ತೈಪೆ (ತೈವಾನ್) : ವಿಸ್ತರಣಾ ಮಹತ್ವಾಕಾಂಕ್ಷಿ ಚೀನಾ, ದ್ವೀಪರಾಷ್ಟ್ರ ತೈವಾನ್ ಮೇಲೆ ಕಣ್ಣು ಹಾಕಿದ್ದು, ತೈವಾನ್ಗೆ ಬೆಂಗಾವಲಾಗಿ ಅಮೆರಿಕ ಇರುವುದು ಗೊತ್ತೇ ಇದೆ. ಪುಟ್ಟದ್ವೀಪದ ವಿಚಾರದಲ್ಲಿ ವಿಶ್ವದ ಎರಡು ದೈತ್ಯ ರಾಷ್ಟ್ರಗಳು ಕಿತ್ತಾಟಕ್ಕಿಳಿದಿದ್ದು, ಈಗ ಅದು ಮತ್ತೊಂದು ಮಜಲಿಗೆ ಹೋಗುವ ಸಾಧ್ಯತೆ ಇದೆ. ಕಾರಣ, ಅಮೆರಿಕ ಸಂಸತ್ತು ತೈವಾನ್ಗೆ ಮಿಲಿಟರಿ ಆರ್ಥಿಕ ನೆರವು ನೀಡಲು ಘೋಷಣೆ ಮಾಡಿರುವುದು.
ತೈಪೆಗೆ ಅಮೆರಿಕ 345 ಮಿಲಿಯನ್ ಡಾಲರ್ (2838 ಕೋಟಿ ರೂಪಾಯಿ) ಮಿಲಿಟರಿ ನೆರವಿನ ಪ್ಯಾಕೇಜ್ ಘೋಷಿಸಿದೆ. ಇದು ಚೀನಾದ ಕಣ್ಣು ಕೆಂಪಾಗಿಸಿದೆ. ಇದಕ್ಕೆ ಉರಿದು ಬಿದ್ದಿರುವ ಡ್ರ್ಯಾಗನ್ ರಾಷ್ಟ್ರ, ತೈವಾನ್ ಅನ್ನು ಅಮೆರಿಕ ಯುದ್ಧ ಸಾಮಗ್ರಿ ಡಿಪೋವಾಗಿ ಪರಿವರ್ತಿಸಿದೆ. ಏನೇ ಆದರೂ, ಅದರ ಆಟ ನಡೆಯಲು ಬಿಡಲ್ಲ. ಎರಡೂ ರಾಷ್ಟ್ರಗಳನ್ನು ಏಕೀಕರಿಸುವ ತನ್ನ ಉದ್ದೇಶವನ್ನು ತಡೆಯಲಾಗಲ್ಲ ಎಂದಿದೆ. ಇದೇ ಸಮಯದಲ್ಲಿ ಸ್ವಯಂ ಆಡಳಿತದ ದ್ವೀಪರಾಷ್ಟ್ರ ತೀರದಲ್ಲಿ ಆರು ಚೀನೀ ನೌಕಾ ಹಡಗುಗಳು ಸುತ್ತುವರೆದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ತೈವಾನ್ ಪ್ರತ್ಯೇಕತಾವಾದಿ ಪಡೆಗಳು ಸಾಮಾನ್ಯ ಜನರ ತೆರಿಗೆದಾರರ ಹಣವನ್ನು ಎಷ್ಟೇ ಖರ್ಚು ಮಾಡಿದರೂ, ಎಷ್ಟೇ ಅಮೆರಿಕದ ಶಸ್ತ್ರಾಸ್ತ್ರಗಳನ್ನು ಆಮದು ಮಾಡಿಕೊಂಡರೂ, ಅದು ತೈವಾನ್ ಸಮಸ್ಯೆಯನ್ನು ಪರಿಹರಿಸಲು ಸಾಧ್ಯವಿಲ್ಲ. ದ್ವೀಪರಾಷ್ಟ್ರವನ್ನು ಚೀನಾದಲ್ಲಿ ವಿಲೀನ ಮಾಡುವ ದೃಢ ಸಂಕಲ್ಪವನ್ನು ಇದರಿಂದ ಅಲುಗಾಡಿಸುವುದು ಸಾಧ್ಯವಿಲ್ಲ ಎಂದು ಚೀನಾ ಬೊಬ್ಬಿರಿದಿದೆ.
ತೈವಾನ್ ಅನ್ನು ಅಮೆರಿಕ ಯುದ್ಧಕೇಂದ್ರಿತ ಶಸ್ತ್ರಾಸ್ತ್ರಗಳ ಡಿಪೋ ಆಗಿ ಪರಿವರ್ತಿಸುತ್ತಿದೆ. ಮಿಲಿಟರಿ ಆರ್ಥಿಕ ನೆರವು ನೀಡುವ ಮೂಲಕ ದೇಶವನ್ನು ತನ್ನ ವಿರುದ್ಧ ಎತ್ತಿ ಕಟ್ಟುತ್ತಿದೆ. ಈ ಎಲ್ಲಾ ಕ್ರಮಗಳನ್ನು ಚೀನಾ ತಡೆಯುವ ಸಾಮರ್ಥ್ಯ ಹೊಂದಿದೆ. ಇದು ತೈವಾನ್ ಜಲಸಂಧಿಯಲ್ಲಿ ಯುದ್ಧ ಭೀತಿಯನ್ನು ಉಲ್ಬಣಗೊಳಿಸುತ್ತದೆ ಅಷ್ಟೆ ಎಂದು ಚೀನಾ ಹೇಳಿಕೆ ತಿಳಿಸಿದೆ.
ತೈವಾನ್ ಸುತ್ತ ಚೀನೀ ಹಡಗುಗಳು: ತೈವಾನ್‌ನ ಡೆಮಾಕ್ರಟಿಕ್ ಪ್ರೋಗ್ರೆಸಿವ್ ಪಾರ್ಟಿ ನೇತೃತ್ವದ ಸರ್ಕಾರ ಚೀನಾದ ಆಕ್ರಮಣವನ್ನು ತಡೆಗಟ್ಟುವ ಕಾರ್ಯತಂತ್ರದ ಭಾಗವಾಗಿ ಅಮೆರಿಕದಿಂದ ಶಸ್ತ್ರಾಸ್ತ್ರಗಳ ಖರೀದಿಯನ್ನು ಹೆಚ್ಚಿಸಿದೆ. ಈ ಮಧ್ಯೆ ತೈವಾನ್‌ನ ರಾಷ್ಟ್ರೀಯ ರಕ್ಷಣಾ ಸಚಿವಾಲಯವು ದ್ವೀಪದ ಸುತ್ತ ಆರು ಚೀನೀ ನೌಕಾಪಡೆಯ ಹಡಗುಗಳನ್ನು ಭಾನುವಾರ ಪತ್ತೆಹಚ್ಚಿದೆ.
ಏನಿದು ವಿವಾದ: 1949 ರಲ್ಲಿ ಅಂತರ್ಯುದ್ಧದ ವೇಳೆ ಚೀನಾ ಮತ್ತು ತೈವಾನ್ ವಿಭಜನೆಯಾಗಿದ್ದವು. ತೈವಾನ್ನಲ್ಲಿ ಚೀನೀ ಭಾಷಿಕರೇ ಹೆಚ್ಚಾಗಿರುವ ಕಾರಣ ಆ ದೇಶವನ್ನು ಡ್ರ್ಯಾಗನ್ ರಾಷ್ಟ್ರ ತನ್ನಲ್ಲಿ ವಿಲೀನ ಮಾಡಿಕೊಳ್ಳಲು ಹವಣಿಸುತ್ತಿದೆ. ಆದರೆ, ತನ್ನದೇ ಸಾರ್ವಭೌಮ ಆಡಳಿತ ಹೊಂದಿರುವ ರಾಷ್ಟ್ರ ಚೀನಾಕ್ಕೆ ಸೇರಲು ವಿರೋಧಿಸುತ್ತಿದೆ. ಇದು ಕಿತ್ತಾಟಕ್ಕೆ ಕಾರಣವಾಗಿದೆ. ತೈವಾನ್ ಬಿಕ್ಕಟ್ಟಿನಲ್ಲಿ ವಿಶ್ವದ ದೊಡ್ಡಣ್ಣ ಅಮೆರಿಕ ತಲೆದೂರಿಸಿದ್ದು, ಬಿಕ್ಕಟ್ಟು ಇನ್ನಷ್ಟು ಉಲ್ಬಣಿಸಿದೆ.
ಅಮೆರಿಕ ಈ ಹಿಂದೆಯೂ ಮಿಲಿಟರಿ, ಶಸ್ತ್ರಾಸ್ತ್ರ ನೆರವಿಗೆ ನೆರವು ಘೋಷಿಸಿತ್ತು. ಇದು ಚೀನಾವನ್ನು ಕೆರಳಿಸಿದ್ದು, ಪೀಪಲ್ಸ್ ಲಿಬರೇಶನ್ ಆರ್ಮಿ (ಪಿಎಲ್‌ಎ) ಇತ್ತೀಚಿನ ವರ್ಷಗಳಲ್ಲಿ ತೈವಾನ್ ಅನ್ನು ಗುರಿಯಾಗಿಟ್ಟುಕೊಂಡು ದ್ವೀಪದ ಸುತ್ತಲೂ ಯುದ್ಧ ವಿಮಾನಗಳು ಮತ್ತು ಯುದ್ಧನೌಕೆಗಳನ್ನು ಜಮಾವಣೆ ಮಾಡುತ್ತಿದೆ.
ಇದನ್ನೂ ಓದಿ: ತೈವಾನ್ ಸುತ್ತಮುತ್ತ ಮತ್ತೆ ಮಿಲಿಟರಿ ತಾಲೀಮು ಪ್ರಾರಂಭಿಸಿದ ಚೀನಾ: 13 ವಿಮಾನ, 3 ಯುದ್ಧನೌಕೆಗಳು ಪತ್ತೆ
