ತಪಾಚುಲಾ(ಮೆಕ್ಸಿಕೊ): ಗ್ವಾಟೆಮಾಲಾ ಗಡಿಯ ಸಮೀಪ ದಕ್ಷಿಣ ಮೆಕ್ಸಿಕೊದ ಹೆದ್ದಾರಿಯಲ್ಲಿ ಸರಕು ಸಾಗಣೆ ಟ್ರಕ್ ಅಪಘಾತಕ್ಕೀಡಾಗಿ ಕ್ಯೂಬಾದ 10 ವಲಸಿಗರು ಸಾವನ್ನಪ್ಪಿದ್ದಾರೆ. ಈ ಘಟನೆಯಲ್ಲಿ 17ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಮೃತಪಟ್ಟ ಕ್ಯೂಬನ್ ವಲಸಿಗರೆಲ್ಲರೂ ಮಹಿಳೆಯರಾಗಿದ್ದು, ಒಬ್ಬ ಬಾಲಕಿಯೂ ಇದರಲ್ಲಿ ಸೇರಿದ್ದಾಳೆ ಎಂದು ರಾಷ್ಟ್ರೀಯ ವಲಸೆ ಸಂಸ್ಥೆ ತಿಳಿಸಿದೆ.
ಗ್ವಾಟೆಮಾಲನ್ ಗಡಿಯಿಂದ ಸುಮಾರು 175 ಕಿಲೋಮೀಟರ್ ದೂರದಲ್ಲಿರುವ ಪಿಜಿಜಿಯಾಪಾನ್ ಪಟ್ಟಣದ ಸಮೀಪವಿರುವ ಹೆದ್ದಾರಿಯಲ್ಲಿ ಭಾನುವಾರ ಈ ಅಪಘಾತ ಸಂಭವಿಸಿದ್ದು, ಚಿಯಾಪಾಸ್ ರಾಜ್ಯದ ನಾಗರಿಕ ರಕ್ಷಣಾ ಕಚೇರಿ ಸ್ಪಷ್ಟನೆ ನೀಡಿದೆ. ಅಪಘಾತಗೊಂಡ ಟ್ರಕ್ 27 ವಲಸಿಗರನ್ನು ಹೊತ್ತೊಯ್ಯುತ್ತಿದ್ದು, ಚಾಲಕ ವೇಗವಾಗಿ ವಾಹನ ಚಲಾವಣೆ ಮಾಡಿದ ಪರಿಣಾಮ ನಿಯಂತ್ರಣ ಕಳೆದುಕೊಂಡ ಟ್ರಕ್, ಪಲ್ಟಿಯಾಗಿ ಈ ದುರ್ಘಟನೆ ಸಂಭವಿಸಿದೆ ಎಂದು ತಿಳಿದು ಬಂದಿದೆ. ಅಪಘಾತದ ಬಳಿಕ ಚಾಲಕ ಪರಾರಿಯಾಗಿದ್ದಾನೆ.
ಮೆಕ್ಸಿಕನ್ ಅಧಿಕಾರಿಗಳು ಸರಿಯಾದ ದಾಖಲೆಗಳಿಲ್ಲದ ವಲಸಿಗರನ್ನು ಕರೆದುಕೊಂಡು ಹೋಗುವ ಬಸ್ಗಳ ಮೇಲೆ ನಿಷೇಧ ಹೇರುವುದು ಕಾಮನ್. ಹೀಗಾಗಿ ಹಣವಿಲ್ಲದ ವಲಸಿಗರು ಸಾಮಾನ್ಯವಾಗಿ ಹೆದ್ದಾರಿಗಳ ಬದಿಯಲ್ಲಿ ನಡೆದುಕೊಂಡೇ ಹೋಗುತ್ತಾರೆ. ಅಷ್ಟೇ ಅಲ್ಲ ದಾರಿಯಲ್ಲಿ ಸಂಚರಿಸುವ ಲಾರಿಗಳಿಗೆ ಕೈ ಹೊಡೆದು ಅದರಲ್ಲಿ ಪ್ರಯಾಣ ಮಾಡುತ್ತಾರೆ.
ಶನಿವಾರವೂ ಅಪಘಾತ ಓರ್ವ ವಲಸಿಗ ಸಾವು: ಮೆಕ್ಸಿಕೋದ ವಲಸೆ ಏಜೆನ್ಸಿ ನಿರ್ವಹಿಸುವ ವ್ಯಾನ್ಗೆ ಬಸ್ ಡಿಕ್ಕಿ ಹೊಡೆದ ಪರಿಣಾಮ ಈಕ್ವೆಡಾರ್‌ನ ವಲಸಿಗರೊಬ್ಬರು ಮೃತಪಟ್ಟು, ಕೊಲಂಬಿಯಾ ಮತ್ತು ಗ್ವಾಟೆಮಾಲಾದ 10 ಮಂದಿ ಗಾಯಗೊಂಡಿದ್ದರು. ಕ್ಯಾಲಿಫೋರ್ನಿಯಾದ ಕ್ಯಾಲೆಕ್ಸಿಕೊದಿಂದ ಗಡಿಯಾಚೆಗಿನ ಮೆಕ್ಸಿಕಾಲಿ ನಗರದಲ್ಲಿ ಬಸ್‌ಗೆ ವ್ಯಾನ್ ಡಿಕ್ಕಿ ಹೊಡೆದಿದೆ ಎಂದು ಮೆಕ್ಸಿಕೊದ ರಾಷ್ಟ್ರೀಯ ವಲಸೆ ಸಂಸ್ಥೆ ತಿಳಿಸಿದೆ.
ಶುಕ್ರವಾರ ಇಬ್ಬರು ವಲಸಿಗರ ಮೇಲೆ ಮಾರಾಣಾಂತಿಕ ಗುಂಡಿನ ದಾಳಿ: ಇನ್ನು ಶುಕ್ರವಾರ, ಮೆಕ್ಸಿಕನ್ ಗಡಿ ಭಾಗದಲ್ಲಿ ಇಬ್ಬರು ಮೆಕ್ಸಿಕನ್ ವಲಸಿಗರನ್ನು ಬಂದೂಕಿನಿಂದ ಹತ್ಯೆ ಮಾಡಲಾಗಿತ್ತು. ಈ ಘಟನೆಯಲ್ಲಿ ಇತರ ಮೂವರು ಗುಂಡೇಟಿನಿಂದ ಗಾಯಗೊಂಡಿದ್ದರು. ಈ ಬಗ್ಗೆ ಅಲ್ಲಿನ ವಲಸೆ ಸಂಸ್ಥೆ ಮಾಹಿತಿ ನೀಡಿತ್ತು.
ಗುರುವಾರ ಟ್ರಕ್ ಪಲ್ಟಿ ಇಬ್ಬರು ವಲಸಿಗರು ಸಾವು, 27 ಮಂದಿ ಗಾಯ: ಗುರುವಾರ ಚಿಯಾಪಾಸ್‌ನ ಹೆದ್ದಾರಿಯಲ್ಲಿ ಟ್ರಕ್ ಪಲ್ಟಿ ಹೊಡೆದು ಇಬ್ಬರು ಮಧ್ಯ ಅಮೇರಿಕನ್ ವಲಸಿಗರು ಸಾವನ್ನಪ್ಪಿ, 27 ಮಂದಿ ಗಾಯಗೊಂಡಿದ್ದರು. 52 ವಲಸಿಗರು ತುಂಬಿದ ಡಂಪ್ ಟ್ರಕ್‌ನಲ್ಲಿ ಪ್ರಯಾಣಿಸುತ್ತಿದ್ದಾಗ ಚಾಲಕನ ನಿಯಂತ್ರಣ ತಪ್ಪಿ ಪಲ್ಟಿಯಾಗಿತ್ತು. ಆರು ಮಕ್ಕಳು ಸೇರಿದಂತೆ ಗಾಯಗೊಂಡವರನ್ನು ಆಸ್ಪತ್ರೆಗೆ ಸಾಗಿಸಿ ಚಿಕಿತ್ಸೆ ಕೊಡಿಸಲಾಗಿತ್ತು.
ಚಲಿಸುವ ರೈಲು ಹತ್ತಿದ ಭೂಪರು ಸಾವು: ಬುಧವಾರ ಟೆಕ್ಸಾಸ್ ಗಡಿಯ ಸಮೀಪವಿರುವ ಕೊವಾಹಿಲಾ ರಾಜ್ಯದಲ್ಲಿ ಚಲಿಸುವ ರೈಲನ್ನು ಹತ್ತಲು ಪ್ರಯತ್ನಿಸಿದ ಇಬ್ಬರು ಮಧ್ಯ ಅಮೇರಿಕನ್ ವಲಸಿಗರು ಮೃತಪಟ್ಟಿದ್ದರು.
ಇದನ್ನೂ ಓದಿ: ಟರ್ಕಿ ಸಂಸತ್ತಿನ ಸಮೀಪ ಆತ್ಮಾಹುತಿ ಬಾಂಬ್ ಸ್ಪೋಟ; ಇಬ್ಬರು ಪೊಲೀಸ್ ಸಿಬ್ಬಂದಿಗೆ ಗಾಯ
