ಲಂಡನ್‌: ಬ್ರಿಟನ್‌ನಲ್ಲಿ ಕೋವಿಡ್ ರೂಪಾಂತರ ವೈರಸ್ ಸದ್ದು ಮಾಡುತ್ತಿರುವ ಬೆನ್ನಲ್ಲೇ ಯುಕೆ ಸರ್ಕಾರ ಆಕ್ಸ್‌ಫರ್ಡ್‌ ವಿವಿ ಸಂಶೋಧನೆಯ ಆಸ್ಟ್ರಾಜೆನೆಕಾ ಕೋವಿಡ್ ವ್ಯಾಕ್ಸಿನ್ ಬಳಕೆಗೆ ಮಾಡಲಾಗಿದ್ದ ಶಿಫಾರಸು ಅಂಗೀಕರಿಸಿದೆ. ಇನ್ಮುಂದೆ ಕೋವಿಡ್ ಸೋಂಕಿತರಿಗೆ ಇಲ್ಲಿ ಆಸ್ಟ್ರಾಜೆನೆಕಾ ಲಸಿಕೆ ನೀಡುವ ಸಾಧ್ಯತೆ ಇದೆ. ಈ ಸಂಬಂಧ ಬ್ರಿಟನ್ ಸರ್ಕಾರ 100 ಮಿಲಿಯನ್ ಡೋಸ್ ವ್ಯಾಕ್ಸಿನ್ಗೆ ಆರ್ಡರ್ ಮಾಡಿದೆ.
ವ್ಯಾಕ್ಸಿನ್ಗೆ ಸಂಬಂಧಿಸಿದ ಪ್ರಾಧಿಕಾರ 4 ರಿಂದ 12 ವಾರಗಳ ಅವಧಿಯಲ್ಲಿ 2 ಬಾರಿ ಲಸಿಕೆಯ ಪ್ರಯೋಗ ನಡೆಸಿದೆ. ವೈಜ್ಞಾನಿಕ ಪರೀಕ್ಷೆಯಲ್ಲಿ ಈ ಲಸಿಕೆ ಅತ್ಯಂತ ಸುರಕ್ಷಿತ ಎಂಬುದು ಖಾತ್ರಿಯಾಗಿದ್ದು, ಕೋವಿಡ್ ಸೋಂಕು ತಡೆಯಲು ಪರಿಣಾಮಕಾರಿಯಾಗಿ ಕೆಲಸ ಮಾಡಲಿದೆ ಎಂದು ಮೂಲಗಳು ತಿಳಿಸಿವೆ.
ಕೋವಿಡ್ ಸೋಂಕಿತರಿಗೆ ಎರಡನೇ ಬಾರಿ ಲಸಿಕೆ ನೀಡಿದಾಗ ಅಂಥವರು 14 ದಿನಗಳೊಳಗೆ ಗುಣಮುಖರಾಗಿದ್ದು ಕಂಡು ಬಂದಿದೆ. ಅಲ್ಲದೆ ಈ ಅವಧಿಯಲ್ಲಿ ಲಸಿಕೆಯಿಂದ ಯಾವುದೇ ರೀತಿಯ ಅಡ್ಡ ಪರಿಣಾಮಗಳಾಗಿಲ್ಲ ಎಂದು ಆಕ್ಸ್‌ಫರ್ಡ್‌ ವಿವಿ ತಿಳಿಸಿದೆ.
ಈಗಾಗಲೇ ಕೊರೊನಾಕ್ಕೆ ವಿಶ್ವಾದ್ಯಂತ 17 ಲಕ್ಷ ಜನರು ಬಲಿಯಾಗಿದ್ದಾರೆ. ಈ ನಡುವೆ ಯುಕೆಯಲ್ಲಿ ಕೊರೊನಾ ರೂಪಾಂತರ ವೈರಸ್ ಹಾವಳಿ ಜಾಸ್ತಿಯಾಗಿದೆ. ಇದು ಈಗ ಭಾರತಕ್ಕೂ ಕಾಲಿಟ್ಟಿದೆ. ಬೆಂಗಳೂರಲ್ಲೂ ಹಲವರಿಗೆ ಹೊಸ ಕೊರೊನಾ ವೈರಸ್ ದೃಢಪಟ್ಟಿದೆ.
