ಬೈರುತ್ (ಲೆಬನಾನ್): ಇಸ್ರೇಲ್ ವಿರುದ್ಧ ಹೋರಾಡಿ ಗೆಲ್ಲಲಾಗುವುದಿಲ್ಲ, ಇದಕ್ಕೆ ನಾವು ತಲೆದಂಡ ತೆರಬೇಕಾಗುತ್ತದೆ ಎಂದು ಸ್ಪಷ್ಟವಾಗಿ ತಿಳಿದಿದ್ದರೂ ಕೂಡ ಗಾಜಾ ದಾಳಿ ನಡೆಸುತ್ತಿರುವುದು ಜೆರುಸಲೇಂಗಾಗಿ ಎಂದು ಪ್ಯಾಲೆಸ್ತೀನ್ನ ಇಸ್ಲಾಮಿಕ್ ಜಿಹಾದ್ ಗುಂಪಿನ ನಾಯಕ ಹೇಳಿದ್ದಾರೆ.
ಬೈರುತ್ನ ಸುದ್ದಿ ವಾಹಿನಿಯೊಂದಿಗೆ ಮಾತನಾಡಿದ ಪ್ಯಾಲೆಸ್ತೀನ್ನ ಇಸ್ಲಾಮಿಕ್ ಜಿಹಾದ್ ಗುಂಪಿನ ನಾಯಕ ಜಿಯಾದ್ ನಖ್ಲೇಹ್, ಪ್ಯಾಲೆಸ್ತೀನ್ ಬಂಡುಕೋರ ಸಂಘಟನೆಗಳಾದ ಹಮಾಸ್ ಮತ್ತು ಫತಾ ನಡುವೆಯೇ ಭಿನ್ನಭಿಪ್ರಾಯವಿದೆ. ಇವರಿಬ್ಬರೂ ಜೊತೆಯಾಗದೇ ಇಸ್ರೇಲ್ ವಿರುದ್ಧ ಹೋರಾಡುವುದು ಅಷ್ಟು ಸುಲಭವಲ್ಲ. ಆದರೂ ಗಾಜಾ ಇಸ್ರೇಲ್ ಮೇಲೆ ಪವಾಡಸದೃಶ ದಾಳಿಗಳನ್ನು ನಡೆಸಿದೆ. ಈ ಯುದ್ಧ ನಮಗೆ ದುಬಾರಿಯಾಗಿದ್ದರೂ ಜೆರುಸಲೇಂ ಅನ್ನು ರಕ್ಷಿಸಲು ಹಾಗೂ ಸ್ವಾತಂತ್ರ್ಯದ ಏಕೈಕ ಮಾರ್ಗ ಇದಾಗಿದೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಇಸ್ರೇಲ್-ಪ್ಯಾಲೆಸ್ತೀನ್ ಸಂಘರ್ಷ: 69 ಮಕ್ಕಳು ಸೇರಿ 256 ಮಂದಿ ಸಾವು
ದಾಳಿ ವಿಚಾರದಲ್ಲಿ ಮೌನವಾಗಿರುವ ಅರಬ್ ರಾಷ್ಟ್ರಗಳೊಂದಿಗಿನ ಶಾಂತಿ ಒಪ್ಪಂದಗಳು ಅಥವಾ ಪರಮಾಣು ಶಸ್ತ್ರಾಸ್ತ್ರಗಳು, ಯುದ್ಧ ವಿಮಾನಗಳು ಇಸ್ರೇಲಿಗರಿಗೆ ಭದ್ರತೆ ಮತ್ತು ಶಾಂತಿಯನ್ನು ನೀಡಬಹುದು. ನಮ್ಮ ಬಳಿ ಎರಡು ಆಯ್ಕೆಗಳಿವೆ - ಒಂದು ಎಲ್ಲವನ್ನೂ ನೀಡಿ ಇಸ್ರೇಲ್ಗೆ ಶರಣಾಗಬೇಕು, ಇಲ್ಲವೇ ಎಲ್ಲದಕ್ಕಾಗಿ ಇಸ್ರೇಲ್ ವಿರುದ್ಧ ಹೋರಾಡಬೇಕು ಎಂದು ನಖ್ಲೇಹ್ ಅಭಿಪ್ರಾಯಪಟ್ಟಿದ್ದಾರೆ.
ಇಸ್ರೇಲ್ನ ಜೆರುಸಲೇಂನಲ್ಲಿರುವ ಅಲ್‌-ಅಕ್ಸಾ ಮಸೀದಿಯು ಮುಸ್ಲಿಮರು ಹಾಗೂ ಯಹೂದಿಗಳಿಗೆ ಪವಿತ್ರವಾದ ಸ್ಥಳವಾಗಿದ್ದು, ಮಸೀದಿ ಜಾಗದ ವಿಚಾರವಾಗಿ ಅನೇಕ ವರ್ಷಗಳಿಂದ ಉಭಯ ರಾಷ್ಟ್ರಗಳ ನಡುವೆ ಗಲಾಟೆ ನಡೆಯುತ್ತಲೇ ಬಂದಿದೆ. ಈದ್ ಹಬ್ಬದ ಸಂದರ್ಭದಲ್ಲಿ ಇದೇ ವಿಚಾರ ಮತ್ತೆ ಸಂಘರ್ಷಕ್ಕೆ ಎಡೆಮಾಡಿಕೊಟ್ಟಿದ್ದು, ದಾಳಿ ಮುಂದುವರೆದಿದೆ. ದಾಳಿಯಲ್ಲಿ 69 ಮಕ್ಕಳು ಸೇರಿದಂತೆ ಒಟ್ಟು 256 ಮಂದಿ ಸಾವನ್ನಪ್ಪಿದ್ದು, ಸಾವಿರಾರು ಜನರು ಗಾಯಗೊಂಡಿದ್ದಾರೆ. ಬಹುಪಾಲು ಸಾವು-ನೋವು ಪ್ಯಾಲೆಸ್ತೀನ್ನಲ್ಲಿ ಸಂಭವಿಸಿದ್ದು, 67 ಮಕ್ಕಳು ಸೇರಿ 244 ಜನರು ಬಲಿಯಾಗಿದ್ದಾರೆ.
