ವ್ಯಾಟಿಕನ್ ಸಿಟಿ: ಕೊರೊನಾ ನಡುವೆ ಸಂಭ್ರಮದ ಕ್ರಿಸ್ಮಸ್ ಆಚರಣೆಗೆ ಬ್ರೇಕ್ ಬಿದ್ದಿದೆ. ವಿಶ್ವದ ಹಲವು ದೇಶಗಳು ಕ್ರಿಸ್ಮಸ್ ಆಚರಣೆ ಸರಳವಾಗಿಸಿದ್ದು, ಕೋವಿಡ್ ಹರಡದಂತೆ ಕ್ರಮ ವಹಿಸಿವೆ. ಈ ಹಿನ್ನೆಲೆ ರೋಮ್, ಇಟಲಿ ನಗರದಲ್ಲಿಯೂ ಆಚರಣೆಗೆ ಕಡಿವಾಣ ಬಿದ್ದಿದೆ.
ಕ್ರಿಸ್ಮಸ್ ವಾರದಲ್ಲಿ ಜನರಿಗೆ ಆಶೀರ್ವಾದ ಮಾಡುತ್ತಿದ್ದ ಪೋಪ್ ಫ್ರಾನ್ಸಿಸ್ ಈ ಬಾರಿ ಕೆಲವೇ ಮಂದಿಗಷ್ಟೇ ಚರ್ಚ್ ಮುಂಭಾಗ ಸೇರಲು ಅವಕಾಶ ನೀಡಿದ್ದಾರೆ. ಇಲ್ಲಿನ ಸೈಂಟ್ ಪೀಟರ್ ಚರ್ಚ್ನ ಕಿಟಿಕಿಯಿಂದ ಆಶೀರ್ವದಿಸಲು ನಿರ್ಧರಿಸಿದ್ದು, ಚರ್ಚ್ ಮುಂಭಾಗದ ಚೌಕದಲ್ಲಿ ಕೆಲವೇ ಮಂದಿಗಷ್ಟೇ ಅವಕಾಶ ಇರಲಿದೆ.
ಪ್ರತಿ ವರ್ಷ ಈ ಚರ್ಚ್ನ ಮುಂಭಾಗ ಲಕ್ಷಾಂತರ ಮಂದಿ ಸೇರಿರುತ್ತಿದ್ದರು. ಆದರೆ, ಕೊರೊನಾ ಹಿನ್ನೆಲೆಯಲ್ಲಿ ಯಾರು ಚರ್ಚ್ನ ಮುಂಭಾಗ ಬರದಂತೆ ಸೂಚಿಸಲಾಗಿದೆ. ಫ್ರಾನ್ಸಿಸ್ ಅಪೊಸ್ತೋಲಿಕ್ ಅರಮನೆಯ ಗ್ರಂಥಾಲಯದಿಂದ ಆಶೀರ್ವಾದವನ್ನು ನೀಡುವ ಬದಲು ಈ ಬಾರಿ ಡಿಜಿಟಲ್ ಮಾಧ್ಯಮದ ಮೊರೆ ಹೋಗುವ ಸಾಧ್ಯತೆಯೂ ಇದೆ.
ಇಟಲಿಯಲ್ಲಿ ವೈರಸ್ ಅಬ್ಬರ ಜೋರಾದಾಗ ಲಾಕ್ಡೌನ್ ವಿಧಿಸಲಾಗಿತ್ತು. ಈ ವೇಳೆ, ಪೋಪ್ ಜನರನ್ನು ಭೇಟಿಯಾಗಲು ಸಾಧ್ಯವಾಗದೇ ನನಗೆ ಪಂಜರದಲ್ಲಿರುವಂತಹ ಅನುಭವವಾಗುತ್ತಿದೆ ಎಂದಿದ್ದರು. ಇತ್ತೀಚಿಗೆ ಕೊರೊನಾ 2ನೇ ಅಲೆಯಲ್ಲಿಯೂ ಇಟಲಿಯಲ್ಲಿ ಸಾವು ನೋವು ಹೆಚ್ಚಾಗುತ್ತಿದ್ದು, ಸರ್ಕಾರದ ಪ್ರತಿ ಆದೇಶವನ್ನೂ ಪಾಲಿಸುವಂತೆ ಪೋಪ್ ಜನತೆಗೆ ಮನವಿ ಮಾಡಿದ್ದರು.
