ಲಾಹೋರ್: ಕಳೆದ ವರ್ಷ ಆಗಸ್ಟ್ನಲ್ಲಿ ಆಕಸ್ಮಿಕವಾಗಿ ಪಾಕ್ ಗಡಿಯೊಳಗೆ ಪ್ರವೇಶಿಸಿದ್ದ ಭಾರತದ 16ರ ಬಾಲಕ ನಿನ್ನೆ ವಾಘಾ ಗಡಿ ಮೂಲಕ ಸುರಕ್ಷಿತವಾಗಿ ಹಿಂದಿರುಗಿದ್ದಾನೆ.
ಅಸ್ಸೋಂ ಮೂಲದ ಬಿಮಾನ್ ವಾರ್ಜಿ ಎಂಬ ಬಾಲಕ ಪಾಕ್ ಗಡಿಯೊಳಗೆ ಆಕಸ್ಮಿವಾಗಿ ಪ್ರವೇಶಿಸಿದ್ದ. ಅಲ್ಲಿನ ಕಾನೂನು ಪ್ರಕಾರ ವಿಚಾರಣೆ ಹಾಗೂ ಪರಿಶೀಲನೆ ನಡೆಸಿದ ಪಾಕ್ ರೇಂಜರ್ಗಳು, ಭಾರತದ ಬಾರ್ಡರ್ ಸೆಕ್ಯುರಿಟಿ ಪೋರ್ಸ್ಗೆ ಹಸ್ತಾಂತರಿಸಿದ್ದಾರೆ.
ಕಳೆದ ವರ್ಷ ಡಿಸೆಂಬರ್ 26ರಂದು ಭಾರತ ಸಹ ಇಲ್ಲಿನ ಜೈಲಿನಲ್ಲಿದ್ದ ಪಾಕ್ನ ಮೊಹ್ಮದ್ ಇಮ್ರಾನ್ ಕುರೇಶಿ ವರ್ಸಿ ಹಾಗೂ ಅಬ್ದುಲ್ ಎಂಬುವರನ್ನು ಅತ್ತಾರಿ-ವಾಘಾ ಗಡಿ ಮೂಲಕ ಹಸ್ತಾಂತರಿಸಲಾಗಿತ್ತು. ಅಬ್ದುಲ್, ಬಾಲಿವುಡ್ ನಟ ಶಾರೂಕ್ ಖಾನ್ರನ್ನು ಭೇಟಿಯಾಗಲು ಬಂದು, ಸಾಧ್ಯವಾಗದೆ ಪಾಕ್ಗೆ ಹಿಂದಿರುಗುವಾಗ ಬಂಧಿತನಾಗಿದ್ದ.
ವರ್ಸಿ 2003ರಲ್ಲಿ ಇಲ್ಲಿಗೆ ಬಂದವನು, ನಾಲ್ಕು ವರ್ಷಗಳ ಕಾಲ ವೀಸಾ ಅವಧಿ ಮುಗಿದರೂ ವಾಸವಿದ್ದ. ಈ ಮಧ್ಯೆ ಭಾರತೀಯಳನ್ನೂ ಈತ ಮದುವೆಯಾಗಿದ್ದ. 2008ರಲ್ಲಿ ಅಧಿಕೃತ ರಹಸ್ಯ ಕಾಯ್ದೆ ಹಾಗೂ ಪಾಸ್ಪೋರ್ಟ್ ಕಾಯ್ದೆಯಂತೆ ಈತನಿಗೆ ಜೈಲು ಶಿಕ್ಷೆ ವಿಧಿಸಲಾಗಿತ್ತು.
