ಗಾಜಾ (ಪ್ಯಾಲೆಸ್ತೀನ್): ಇಸ್ರೇಲ್ - ಪ್ಯಾಲೆಸ್ತೀನ್ ಸಂಘರ್ಷ ಜಾಗತಿಕ ಆತಂಕ ಉಂಟು ಮಾಡಿದೆ. ಇಸ್ರೇಲ್ ಮೇಲೆ ಪ್ಯಾಲೆಸ್ತೀನ್ನ ಹಮಾಸ್‌ ಉಗ್ರವಾದಿ ಪಡೆಗಳು ದಾಳಿ ನಡೆಸುತ್ತಿದ್ದರೆ ಅದಕ್ಕೆ ಪ್ರತ್ಯುತ್ತರವಾಗಿ ಇಸ್ರೇಲ್ ದೇಶ ಗಾಜಾ ಹಾಗು ವೆಸ್ಟ್‌ಬ್ಯಾಂಕ್‌ ಮೇಲೆ ಪ್ರತಿ ದಾಳಿ ನಡೆಸುತ್ತಿದೆ. ಸದ್ಯ ಇಲ್ಲಿ ರಾಕೆಟ್ಗಳು, ಕ್ಷಿಪಣಿಗಳ ಆರ್ಭಟ ವಿಪರೀತವಾಗಿದೆ. ವಿಧ್ವಂಸಕಾರಿ ರಾಕೆಟ್ಗಳು ಬಾಂಬ್‌ಗಳನ್ನು ಕಟ್ಟಡಗಳೆಡೆಗೆ ಹಾಕುತ್ತಿದ್ದು, ಜನರು ಪ್ರಾಣ ಕೈಯಲ್ಲಿ ಹಿಡಿದು ಮನೆಯೊಳಗೆ ಕುಳಿತಿದ್ದಾರೆ. ಆದರೆ ಇಲ್ಲೊಬ್ಬ ಧೈರ್ಯವಂತ ಪತ್ರಕರ್ತೆ ಮಾತ್ರ ತಾನು ನಿಂತಿರುವ ಸ್ಥಳದ ಸುತ್ತಲೂ ದಾಳಿಯಾಗುತ್ತಿದ್ದರೂ ಅದನ್ನು ವರದಿ ಮಾಡುತ್ತಿದ್ದಾರೆ. ಈ ವಿಡಿಯೋ ನೋಡಿ..
ಪ್ಯಾಲೆಸ್ತೀನ್ನ ಗಾಜಾ ನಗರದಲ್ಲಿ ಅಲ್ ಜಝೀರಾ ಸುದ್ದಿ ವಾಹಿನಿಯ ಪ್ರತಿನಿಧಿ ಯೂಮ್ನಾ ಅಲ್ ಸಯೀದ್ ಅವರು ದಾಳಿಯ ಸ್ಥಳಕ್ಕೆ ತೆರಳಿ ವಿವರಣೆ ನೀಡುತ್ತಿರುತ್ತಾರೆ. ಈ ವೇಳೆ ಅವರು, "ಬಹುತೇಕ ಎಲ್ಲಾ ಮಾಧ್ಯಮ ಕಚೇರಿಗಳು ಈ ಟವರ್ನಲ್ಲಿವೆ, ನೀವು ನೋಡ್ತಾ ಇದೀರಾ, ಈ ಟವರ್ ಅನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡಲಾಗುತ್ತಿದೆ" ಎಂದು ಹೇಳುತ್ತಿದ್ದಂತೆಯೇ ದಾಳಿಯಾಗಿದೆ. "ಓ ಮೈ ಗಾಡ್, ಕ್ಷಮಿಸಿ, ನಾನು ಕೆಳಗಿಳಿಯಬೇಕು, ನನ್ನಿಂದ ಸಾಧ್ಯವಿಲ್ಲ" ಎಂದು ಆಕೆ ಸ್ಫೋಟ ನಡೆದ ಕಟ್ಟಡದೆಡೆ ಕ್ಯಾಮೆರಾವನ್ನು ತಿರುಗಿಸಲು ಸೂಚಿಸುತ್ತಾರೆ.
ಇದನ್ನೂ ಓದಿ: ಪ್ಯಾಲೆಸ್ತೀನ್ ಕಡೆಯಿಂದ ಇಸ್ರೇಲ್ ಮೇಲೆ 200 ಕ್ಕೂ ಅಧಿಕ ರಾಕೆಟ್ ದಾಳಿ
ಮಂಗಳವಾರದಿಂದ ಇಸ್ರೇಲ್ - ಪ್ಯಾಲೆಸ್ತೀನ್ ನಡುವೆ ನಡೆಯುತ್ತಿರುವ ವೈಮಾನಿಕ ದಾಳಿಯಲ್ಲಿ ಈಗಾಗಲೇ 70ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದಾರೆ. ನೂರಾರು ಜನರು ಗಾಯಗೊಂಡಿದ್ದಾರೆ. ಅನೇಕ ಬಹುಮಹಡಿ ಕಟ್ಟಡಗಳು ನಾಶವಾಗಿದೆ.
