ಮೇಲೆ ವ್ಯವಹಾರವನ್ನು ಹೆಚ್ಚಳ ಇರುವಂತೆ ತೋರಿಸಲು ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಟ್ರಂಪ್ ಅವರ ಹಣಕಾಸು ಸಲಹೆಗಾರ ಅಲೆನ್ ಮಿಸೆಲ್ ಬರ್ಗ್ ಅವರು ಆಸ್ತಿಯನ್ನು ಹೆಚ್ಚಳ ಮಾಡಲು ವಿವಿಧ ತಂತ್ರಗಳನ್ನು ಮಾಡಿದ್ದಾರೆ ಎಂದು ಆರೋಪಿಸಿದರು.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಟ್ರಂಪ್, ಕೊಹೆನ್ ಅವರ ಆರೋಪಗಳನ್ನು ತಳ್ಳಿ ಹಾಕಿದರು. ಕೊಹೆನ್ ಸುಳ್ಳು ಹೇಳುತ್ತಿದ್ದಾರೆ. ಆತ ಮಹಾನ್ ಸುಳ್ಳುಗಾರ. ಅಲ್ಲದೇ ಕೊಹೆನ್ನ ಸಾಕ್ಷ್ಯಗಳು ಸರಿಯಿಲ್ಲ ಎಂದು ಹೇಳಿದರು. ಆದರೆ ಪ್ರತಿಯಾಗಿ ಟ್ರಂಪ್, ಆಸ್ತಿಯನ್ನು ಹೆಚ್ಚಳ ತೋರಿಸುವಂತೆ ಹಣಕಾಸು ಸಲಹೆಗಾರರು ಮತ್ತು ನನಗೆ ಸೂಚಿಸಿದ್ದರು ಎಂದು ಕೊಹೆನ್ ನ್ಯಾಯಾಲಯದಲ್ಲಿ ತಿಳಿಸಿದರು.
ಇದೀಗ ಕೊಹೆನ್ ಅವರು ಪ್ರಕರಣ ಸಂಬಂಧ ತಪ್ಪೊಪ್ಪಿಗೆ ನೀಡಿದ್ದಾರೆ. ಸಾಲವನ್ನು ಪಡೆಯಲು ತೆರಿಗೆ ವಂಚನೆ , ಸುಳ್ಳು ಮಾಹಿತಿ ನೀಡಿರುವುದಾಗಿ ನ್ಯಾಯಾಲಯದ ಮುಂದೆ ಒಪ್ಪಿಕೊಂಡಿದ್ದಾರೆ. ಈ ವೇಳೆ ಟ್ರಂಪ್ ಪರ ವಕೀಲ ಕ್ರಿಸ್ಟೋಫರ್ ಕಿಸೆ, ಕೊಹೆನ್ ಸರಣಿ ಸುಳ್ಳುಗಾರ. ಈತ ನ್ಯಾಯಾಂಗದ ಎದುರು ಸರಣಿ ಸುಳ್ಳುಗಳನ್ನು ಹೇಳುತ್ತಿದ್ದಾನೆ ಎಂದು ಹೇಳಿದರು.
ವಾದ ಪ್ರತಿವಾದಗಳನ್ನು ಆಲಿಸಿದ ಬಳಿಕ ನ್ಯಾಯಾಧೀಶ ಅರ್ಥೂರ್ ಎಂಗೋರೊನ್, ವಿಚಾರಣೆಯು ವಂಚನೆ , ವಿಮೆ ವಂಚನೆ ಹಾಗೂ ಸುಳ್ಳು ದಾಖಲಾತಿ ನೀಡಿರುವುದನ್ನು ಹೊಂದಿದೆ. ಟ್ರಂಪ್ ಮತ್ತು ಅವರ ಸಂಸ್ಥೆ ಈಗಾಗಲೇ ವಂಚನೆ ಮಾಡಿದೆ ಎಂದು ಹೇಳಿದರು.ಇದಕ್ಕೆ ಪ್ರತಿಯಾಗಿ ಟ್ರಂಪ್, ನನ್ನ ಆಸ್ತಿಗಳನ್ನು ವಾಸ್ತವವಾಗಿ ಕಡಿಮೆ ಮೌಲ್ಯೀಕರಣ ಮಾಡಲಾಗಿದೆ. ಇದು ನನ್ನ ವಿರುದ್ಧ ಪಿತೂರಿಯ ಭಾಗ ಎಂದು ನ್ಯಾಯಾಲಯಕ್ಕೆ ತಿಳಿಸಿದರು.
