ಜಿನೀವಾ: ಪ್ರತಿ ಯುದ್ಧದಿಂದ ಹೆಚ್ಚು ಹಾನಿಗೆ ಒಳಗಾಗುವವರು ಮಹಿಳೆಯರು ಮತ್ತು ಮಕ್ಕಳು. ಅದೇ ರೀತಿ ಇದೀಗ ಪ್ಯಾಲೆಸ್ಟೈನ್ ಮತ್ತು ಇಸ್ರೇಲ್ ಯುದ್ಧದಿಂದ ಹಾನಿಗೆ ಒಳಗಾಗುತ್ತಿರುವವರು ಅವರೇ. ಯುದ್ಧದ ಕುರಿತು ವಿಶ್ವಸಂಸ್ಥೆ ನೀಡಿರುವ ವರದಿಯಲ್ಲಿ ಗಾಜಾದಲ್ಲಿನ ಹಿಂಸಾಚಾರದಲ್ಲಿ 4,93,00 ಮಹಿಳೆಯರು ಮತ್ತು ಬಾಲಕಿಯರು ತಮ್ಮ ಮನೆಗಳಿಂದ ಸ್ಥಳಾಂತರಗೊಂಡಿದ್ದು, 900 ಮಹಿಳೆಯರು ತಮ್ಮ ಗಂಡಂದಿರನ್ನು ಕಳೆದುಕೊಂಡು ವಿಧವೆ ಪಟ್ಟ ಹೊಂದಿದ್ದಾರೆ ಎಂದು ತಿಳಿಸಿದೆ.
ಯುದ್ಧದಲ್ಲಿ ಪುರುಷ ಸಂಗಾತಿಗಳು ಸಾವನ್ನಪ್ಪಿದ್ದು, ಇದರಿಂದ ಮಹಿಳೆಯರು ಮನೆಯ ಜವಾಬ್ದಾರಿಯನ್ನು ಹೊರುವಂತಾಗಿದ್ದು, ಈ ಮೂಲಕ ಯುದ್ಧದಿಂದ ವಿಧವೆ ಆದವರನ್ನು ವಿಶ್ವಸಂಸ್ಥೆ ಮಹಿಳೆ ಅಂದಾಜಿಸಿದೆ ಎಂದು ವಿಶ್ವ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆ್ಯಂಟೋನಿಯೋ ಗುಟ್ಟೆರೆಸ್ ಅವರ ಉಪ ವಕ್ತಾರ ಫಾರನ್ ಹಕ್ ತಿಳಿಸಿದ್ದಾರೆ. ಈ ಸಂಬಂಧ ಯುಎನ್ ವುಮೆನ್ ರ್ಯಾಪಿಡ್ ಅಸೆಸ್ಮೆಂಟ್ ಅಂಡ್ ಹ್ಯೂಮೆನಿಟೆರಿಯನ್ ರೆಸ್ಪಾನ್ಸ್ ಇನ್ ದ ಆಕ್ಯೂಪೈಡ್ ಪ್ಯಾಲೆಸ್ಟೈನಿಯನ್ ಟೆರಿಟರಿ (ಆಕ್ರಮಿತ ಪ್ಯಾಲೆಸ್ಟೈನಿಯನ್ ಪ್ರಾಂತ್ಯದಲ್ಲಿ ವಿಶ್ವಸಂಸ್ಥೆಯ ಮಹಿಳೆಯರ ತ್ವರಿತ ಮೌಲ್ಯಮಾಪನ ಮತ್ತು ಮಾನವೀಯ ಪ್ರತಿಕ್ರಿಯೆ) ವರದಿಯಲ್ಲಿ ತಿಳಿಸಲಾಗಿದೆ.
ಅಕ್ಟೋಬರ್ 7ರಿಂದ ಗಾಜಾದಲ್ಲಿ ನಡೆಯುತ್ತಿರುವ ಹಿಂಸಾಚಾರ ಕುರಿತು ಗುರುವಾರದವರೆಗೆ ಅಂಕಿ ಅಂಶವನ್ನು ವಿಶ್ವಸಂಸ್ಥೆ ಕಚೇರಿ ಸಂಗ್ರಹಿಸಿದೆ.
ಈ ಅಧ್ಯಯನ ಪ್ರಕಾರ 3,785 ಪ್ಯಾಲೆಸ್ಟೈನಿಯನ್ನರು ಸಾವನ್ನಪ್ಪಿದರೆ, 12,500ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಇದರಲ್ಲಿ ಶೇ 53ರಷ್ಟು ಜನರು ಮಹಿಳೆಯರು ಮತ್ತು ಮಕ್ಕಳಾಗಿದ್ದಾರೆ ಎಂದು ಕ್ಸಿನುವಾ ನ್ಯೂಸ್ ಏಜೆನ್ಸಿ ವರದಿ ಮಾಡಿದೆ.
1 ಮಿಲಿಯನ್ನಷ್ಟು ಮಂದಿ ಅಂದರೆ ಸುಮಾರು ಗಾಜಾದ ಒಟ್ಟಾರೆ ಜನಸಂಖ್ಯೆಯ ಅರ್ಧದಷ್ಟು ಜನರು ಸ್ಥಳಾಂತರಗೊಂಡಿದ್ದಾರೆ. ಗಾಜಾದಲ್ಲಿ ನಾಗರಿಕ ಮೂಲಸೌಕರ್ಯಗಳು ಹಾನಿಗೀಡಾಗಿವೆ. 5,262 ಕಟ್ಟಡಗಳು ಧ್ವಂಸಗೊಂಡಿವೆ ಎಂದು ಅಧ್ಯಯನ ವರದಿಯಲ್ಲಿ ವಿವರಿಸಲಾಗಿದೆ.
ಗಾಜಾ ಯುದ್ಧದಲ್ಲಿ 1,487 ಮಂದಿ ಸಾವನ್ನಪ್ಪಿದ್ದು, ಇದರಿಂದ ವಿಧವೆಯರ ಸಂಖ್ಯೆ ಏರಿಕೆ ಕಂಡಿದೆ. ಸುಮಾರು 900 ಮಂದಿ ಹೊಸದಾಗಿ ವಿಧವೆಯಾಗಿದ್ದು, ಮನೆಯ ಮುಖ್ಯಸ್ಥರಾಗಿದ್ದಾರೆ. 3,103 ಮಕ್ಕಳು ತಮ್ಮ ತಂದೆಯನ್ನು ಕಳೆದುಕೊಂಡಿದ್ದಾರೆ.
ವಿಶ್ವಸಂಸ್ಥೆಯ ಮಹಿಳಾ ಅಧ್ಯಯನ ಹೇಳುವಂತೆ, ವಿಶ್ವಸಂಸ್ಥೆಯ ಜನಸಂಖ್ಯಾ ನಿಧಿ (ಯುಎನ್ಎಫ್ಪಿಎ) ಅಕ್ಟೋಬರ್ 13 ಪರಿಸ್ಥಿತಿಯ ವರದಿಯಲ್ಲಿ, ಗಾಜಾದಲ್ಲಿ ಸಂತಾನೋತ್ಪತ್ತಿ ಸಾಮರ್ಥ್ಯದ 5,40,00 ಮಹಿಳೆಯರಿದ್ದು, ಇದರಲ್ಲಿ 50 ಸಾವಿರ ಮಂದಿ ಗರ್ಭಿಣಿಯರಿದ್ದಾರೆ. ಇನ್ನು ಮುಂದಿನ ತಿಂಗಳು ಪ್ರಸವ ನಿರೀಕ್ಷೆ ಮಾಡುತ್ತಿರುವ 5,522 ಮಂದಿ ಇದ್ದಾರೆ ಎಂದು ವರದಿ ತಿಳಿಸಿದೆ. (ಐಎಎನ್ಎಸ್)
ಇದನ್ನೂ ಓದಿ: ಹಮಾಸ್ ಕಪಿಮುಷ್ಠಿಯಿಂದ ತಾಯಿ ಮಗಳು ಬಿಡುಗಡೆ... ಅಮೆರಿಕ ಅಧ್ಯಕ್ಷರಿಂದ ಸ್ವಾಗತ
