ವಿಶ್ವಸಂಸ್ಥೆ: ಜಾಗತಿಕವಾಗಿ ಉಷ್ಣಾಂಶ ಹೆಚ್ಚಳವನ್ನು (ಗ್ಲೋಬಲ್ ವಾರ್ಮಿಂಗ್) ನಂಬಲಾಗದಷ್ಟು, ಅಂದರೆ 1.5 ಡಿಗ್ರಿ ಸೆಲ್ಸಿಯಸ್‌ಗೆ ಸೀಮಿತಗೊಳಿಸಿದರೂ ಸಹ ಸಮುದ್ರ ಮಟ್ಟವು ಗಮನಾರ್ಹವಾಗಿ ಹೆಚ್ಚಾಗಲಿದೆ ಎಂದು ಯುಎನ್ ಸೆಕ್ರೆಟರಿ ಜನರಲ್ ಆಂಟೋನಿಯೊ ಗುಟೆರೆಸ್ ಮಂಗಳವಾರ ಎಚ್ಚರಿಸಿದ್ದಾರೆ. ಭೂಮಿಯು ಬೆಚ್ಚಗಾಗುವ ಸಾಧ್ಯತೆ ಹೆಚ್ಚಾಗಿದ್ದು, ಇದರ ಪರಿಣಾಮಗಳನ್ನು ಅನುಭವಿಸುವ ದೇಶಗಳಿಗೆ ಇದು ಮರಣ ದಂಡನೆಯ ಶಿಕ್ಷೆಗೆ ಸಮನಾಗಿರುತ್ತದೆ ಎಂದು ಅವರು ಹೇಳಿದರು.
ತಾಪಮಾನದ ಪ್ರತಿ ಡಿಗ್ರಿ ಹೆಚ್ಚಳವು ದೊಡ್ಡ ಮಟ್ಟದ ಪರಿಣಾಮ ಬೀರುತ್ತದೆ. ಒಂದು ವೇಳೆ ಉಷ್ಣಾಂಶವು 2 ಡಿಗ್ರಿ ಸೆಲ್ಸಿಯಸ್ ಹೆಚ್ಚಾದರೆ ಸಮುದ್ರ ಮಟ್ಟ ಏರಿಕೆಯಲ್ಲಿ ಎರಡು ಪಟ್ಟು ಹೆಚ್ಚಳವಾಗಬಹುದು. ಜೊತೆಗೆ ಉಷ್ಣಾಂಶವು ಇದಕ್ಕೂ ಹೆಚ್ಚಾದಲ್ಲಿ ಸಮುದ್ರ ಮಟ್ಟ ಏರಿಕೆಯು ಎಷ್ಟೋ ಪಟ್ಟು ಹೆಚ್ಚಾಗಬಹುದು ಎಂದು ಅವರು ತಿಳಿಸಿದರು. 75 ದೇಶಗಳಲ್ಲಿ ದೂರಸಂಪರ್ಕ ವ್ಯವಸ್ಥೆಯಿಂದ ವೀಕ್ಷಿಸಲ್ಪಡುತ್ತಿರುವ, ಸಮುದ್ರ ಮಟ್ಟ ಏರಿಕೆ ಕುರಿತ ಯುಎನ್ ಭದ್ರತಾ ಮಂಡಳಿಯ ಸಭೆಯ ಉದ್ಘಾಟನಾ ಸಮಾರಂಭದಲ್ಲಿ ಅವರು ಮಾತನಾಡಿದರು. ಹವಾಮಾನ ಬದಲಾವಣೆಯ ವಿರುದ್ಧ ಹೋರಾಡುವ ಕ್ರಮಗಳಿಗೆ ಬೆಂಬಲವನ್ನು ನಿರ್ಮಿಸುವಲ್ಲಿ ಭದ್ರತಾ ಮಂಡಳಿಯು ನಿರ್ಣಾಯಕ ಪಾತ್ರವನ್ನು ಹೊಂದಿದೆ ಎಂದು ಹೇಳಿದರು.
ಯಾವುದೇ ಪ್ರತಿಕೂಲ ಸನ್ನಿವೇಶದಲ್ಲಿ ಬಾಂಗ್ಲಾದೇಶ, ಚೀನಾ, ಭಾರತ ಮತ್ತು ನೆದರ್‌ಲ್ಯಾಂಡ್ಸ್‌ನಂಥ ದೇಶಗಳಿಗೆ ಅಪಾಯ ಎದುರಾಗಲಿದೆ. ಕೈರೋ, ಲಾಗೋಸ್, ಮಾಪುಟೊ, ಬ್ಯಾಂಕಾಕ್, ಢಾಕಾ, ಜಕಾರ್ತ, ಮುಂಬೈ, ಶಾಂಘೈ, ಕೋಪನ್‌ಹೇಗನ್, ಲಂಡನ್, ಲಾಸ್ ಏಂಜಲೀಸ್, ನ್ಯೂಯಾರ್ಕ್, ಬ್ಯೂನಸ್ ಐರಿಸ್ ಮತ್ತು ಸ್ಯಾಂಟಿಯಾಗೊ ಸೇರಿದಂತೆ ಪ್ರತಿಯೊಂದು ಖಂಡದ ದೊಡ್ಡ ನಗರಗಳು ಗಂಭೀರ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.
ಜಾಗತಿಕ ಹವಾಮಾನ ಏರಿಕೆ ಮಟ್ಟವನ್ನು ಮುಂದಿನ 2000 ವರ್ಷಗಳವರೆಗೆ 1.5 ಡಿಗ್ರಿ ಸೆಲ್ಸಿಯಸ್ ಮಟ್ಟಕ್ಕೆ ಸೀಮಿತಗೊಳಿಸಲಾಗಿದೆ ಎಂದಿಟ್ಟುಕೊಂಡಲ್ಲಿ ಜಾಗತಿಕ ಸರಾಸರಿ ಸಮುದ್ರ ಮಟ್ಟ ಏರಿಕೆಗಳು ಸುಮಾರು 2 ಮೀಟರ್‌ಗಳಿಂದ 3 ಮೀಟರ್‌ಗಳಷ್ಟು (ಸುಮಾರು 6.5 ರಿಂದ 9.8 ಅಡಿ) ಏರಿಕೆಯಾಗಲಿದೆ ಎಂದು ಗುಟೆರೆಸ್ ಉಲ್ಲೇಖಿಸಿರುವ ವಿಶ್ವ ಹವಾಮಾನ ಸಂಸ್ಥೆ ಅಂಕಿ - ಅಂಶಗಳನ್ನು ಮಂಗಳವಾರ ಬಿಡುಗಡೆ ಮಾಡಿದೆ. ಹಾಗೆಯೇ 2 ಡಿಗ್ರಿ ಸೆಲ್ಸಿಯಸ್ ಹೆಚ್ಚಳದೊಂದಿಗೆ, ಸಮುದ್ರಗಳು 6 ಮೀಟರ್ (19.7 ಅಡಿ) ವರೆಗೆ ಏರಬಹುದು ಮತ್ತು 5 ಡಿಗ್ರಿ ಸೆಲ್ಸಿಯಸ್ ಹೆಚ್ಚಳದೊಂದಿಗೆ ಸಮುದ್ರಗಳು 22 ಮೀಟರ್ (72 ಅಡಿ) ವರೆಗೆ ಏರಬಹುದು ಎಂದು ವಿಶ್ವ ಹವಾಮಾನ ಸಂಸ್ಥೆ ತಿಳಿಸಿದೆ.
ನಮ್ಮ ಪ್ರಪಂಚವು ವಾಸಯೋಗ್ಯ ಭವಿಷ್ಯಕ್ಕೆ ಅಗತ್ಯವಿರುವ 1.5 ಡಿಗ್ರಿ ತಾಪಮಾನ ಮಿತಿಯನ್ನು ದಾಟುತ್ತಿದೆ ಮತ್ತು ಪ್ರಸ್ತುತ ನೀತಿಗಳ ಕಾರಣದಿಂದ ಅದು 2.8 ಡಿಗ್ರಿಗಳತ್ತ ಜಿಗಿಯುತ್ತಿದೆ. ಇದು ದುರ್ಬಲ ದೇಶಗಳಿಗೆ ಮರಣದಂಡನೆಯಾಗಲಿದೆ. ಕಡಿಮೆ ಎತ್ತರದಲ್ಲಿ ಕರಾವಳಿ ವಲಯಗಳಲ್ಲಿ ವಾಸಿಸುವ ಸುಮಾರು 900 ಮಿಲಿಯನ್ ಜನರಿಗೆ ಅಥವಾ ಪ್ರಪಂಚದಾದ್ಯಂತ ಪ್ರತಿ 10 ಜನರಲ್ಲಿ ಒಬ್ಬರಿಗೆ ಅಪಾಯವು ಅತಿ ಹೆಚ್ಚಾಗಿದೆ ಎಂದು ಗುಟೆರೆಸ್ ಹೇಳಿದರು.
ತಗ್ಗು ಪ್ರದೇಶದ ಸಮುದಾಯಗಳು ಮತ್ತು ಇಡೀ ದೇಶಗಳೇ ಕಣ್ಮರೆಯಾಗಬಹುದು. ಇಡೀ ಜನಸಂಖ್ಯೆಯ ಸಾಮೂಹಿಕ ವಲಸೆಗೆ ಕಾರಣವಾಗಬಹುದು ಮತ್ತು ಶುದ್ಧ ನೀರು, ಭೂಮಿ ಮತ್ತು ಇತರ ಸಂಪನ್ಮೂಲಗಳಿಗಾಗಿ ಹಾಹಾಕಾರ ಉಂಟಾಗಬಹುದು ಎಂದು ಗ್ಲೋಬಲ್ ವಾರ್ಮಿಂಗ್ ಪರಿಣಾಮಗಳ ಬಗ್ಗೆ ಗುಟೆರಸ್ ಎಚ್ಚರಿಕೆ ನೀಡಿದ್ದಾರೆ.
ಇದನ್ನೂ ಓದಿ: ವಿಜಯಪುರ ಜಿಲ್ಲೆ 10ವರ್ಷಗಳಲ್ಲಿ ಕನಿಷ್ಠ ತಾಪಮಾನ ದಾಖಲು
