ಗಾಜಾ ಪಟ್ಟಿ(-ಪ್ಯಾಲೆಸ್ತೀನ್): ಉತ್ತರ ಗಾಜಾ ಪಟ್ಟಿಯಲ್ಲಿರುವ ನಿರಾಶ್ರಿತರ ಶಿಬಿರದಲ್ಲಿ ಗುರುವಾರ ಸಂಜೆ ವಸತಿ ಕಟ್ಟಡದಲ್ಲಿ ಶೇಖರಿಸಿಡಲಾಗಿದ್ದ ಗ್ಯಾಸೋಲಿನ್‌ನಿಂದ ಬೆಂಕಿ ಹೊತ್ತಿಕೊಂಡ ಪರಿಣಾಮ 21 ಜನರು ಸಾವನ್ನಪ್ಪಿದ್ದಾರೆ ಎಂದು ಪ್ರದೇಶದ ಹಮಾಸ್ ಆಡಳಿತಗಾರರು ತಿಳಿಸಿದ್ದಾರೆ.
ಇಸ್ರೇಲಿ-ಪ್ಯಾಲೆಸ್ತೀನ್ ಸಂಘರ್ಷದ ಹೊರತಾಗಿ ಇತ್ತೀಚಿನ ವರ್ಷಗಳಲ್ಲಿ ಸಂಭವಿಸಿದ ಅತಿದೊಡ್ಡ ದುರಂತ ಇದಾಗಿದೆ. ತುಂಬಾ ಜನ ಕಿಕ್ಕಿರಿದು ವಾಸವಿದ್ದ ಜಬಾಲಿಯಾ ಶಿಬಿರದಲ್ಲಿನ ಮೂರು ಅಂತಸ್ತಿನ ಕಟ್ಟಡದ ಮೂರನೇ ಮಹಡಿಯಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಕಟ್ಟಡದಲ್ಲಿದ್ದ ಯಾರೂ ಬದುಕುಳಿದಿಲ್ಲ ಎಂದು ಪ್ಯಾಲೇಸ್ಟಿನಿಯನ್ ಉಗ್ರಗಾಮಿ ಗುಂಪು ಹಮಾಸ್ ಹೇಳಿದೆ.
ಕಟ್ಟಡದಲ್ಲಿ ಸಂಗ್ರಹಿಸಲಾಗಿದ್ದ ಗ್ಯಾಸೋಲಿನ್ ಬೆಂಕಿಗೆ ಕಾರಣ ಎಂದು ಹಮಾಸ್ ನಿಯಂತ್ರಣದಲ್ಲಿರುವ ಗಾಜಾದಲ್ಲಿನ ಸಿವಿಲ್ ಡಿಫೆನ್ಸ್ ಹೇಳಿದೆ. ಗ್ಯಾಸೋಲಿನ್ಗೆ ಹೇಗೆ ಬೆಂಕಿ ಹೊತ್ತಿಕೊಂಡಿತು ಎಂಬುದು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ. ಆದರೆ, ತನಿಖೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನೂರಾರು ಜನ ಬೀದಿಯಲ್ಲಿ ಹೊರಗೆ ಜಮಾಯಿಸಿ ಅಗ್ನಿಶಾಮಕ ವಾಹನ ಮತ್ತು ಆಂಬ್ಯುಲೆನ್ಸ್‌ಗಳಿಗಾಗಿ ಕಾಯುತ್ತಿರುವುದು ಮತ್ತು ಕಿಟಕಿಗಳಿಂದ ಜ್ವಾಲೆ ಬರುತ್ತಿರುವ ದೃಶ್ಯ ಕಾಣಿಸಿವೆ.
ಹಮಾಸ್‌ನಿಂದ ಆಳಲ್ಪಡುವ ಮತ್ತು ಇಸ್ರೇಲ್-ಈಜಿಪ್ಟ್ ದಿಗ್ಬಂಧನದಲ್ಲಿ ಸಿಲುಕಿರುವ ಗಾಜಾ ಪಟ್ಟಿ ತೀವ್ರ ಇಂಧನ ಬಿಕ್ಕಟ್ಟು ಎದುರಿಸುತ್ತಿದೆ. ಹೀಗಾಗಿ ಚಳಿಗಾಲದ ತಯಾರಿಗಾಗಿ ಜನರು ಸಾಮಾನ್ಯವಾಗಿ ಅಡುಗೆ ಅನಿಲ, ಡೀಸೆಲ್ ಮತ್ತು ಗ್ಯಾಸೋಲಿನ್ ಅನ್ನು ಮನೆಗಳಲ್ಲಿ ಸಂಗ್ರಹಿಸುತ್ತಾರೆ.
ಸುಧಾರಿತ ವೈದ್ಯಕೀಯ ಆರೈಕೆಯ ಅಗತ್ಯವಿರುವ ಗಾಯಾಳುಗಳನ್ನು ವೆಸ್ಟ್ ಬ್ಯಾಂಕ್ ಮತ್ತು ಜೆರುಸಲೆಮ್‌ನಲ್ಲಿರುವ ಪ್ಯಾಲೇಸ್ಟಿನಿಯನ್ ಆಸ್ಪತ್ರೆಗಳಿಗೆ ಸ್ಥಳಾಂತರಿಸಲು ಇಸ್ರೇಲ್‌ಗೆ ತನ್ನ ಗಾಜಾದೊಂದಿಗಿನ ಗಡಿಯನ್ನು ತೆರೆಯಬೇಕೆಂದು ಪ್ಯಾಲೇಸ್ಟಿನಿಯನ್ ಪ್ರಾಧಿಕಾರದ ಹಿರಿಯ ಅಧಿಕಾರಿ ಹುಸೇನ್ ಅಲ್-ಶೇಖ್ ಮನವಿ ಮಾಡಿದ್ದರು. ಆದರೆ ಬೆಂಕಿ ದುರಂತಕ್ಕೀಡಾದ ಕಟ್ಟಡದಲ್ಲಿದ್ದವರು ಒಬ್ಬರೂ ಬದುಕುಳಿದಿಲ್ಲ ಎಂದು ನಂತರ ತಿಳಿದುಬಂದಿದೆ.
ಇದನ್ನೂ ಓದಿ: EXPLAINER: ಇಸ್ರೇಲ್ ಅಥವಾ ಹಮಾಸ್.. ಯಾರಿಂದ ಯುದ್ಧಾಪರಾಧ?
