ವಿಡಿಯೋ: ಉಕ್ರೇನ್​ ಪ್ರಾದೇಶಿಕ ಕಟ್ಟಡದ ಮೇಲೆ ರಷ್ಯಾ ಭಯಾನಕ ಕ್ಷಿಪಣಿ ದಾಳಿ

ರಷ್ಯಾ ಸೇನೆ ನಡೆಸುತ್ತಿರುವ ಭೀಕರ ದಾಳಿಯಿಂದಾಗಿ ಉಕ್ರೇನ್​ ಸಂಪೂರ್ಣ ತತ್ತರಿಸಿ ಹೋಗಿದ್ದು, ಪ್ರಮುಖ ಕಟ್ಟಡಗಳು ಧ್ವಂಸಗೊಳ್ಳುತ್ತಿವೆ. ಇಂದು ಬೆಳಗ್ಗೆ ನಡೆದ ಕ್ಷಿಪಣಿ ದಾಳಿಯಲ್ಲಿ ಖಾರ್ಕಿವ್​​ನಲ್ಲಿರುವ ಪ್ರಾದೇಶಿಕ ಕಟ್ಟಡ ನೆಲಸಮವಾಗಿದೆ.

ಕೀವ್​(ಉಕ್ರೇನ್​​): ಕಳೆದ ಆರು ದಿನಗಳಿಂದ ಉಕ್ರೇನ್​​ನ ವಿವಿಧ ನಗರಗಳ ಮೇಲೆ ರಷ್ಯಾ ಮಿಲಿಟರಿ ವೈಮಾನಿಕ ಶೆಲ್​ ಹಾಗೂ ಕ್ಷಿಪಣಿ ದಾಳಿ ನಡೆಸುತ್ತಿದೆ. ಪರಿಣಾಮ ಅನೇಕ ಪ್ರಮುಖ ಕಟ್ಟಡಗಳು ನೆಲಸಮವಾಗುತ್ತಿವೆ.

ಇಂದು ಬೆಳಗ್ಗೆ ಕೂಡ ಪ್ರಮುಖ ನಗರ ಖಾರ್ಕಿವ್​​ನಲ್ಲಿರುವ ಪ್ರಾದೇಶಿಕ ಕಟ್ಟಡದ ಮೇಲೆ ರಷ್ಯಾ ಕ್ಷಿಪಣಿ ದಾಳಿ ನಡೆಸಿದ್ದು ಕಟ್ಟಡ​ ಕ್ಷಣಾರ್ಧದಲ್ಲಿ ಸಂಪೂರ್ಣ ಧ್ವಂಸಗೊಂಡಿದೆ.

ಈ ದಾಳಿಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗ್ತಿದೆ. ಕ್ಷಿಪಣಿ ದಾಳಿಯಿಂದಾಗಿ ಎಷ್ಟು ಜನರು ಪ್ರಾಣ ಕಳೆದುಕೊಂಡಿದ್ದಾರೆಂಬ ಮಾಹಿತಿ ಲಭ್ಯವಾಗಿಲ್ಲ.

ಉಕ್ರೇನ್​ನ ಈಶಾನ್ಯದಲ್ಲಿರುವ ಸಮಿ ಪ್ರದೇಶದಲ್ಲಿ ನಡೆದ ಶೆಲ್​ ದಾಳಿಯಲ್ಲಿ 70ಕ್ಕೂ ಅಧಿಕ ಉಕ್ರೇನ್​​ ಸೈನಿಕರು ಸಾವನ್ನಪ್ಪಿದ್ದಾರೆ ಎಂಬ ಮಾಹಿತಿ ದೊರೆತಿದೆ.

ಯುದ್ಧಪೀಡಿತ ಉಕ್ರೇನ್​ ಮತ್ತು ರಷ್ಯಾ ನಡುವೆ ನಿನ್ನೆ ಬೆಲಾರಸ್​​ನಲ್ಲಿ ಶಾಂತಿ ಮಾತುಕತೆ ನಡೆದಿದ್ದು ವಿಫಲವಾಗಿದ್ದು ಯುದ್ಧ ತೀವ್ರ ಸ್ವರೂಪ ಪಡೆದುಕೊಂಡಿದೆ.