ನವದೆಹಲಿ: ಇಡೀ ಜಗತ್ತೇ ಕೋವಿಡ್ ವಿರುದ್ಧ ಹೋರಾಡುತ್ತಿದೆ. ಇಂಥ ಸಂದರ್ಭದಲ್ಲಿ ಇತರೆ ದೇಶಗಳಿಗೆ ನೆರವಿನ ಹಸ್ತ ಚಾಚಿರುವ ಅಮೆರಿಕ, ಕಡಿಮೆ ಮತ್ತು ಮಧ್ಯಮ ಆದಾಯ ಹೊಂದಿರುವ ಹಾಗೂ ಆಫ್ರಿಕನ್ ಒಕ್ಕೂಟದ 92 ದೇಶಗಳಿಗೆ ಫೈಜರ್‌ ಕಂಪನಿಯ ಕೋವಿಡ್ ಲಸಿಕೆಯ 50 ಕೋಟಿ ಡೋಸ್‌ಗಳನ್ನು ನೀಡಲು ಮುಂದಾಗಿದೆ. ಆಗಸ್ಟ್‌ನಲ್ಲಿ ಲಸಿಕೆ ಪೂರೈಕೆಗೆ ಚಾಲನೆ ನೀಡಲಾಗುತ್ತದೆ. ಈ ವರ್ಷಾಂತ್ಯಕ್ಕೆ 20 ಕೋಟಿ ಡೋಸ್ ಪೂರೈಸಲಾಗುವುದು. ಉಳಿದ 30 ಕೋಟಿ ಡೋಸ್‌ಗಳನ್ನು ಮುಂದಿನ ವರ್ಷದ ಮೊದಲಾರ್ಧದ ವೇಳೆಗೆ ಪೂರೈಸಲಾಗುವುದು ಎಂದು ಶ್ವೇತಭವನ ತಿಳಿಸಿದೆ.
ವಿವಿಧ ದೇಶಗಳಿಗೆ ಉಚಿತವಾಗಿ ನೀಡುವ ಸಂಬಂಧ ಒಂದು ದೇಶ ಈವರೆಗೆ ಮಾಡಲಿರುವ ಗರಿಷ್ಠ ಪ್ರಮಾಣದ ಲಸಿಕೆಯ ಖರೀದಿ ಇದಾಗಿದೆ. ಇದು ಕೋವಿಡ್ನಿಂದ ವಿವಿಧ ರಾಷ್ಟ್ರಗಳ ಜನರನ್ನು ರಕ್ಷಿಸುವುದಕ್ಕೆ ಸಂಬಂಧಿಸಿ ಅಮೆರಿಕದ ಜನತೆಯ ಬದ್ಧತೆಯನ್ನು ತೋರುತ್ತದೆ ಎಂದೂ ಶ್ವೇತಭವನ ಹೇಳಿದೆ.
ಬಡ ರಾಷ್ಟ್ರಗಳಿಗೆ ಕೋವಿಡ್ ಲಸಿಕೆ ಪೂರೈಸುವ ಈ ಕಾರ್ಯದಲ್ಲಿ ಕೈಜೋಡಿಸುವಂತೆ ವಿಶ್ವದ ವಿವಿಧ ದೇಶಗಳಿಗೆ ಬೈಡನ್ ಅವರು ಶೃಂಗಸಭೆಯಲ್ಲಿ ಮನವಿ ಮಾಡಲಿದ್ದಾರೆ. ಕೋವಿಡ್ ಪಿಡುಗನ್ನು ನಿರ್ಮೂಲನೆ ಮಾಡಿ, ಅಮೂಲ್ಯ ಜೀವಗಳನ್ನು ಉಳಿಸುವುದೇ ಲಸಿಕೆಯನ್ನು ಉಚಿತವಾಗಿ ನೀಡುವ ಉದ್ದೇಶವಾಗಿದೆ ಎಂದೂ ತಿಳಿಸಿದೆ.
ಇದನ್ನೂ ಓದಿ: ಒಂದು ಬಿಲಿಯನ್ ಕೋವಿಡ್ ಲಸಿಕೆ ನೀಡಲು ಜಿ-7 ರಾಷ್ಟ್ರಗಳು ಮುಂದೆ ಬರಲಿವೆ : ಯುಕೆ
ಅಲ್ಲದೆ, ಬೈಡನ್ ನೇತೃತ್ವದ ಯುಎಸ್ ಆಡಳಿತವು ಭಾರತಕ್ಕೆ ಸಹಾಯ ಮಾಡುವಲ್ಲಿ ಜಾಗತಿಕವಾಗಿ ಮುಂಚೂಣಿಯಲ್ಲಿದೆ.
