ಕೀವ್ (ಉಕ್ರೇನ್): ರಷ್ಯಾ ಮತ್ತು ಉಕ್ರೇನ್ ಮಧ್ಯೆ 3 ತಿಂಗಳಿಂದ ನಡೆಯುತ್ತಿರುವ ಯುದ್ಧ ಹಲವು ಪ್ರಾಣಗಳ ಬಲಿಗೆ ಕಾರಣವಾಗಿದೆ. ಅಲ್ಲದೇ ಇದೇ ಮೊದಲ ಬಾರಿಗೆ ಯುದ್ಧದಲ್ಲಿ ಸೆರೆ ಸಿಕ್ಕ ರಷ್ಯಾ ಯೋಧನಿಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿದೆ. ಇದು ಯುದ್ಧದ ಮೊದಲ ಕ್ರಿಮಿನಲ್ ಪ್ರಕರಣವಾಗಿದೆ. ರಷ್ಯಾದ ಆಕ್ರಮಣದ ನಂತರದ ಮೊದಲ ಯುದ್ಧಾಪರಾಧಗಳ ವಿಚಾರಣೆಯಲ್ಲಿ ಉಕ್ರೇನ್ ನಾಗರಿಕರನ್ನು ಕೊಂದ ಆರೋಪದ ಮೇಲೆ 21 ವರ್ಷದ ರಷ್ಯಾದ ಸೈನಿಕನಿಗೆ ಉಕ್ರೇನ್ ನ್ಯಾಯಾಲಯ ಸೋಮವಾರ ಜೀವಾವಧಿ ಶಿಕ್ಷೆ ವಿಧಿಸಿದೆ.
ಸಾರ್ಜೆಂಟ್ ವಾಡಿಮ್ ಶಿಶಿಮರಿನ್ ಶಿಕ್ಷೆಗೊಳಗಾದ ರಷ್ಯಾ ಯೋಧ. ಯುದ್ಧದ ಆರಂಭಿಕ ದಿನಗಳಲ್ಲಿ ಈಶಾನ್ಯ ಸುಮಿ ಪ್ರದೇಶದ ಹಳ್ಳಿಯೊಂದರಲ್ಲಿ ಉಕ್ರೇನಿಯನ್ ನಾಗರಿಕನ ತಲೆಗೆ ಗುಂಡು ಹಾರಿಸಿದ ಆರೋಪ ಹೊತ್ತಿದ್ದರು. ಉಕ್ರೇನ್ ಕೋರ್ಟ್ನಲ್ಲಿ ನಡೆದ ವಿಚಾರಣೆಯಲ್ಲಿ ರಷ್ಯಾ ಯೋಧ ತನ್ನ ತಪ್ಪೊಪ್ಪಿಕೊಂಡಿದ್ದಾನೆ. ತಾನು ಹಾಗೆ ಮಾಡಲು ಮೇಲಧಿಕಾರಿ ಆದೇಶಿಸಿದ ನಂತರ ನಾಗರಿಕನನ್ನು ಕೊಲೆ ಮಾಡಿರುವುದಾಗಿ ಹೇಳಿದ್ದಾನೆ. ಹತನಾದ ಉಕ್ರೇನಿಯನ್ ವ್ಯಕ್ತಿ, ರಷ್ಯಾ ಪಡೆಗಳು ಇರುವ ಜಾಗದ ಬಗ್ಗೆ ಉಕ್ರೇನಿಯನ್ ಪಡೆಗಳಿಗೆ ಮಾಹಿತಿ ನೀಡುತ್ತಿದ್ದ.
ಈ ವೇಳೆ ಆತನನ್ನು ಗುಂಡಿಕ್ಕಲು ಅಧಿಕಾರಿಯೊಬ್ಬರು ಹೇಳಿದ್ದಕ್ಕೆ ಗುಂಡಿಕ್ಕಿದೆ. ಈ ಕೃತ್ಯಕ್ಕಾಗಿ ನನ್ನನ್ನು ಕ್ಷಮಿಸಬೇಕು ಎಂದು ರಷ್ಯಾ ಯೋಧ ನ್ಯಾಯಾಲಯಕ್ಕೆ ಕೇಳಿಕೊಂಡಿದ್ದಾನೆ. ಉಕ್ರೇನಿಯನ್ ಪ್ರಾಸಿಕ್ಯೂಟರ್‌ಗಳು ಸಾವಿರಾರು ಸಂಭಾವ್ಯ ಯುದ್ಧ ಅಪರಾಧಿಗಳನ್ನು ತನಿಖೆ ಮಾಡುತ್ತಿದ್ದಾರೆ.
ಯುದ್ಧ ಸಮಾಧಿಯಾದ ಉಕ್ರೇನ್: ಇನ್ನು ರಷ್ಯಾದ ದಾಳಿಯಿಂದ ಯುದ್ಧ ಸಮಾಧಿಯಂತಾಗಿರುವ ಉಕ್ರೇನ್, ರಾಜಧಾನಿ ಕೀವ್ ಸುತ್ತಮುತ್ತಲಿನ ನಗರಗಳಲ್ಲಿ ಸಾಮೂಹಿಕ ಸಮಾಧಿಗಳನ್ನು ಪತ್ತೆಯಾಗಿವೆ. ಹಲವು ಪಟ್ಟಣಗಳ ಬೀದಿಗಳಲ್ಲಿ ಶವಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ. ರಷ್ಯಾದ ಪಡೆಗಳು ನಾಗರಿಕರು ಆಶ್ರಯ ಪಡೆದಿದ್ದ ಕಟ್ಟಡಗಳ ಮೇಲೆ ಬಾಂಬ್ ದಾಳಿ ನಡೆಸಿದ್ದಾರೆ. ಹೆರಿಗೆ ಆಸ್ಪತ್ರೆಯನ್ನು ಹೊಡೆದುರುಳಿಸಿದ್ದಾರೆ.
ಯುದ್ಧದ ಪರಿಣಾಮಗಳು ಭೀಕರವಾಗಿ ಪರಿಣಮಿಸಿದ್ದು ಆಹಾರದ ಬೆಲೆಗಳು, ಜನರ ಪಲಾಯನ ದಾಖಲೆ ಮಟ್ಟ ತಲುಪಿದೆ. ವಿಶ್ವಸಂಸ್ಥೆಯು ಗುರುತಿಸಿದಂತೆ ಈ ಸಂಘರ್ಷದಿಂದ ವಿಶ್ವಾದ್ಯಂತ ಸ್ಥಳಾಂತರಗೊಂಡ ಜನರ ಸಂಖ್ಯೆಯು 100 ಮಿಲಿಯನ್‌ಗಿಂತಲೂ ಹೆಚ್ಚಿದೆ ಎಂದು ಅಂದಾಜಿಸಿದೆ. ಯುದ್ಧದ ಮಧ್ಯೆಯೇ ಉಕ್ರೇನಿಯನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಸ್ವಿಟ್ಜರ್ಲೆಂಡ್ನ ದಾವೋಸ್‌ನಲ್ಲಿ ನಡೆದ ವಿಶ್ವ ಆರ್ಥಿಕ ವೇದಿಕೆಯಲ್ಲಿ ರಷ್ಯಾದ ವಿರುದ್ಧ ಗರಿಷ್ಠ ನಿರ್ಬಂಧಗಳನ್ನು ಹೇರಲು ಕರೆ ನೀಡಿದ್ದಾರೆ.
ಓದಿ: ರಷ್ಯಾದ ಮೇಲೆ ಗರಿಷ್ಠ ನಿರ್ಬಂಧ ಹೇರಿ.. ದಾವೋಸ್ ಸಭೆಯಲ್ಲಿ ವಿಶ್ವ ರಾಷ್ಟ್ರಗಳಿಗೆ ಉಕ್ರೇನ್ ಅಧ್ಯಕ್ಷರ ಮನವಿ
