ಲಂಡನ್: ಲ್ಯಾಂಬೋರ್ಗಿನಿ ಸ್ಫೋರ್ಟ್ಸ್ ಕಾರ್ ಅತ್ಯಂತ ಆಕರ್ಷಿತ ವಾಹನ. ಈ ಕಾರಿನ ಮೌಲ್ಯ ಸುಮಾರು 2 ಕೋಟಿಗೂ ಅಧಿಕವಿದೆ. ಕೋಟಿ - ಕೋಟಿ ಬೆಲೆಬಾಳುವ ಈ ಕಾರ್ನ್ನು ವ್ಯಕ್ತಿಯೊಬ್ಬ ಎಷ್ಟೋ ಆಸೆಯಿಂದ ಪಡೆದುಕೊಂಡಿದ್ದ. ಆದ್ರೆ ಶೋರೂಂನಿಂದ ಕಾರು ಪಡೆದ 20 ನಿಮಿಷಕ್ಕೆ ಅಪಘಾತ ಸಂಭವಿಸಿ ಆತನ ಕಣ್ಣೆದುರೇ ಕನಸಿನ ಕಾರು ನಜ್ಜಾಗಿರುವ ಘಟನೆ ಬ್ರಿಟನ್ನ ವೇಕ್ಫಿಲ್ಡ್ನಲ್ಲಿ ನಡೆದಿದೆ.
ಹೌದು, ವ್ಯಕ್ತಿಯೊಬ್ಬ ಗ್ರೇ ಕಲರ್ ಲ್ಯಾಂಬೋರ್ಗಿನಿ ಹರಿಕೇನ್ ಸ್ಪೈಡರ್ ಮಾಡೆಲ್ ಕಾರನ್ನು ಸುಮಾರು 2 ಕೋಟಿ ರೂ.ಗೆ ಖರೀದಿಸಿದ್ದಾನೆ. ಶೋರೂಂನಿಂದ ಕಾರ್ ಪಡೆದು ಕೆಲವೇ ಕ್ಷಣಗಳಲ್ಲಿ ತಾಂತ್ರಿಕ ದೋಷ ಕಂಡು ಬಂದಿದ್ದು, ಕೂಡಲೇ ಕಾರನ್ನು ರಸ್ತೆ ಬದಿಗೆ ನಿಲ್ಲಿಸಿ ಏನಾಗಿದೆ ಎಂದು ಪರಿಶೀಲಿಸುತ್ತಿದ್ದ. ಆದ್ರೆ ಹಿಂದಿನಿಂದ ಬಂದ ಮತ್ತೊಂದು ಕಾರು ಲ್ಯಾಂಬೋರ್ಗಿನಿ ಕಾರ್ಗೆ ಡಿಕ್ಕಿ ಹೊಡಿದಿದೆ.
ತಾನು ಮನಸಾರೆ ಇಷ್ಟಪಟ್ಟು ಖರೀದಿಸಿದ ಕಾರು ಕೇವಲ 20 ನಿಮಿಷಕ್ಕೆ ನಜ್ಜಾಗಿರುವುದು ಕಂಡು ಮಾಲೀಕ ಭಾವುಕನಾಗಿದ್ದಾನೆ. ಇನ್ನು ಕಾರು ಡಿಕ್ಕಿ ಹೊಡೆದ ವೇಗಕ್ಕೆ ಲ್ಯಾಂಬೋರ್ಗಿನಿ ಕಾರಿನ ಹಿಂಬದಿ ಸಂಪೂರ್ಣ ನಜ್ಜುಗುಜ್ಜಾಗಿದೆ. ಬಳಿಕ ಕಾರಿನ ಮಾಲೀಕ ಪೊಲೀಸರಿಗೆ ಮಾಹಿತಿ ಮುಟ್ಟಿಸಿದ್ದಾನೆ. ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
ಇನ್ನು ಪೊಲೀಸರು ಈ ಕಾರಿನ ಫೋಟೋ ತೆಗೆದು ಸಾಮಾಜಿಕ ಜಾಲತಾಣದಲ್ಲಿ ಹರಿಯಬಿಟ್ಟಿದ್ದು, ಕಾರಿನ ಫೋಟೋ ನೋಡಿದ ನೆಟ್ಟಿಗರು ದುರಾದೃಷ್ಟ ಎಂದು ಕಮೆಂಟ್ ಮಾಡಿದ್ದಾರೆ.
