ಕಾಬೂಲ್(ಅಫ್ಘಾನಿಸ್ತಾನ): ಕಳೆದು ತಿಂಗಳು ನಡೆದ ತಾಲಿಬಾನ್ ಮತ್ತು ಅಮೆರಿಕ ನಡುವಿನ ಕದನ ವಿರಾಮದ ಶಾಂತಿ ಒಪ್ಪಂದದ ಒಂದು ಭಾಗವಾದ ತಾಲಿಬಾನ್ ಕೈದಿಗಳ ಬಿಡುಗಡೆಗೆ ಅಫ್ಘಾನ್ ಅಧ್ಯಕ್ಷ ಅಶ್ರಫ್ ಘನಿ ಮಂಗಳವಾರ ಸಹಿ ಹಾಕಿದ್ದಾರೆ.
ಅಮೆರಿಕ ಮತ್ತು ತಾಲಿಬಾನ್ ಒಪ್ಪಂದದಲ್ಲಿ, ತಾಲಿಬಾನ್ ಕೈದಿಗಳ ಬಿಡುಗಡೆ ಬಗ್ಗೆ ಉಲ್ಲೇಖಿಸಲಾಗಿತ್ತು. ಈ ನಿಟ್ಟಿನಲ್ಲಿ ಅನುಕೂಲವಾಗುವಂತಹ ಬಹುನಿರೀಕ್ಷಿತ ಸುಗ್ರೀವಾಜ್ಞೆಗೆ ಅಫ್ಘಾನ್ ಅಧ್ಯಕ್ಷ ಅಶ್ರಫ್ ಘನಿ ಸಹಿ ಹಾಕಿರುವುದರಿಂದ ಸದ್ಯದಲ್ಲೇ ತಾಲಿಬಾನ್ ಖೈದಿಗಳು ಜೈಲಿನಿಂದ ಬಿಡುಗಡೆ ಹೊಂದಲಿದ್ದಾರೆ.
ಇನ್ನು ಈ ಪ್ರಕಟಣೆ ನೀಡಿದ ಘನಿಯ ವಕ್ತಾರ ಸೆಡಿಕ್ ಸೆಡಿಕ್ಕಿ, ಈ ಬಗೆಗಿನ ವಿವರಗಳನ್ನು ಬುಧವಾರ ನೀಡುವುದಾಗಿ ನಿನ್ನೆ ತಿಳಿಸಿದ್ದರು. ಈ ಹಿಂದೆಯೇ ತಾಲಿಬಾನ್, ತನ್ನ ಸಂಘಟನೆಯ ಕಾರ್ಯಕರ್ತರನ್ನು ಬಿಡುಗಡೆಗೊಳಿಸಲು ಬೇಡಿಕೆ ಇಟ್ಟಿತ್ತು. ಆದರೆ, ಈ ಬೇಡಿಕೆಯನ್ನು ಅಫ್ಘಾನಿನ ಅಧ್ಯಕ್ಷರು ತಿರಸ್ಕರಿಸಿದ್ದರು. ಪ್ರಸ್ತುತ ದಿನದಲ್ಲಿ ತಾಲಿಬಾನ್ ಖೈದಿಗಳನ್ನು ಬಿಡುಗಡೆಗೊಳಿಸಲು ಅಫ್ಘಾನ್ ಅಧ್ಯಕ್ಷ ಘನಿ ಸಹಿ ಹಾಕಿರುವುದು, ತಾಲಿಬಾನ್ ಸಂಘಟನೆಗೆ ತೀವ್ರ ಸಂತಸ ತಂದಿದೆ.
ಅಫ್ಘಾನ್ ಪಡೆಗಳ ಮೇಲೆ ತಾಲಿಬಾನ್ ಹಲವಾರು ಬಾರಿ ದಾಳಿ ನಡೆಸಿದ್ದರಿಂದ ಈ ಹಿಂದೆ ತಾಲಿಬಾನ್ ಖೈದಿಗಳನ್ನು ಅಫ್ಘಾನ್ ಸರ್ಕಾರ ಬಿಡುಗಡೆಗೊಳಿಸಲು ಒಪ್ಪರಲಿಲ್ಲ. ಆದರೆ ಇದೀಗ ಅಮೆರಿಕ ಮತ್ತು ತಾಲಿಬಾನ್ ನಡುವೆ ಫೆ.29ರಂದು ನಡೆದ ಶಾಂತಿ ಒಪ್ಪಂದದಿಂದ ಈ ಕಾರ್ಯ ಸಾಧ್ಯವಾಗಿದ್ದು, ಮಾರ್ಚ್ 10ರ ಹೊತ್ತಿಗೆ 5000 ತಾಲಿಬಾನ್ ಖೈದಿಗಳನ್ನು ಬಿಡುಗಡೆಗಳೊಸಲಾಗುವುದು ಎಂದು ಮೂಲಗಳು ತಿಳಿಸಿವೆ.
