ವಾಷಿಂಗ್ಟನ್: ಇಂಡೋ - ಪೆಸಿಫಿಕ್ ಮಹಾಸಾಗರದ ಮೇಲೆ ಹಿಡಿತ ಸಾಧಿಸಲು ಅಮೆರಿಕ - ಚೀನಾ ನಡುವೆ ಮಹಾ ಶೀತಲ ಸಮರ ಏರ್ಪಟ್ಟಿದೆ. ಅಮೆರಿಕ ಇಂಗ್ಲೆಂಡ್ - ಆಸ್ಟ್ರೇಲಿಯಾ ಜತೆಗೂಡಿ ಚೀನಾ ಕಟ್ಟಿ ಹಾಕಲು ಜಂಟಿ ಕಾರ್ಯಾಚರಣೆ ಮಾಡ್ತಿದೆ.
ಅಮೆರಿಕ ಜತೆ ಭಾರತ ಕೈಜೋಡಿಸಿರುವುದರಿಂದ ಚೀನಾ ಕಣ್ಣು ಕೆಂಪಗಾಗಿದೆ. ಇನ್ನು ಅಮೆರಿಕ - ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ಜತೆಗೂ ಮಹತ್ವದ ಒಪ್ಪಂದ ಮಾಡಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಚೀನಾ ಶೀತಲ ಸಮರದ ಮನಸ್ಥಿತಿಗೆ ತಲುಪಿರುವುದರ ಬಗ್ಗೆ ಅಮೆರಿಕಕ್ಕೆ ಎಚ್ಚರಿಕೆ ಸಂದೇಶ ನೀಡಿದೆ. ಅಮೆರಿಕ- ಬ್ರಿಟನ್ ಮತ್ತು ಆಸ್ಟ್ರೇಲಿಯಾ ಹೊಸ ಭದ್ರತಾ ಮೈತ್ರಿ ಘೋಷಿಸಿದ ವಾರಗಳ ನಂತರ ಆಸ್ಟ್ರೇಲಿಯಾ ಪರಮಾಣು ಜಲಾಂತರ್ಗಾಮಿ ನೌಕೆಗಳನ್ನು ನಿರ್ಮಿಸಲು ಸನ್ನದ್ಧವಾಗಿರುವುದು ಚೀನಾಕ್ಕೆ ಸರಿ ಕಂಡಿಲ್ಲ. ಹೀಗಾಗಿ ಅದು ಅಮೆರಿಕ - ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವಣ ಒಪ್ಪಂದವನ್ನು ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ಕಟುವಾಗಿ ಟೀಕಿಸಿದ್ದಾರೆ.
ನ್ಯೂಜಿಲ್ಯಾಂಡ್ನಲ್ಲಿ ಆಯೋಜಿಸಿರುವ ಏಷ್ಯಾ ಪೆಸಿಫಿಕ್ ಎಕಾನಮಿಕ್ ಕೋ ಆಪರೇಷನ್ ಫೋರಂ ನ ಸಿಇಒ ಶೃಂಗಸಭೆಗೂ ಮುನ್ನ ಮಾತನಾಡಿದ ಚೀನಾ ಅಧ್ಯಕ್ಷ ಕ್ಸಿ ಈ ಅಸಮಾಧಾನ ಹೊರಹಾಕಿದ್ದಾರೆ. ಇದೇ ವೇಳೆ, ಶನಿವಾರ ಅವರು ಅಧ್ಯಕ್ಷ ಜೋ ಬೈಡನ್ ಸೇರಿದಂತೆ ಇತರ ಪೆಸಿಫಿಕ್ ರಿಮ್ ನಾಯಕರೊಂದಿಗೆ ಆನ್‌ಲೈನ್ ಸಭೆಯಲ್ಲಿ ಭಾಗವಹಿಸಲು ನಿರ್ಧರಿಸಿದ್ದಾರೆ.
ಏಷ್ಯಾ ಪೆಸಿಫಿಕ್ ಸಭೆಯಲ್ಲಿ ಮಾತನಾಡಿರುವ ಅವರು, ಸೈದ್ಧಾಂತಿಕ ಅಥವಾ ಭೌಗೋಳಿಕ ರಾಜಕೀಯದ ಮೂಲಕ ಪ್ರದೇಶದಲ್ಲಿ ಗಡಿಗಳನ್ನು ಸೆಳೆಯುವ ಪ್ರಯತ್ನಗಳು ವಿಫಲಗೊಳ್ಳಲಿವೆ ಎನ್ನುವ ಮೂಲಕ ಅಮೆರಿಕದ ವಿರುದ್ಧ ಪರೋಕ್ಷವಾಗಿ ವಾಗ್ದಾಳಿ ನಡೆಸಿದ್ದಾರೆ.
ಇದೇ ವೇಳೆ, "ಏಷ್ಯಾ-ಪೆಸಿಫಿಕ್ ಪ್ರದೇಶವು ಶೀತಲ ಸಮರ ಯುಗಕ್ಕೆ ಮರಳುವಂತಾಗಬಾರದು ಮತ್ತು ವಿಭಜನೆಗೆ ಅವಕಾಶ ನೀಡಬಾರದು ಎಂದು ಚೀನಾ ಅಧ್ಯಕ್ಷರು ಪ್ರತಿಪಾದಿಸಿದ್ದಾರೆ. ಈ ಭಾಗದ "ಆರ್ಥಿಕ ಅಭಿವೃದ್ಧಿಗೆ ಪೂರಕವಾಗುವಂತೆ ಚೀನಾ ಸುಧಾರಣೆ ತರುವಲ್ಲಿ ಮಹತ್ವದ ಪಾತ್ರ ನಿರ್ವಹಿಸುತ್ತದೆ ಎಂದು ಕ್ಸಿ ಇದೇ ವೇಳೆ ಪುನರುಚ್ಚರಿಸಿದ್ದಾರೆ.
