ಕೋವಿಡ್​ ಪತ್ತೆ ಹಚ್ಚಲು ಕಂಪ್ಯೂಟರ್​ ಮಾದರಿಯನ್ನು ವಿನ್ಯಾಸಗೊಳಿಸಿದ ವಿದ್ಯಾರ್ಥಿಗಳ ತಂಡ

ಇಡೀ ಜಗತ್ತು ಕೊರೊನಾ ವೈರಸ್​​ ವಿರುದ್ಧ ಸಮರ ಸಾರುತ್ತಿರುವ ಈ ಸಂದರ್ಭದಲ್ಲಿ ಇಂಗ್ಲೆಂಡಿನ ವಿದ್ಯಾರ್ಥಿಗಳ ತಂಡವೊಂದು ಕೋವಿಡ್​ ಪತ್ತೆ ಹಚ್ಚುವ ಕಂಪ್ಯೂಟರ್​ ಮಾದರಿಯನ್ನು ವಿನ್ಯಾಸಗೊಳಿಸಿದೆ. ಇದು ಎಕ್ಸ್​ರೇ ಮೂಲಕ ಸೋಂಕು ಪತ್ತೆ ಹಚ್ಚಲಿದೆ.

ಲಂಡನ್​: ಯುಕೆಯ ಕ್ರಾನ್ಫೀಲ್ಡ್ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳ ತಂಡವೊಂದು ಎಕ್ಸ್​​ರೇ ಮೂಲಕ ಕೋವಿಡ್​-19 ಪತ್ತೆ ಹಚ್ಚುವ ಕಂಪ್ಯೂಟರ್ ಮಾದರಿಯನ್ನು ವಿನ್ಯಾಸಗೊಳಿಸಿದೆ.

ವರದಿಗಳ ಪ್ರಕಾರ, ಈ ಮಾದರಿಯು ಸಾಮಾನ್ಯವಾಗಿ ಬರಿಗಣ್ಣಿನಿಂದ ಗುರುತಿಸಲಾಗದ ಮಾಹಿತಿಯನ್ನು ನಿರ್ಣಯಿಸಿ ಕೊರೊನಾ ಸೋಂಕು ತಗುಲಿದೆಯೋ ಇಲ್ಲವೋ ಎಂಬುದನ್ನು ಪತ್ತೆ ಹಚ್ಚುತ್ತದೆ. ಎದೆಯ ಎಕ್ಸ್​ರೇಯನ್ನು ಆರ್ಟಿಫಿಶಿಯಲ್ ಇಂಟಲಿಜೆನ್ಸ್​ (ಎಐ) ಮೂಲಕ ವಿಶ್ಲೇಷಿಸಿ ಸೋಂಕು ಪತ್ತೆ ಹಚ್ಚುತ್ತದೆ.

ಎಐ ಮೂಲಕ ಮೊದಲು ಎಕ್ಸ್​ರೇ ಸಹಾಯದಿಂದ ನ್ಯುಮೋನಿಯಾ ಪತ್ತೆ ಹಚ್ಚುವ ಈ ಮಾದರಿಯೂ, ಬಳಿಕ ಎರಡನೇ ಹಂತವಾದ ಕೋವಿಡ್​ ಪಾಸಿಟಿವ್ ಕಂಡು ಹಿಡಿಯಲಿದೆ. ಕ್ರಾನ್ಫೀಲ್ಡ್ ವಿಶ್ವವಿದ್ಯಾಲಯದ ಎಂಎಸ್ಸಿ ವಿದ್ಯಾರ್ಥಿಗಳಿಗೆ ನೀಡಿದ ಪ್ರಾಜೆಕ್ಟ್​ ಕೆಲಸವನ್ನು ಸವಾಲಾಗಿ ಸ್ವೀಕರಿಸಿದ ವಿದ್ಯಾರ್ಥಿಗಳ ತಂಡ ಈ ಹೊಸ ಮಾದರಿಯನ್ನು ವಿನ್ಯಾಸಗೊಳಿಸಿದೆ.