ವಾಷಿಂಗ್ಟನ್ ಡಿಸಿ (ಯುಎಸ್ಎ): ಆಸ್ಪತ್ರೆಗಳಲ್ಲಿ ದಾಖಲಾಗದ ಸೌಮ್ಯ ಹಾಗೂ ಮಧ್ಯಮ ರೋಗಲಕ್ಷಣ ಹೊಂದಿರುವ ರೋಗಿಗಳಿಗೆ ಅಮೆರಿಕಾದ ಔಷಧೀಯ ಕಂಪನಿ ಎಲಿ ಲಿಲ್ಲಿಯ ಪ್ರಾಯೋಗಿಕ ಕೋವಿಡ್-19 ಪ್ರತಿಕಾಯ 'ಬಮ್ಲಾನಿವಿಮಾಬ್'ವನ್ನು ಚಿಕಿತ್ಸೆಗೆ ಬಳಸಲು ಅನುಮೋದನೆ ಸಿಕ್ಕಿದೆ.
ಇದರ ತುರ್ತು ಬಳಕೆಯ ಅಧಿಕಾರವನ್ನು (ಇಡಿಎ) ಯುಎಸ್ ಆಹಾರ ಮತ್ತು ಔಷಧ ಆಡಳಿತ (ಎಫ್ಡಿಎ) ಅನುಮೋದಿಸಿದೆ.
"ಬಾಮ್ಲನಿವಿಮಾಬ್‌ನ ಬಳಕೆಯ ತುರ್ತು ಅಧಿಕಾರವು ಆರೋಗ್ಯ ವೃತ್ತಿಪರರು ಮತ್ತು ಕೋವಿಡ್-19 ರೋಗಿಗಳಿಗೆ ಮತ್ತೊಂದು ಸಂಭಾವ್ಯ ಸಾಧನವನ್ನು ಒದಗಿಸುತ್ತದೆ" ಎಂದು ಎಫ್‌ಡಿಎಯ ಔಷಧ ಮೌಲ್ಯಮಾಪನ ಮತ್ತು ಸಂಶೋಧನಾ ಕೇಂದ್ರದ ಕಾರ್ಯಕಾರಿ ನಿರ್ದೇಶಕ ಪ್ಯಾಟ್ರಿಜಿಯಾ ಕವಾಝೋನಿ ಹೇಳಿದರು.
ವಯಸ್ಕರು ಮತ್ತು 12 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಮತ್ತು ಆಸ್ಪತ್ರೆಗೆ ದಾಖಲಾಗಲು ಅಗತ್ಯವಿಲ್ಲದ ಸೌಮ್ಯ ಹಾಗೂ ಮಧ್ಯಮ ಕೋವಿಡ್-19 ಲಕ್ಷಣಗಳಿರುವ ಪ್ರಕರಣಗಳಿಗೆ ಈ ಔಷಧಿ ಪರಿಣಾಮಕಾರಿಯಾಗಬಹುದು ಎಂದು ಎಫ್ಡಿಎ ಅಭಿಪ್ರಾಯಪಟ್ಟಿದೆ.
ಕೊರೊನಾ ವೈರಸ್ ವಿರುದ್ಧದ ಹೋರಾಟದಲ್ಲಿ ಎಫ್ಡಿಎ ನಿರ್ಧಾರವು ಒಂದು ಪ್ರಮುಖ ಬೆಳವಣಿಗೆಯಾಗಿದೆ ಎಂದು ಎಲಿ ಲಿಲ್ಲಿ ಮತ್ತು ಕಂಪನಿ ಹೇಳಿದೆ.
ಯುಎಸ್ ಸರ್ಕಾರ ಮತ್ತು ಸ್ಥಳೀಯ ಸರ್ಕಾರದ ನಿರ್ದೇಶನದಂತೆ ಕಂಪನಿಯು ಈಗ ಅಧಿಕೃತ ವಿತರಕರೊಂದಿಗೆ ಹೊಸ ಚಿಕಿತ್ಸೆಯನ್ನು ನೀಡಲಿದೆ ಎಂದು ಎಫ್ಡಿಎ ತಿಳಿಸಿದೆ.
