ವಾಷಿಂಗ್ಟನ್‌: ಸದಾ ಒಂದಿಲ್ಲೊಂದು ರೀತಿಯಲ್ಲಿ ಸುದ್ದಿಯಲ್ಲಿರುವ ಸಾಮಾಜಿಕ ಜಾಲತಾಣ ದೈತ್ಯ ಸಂಸ್ಥೆ ಫೇಸ್‌ಬುಕ್‌(ಮೆಟಾ) ವಿರುದ್ಧ ದ್ವೇಷದ ಭಾಷಣ ಹರಡುವ ಪೋಸ್ಟ್‌ಗಳ ವಿರುದ್ಧ ಕ್ರಮ ಕೈಗೊಳ್ಳದ ಆರೋಪ ಕೇಳಿಬಂದಿದೆ.
ಮ್ಯಾನ್ಮಾರ್‌ನ ರೋಹಿಂಗ್ಯಾ ನಿರಾಶ್ರಿತರ ಹಿಂಸಾಚಾರಕ್ಕೆ ಕಾರಣವಾದ ರೋಹಿಂಗ್ಯಾ ವಿರೋಧಿ ದ್ವೇಷ ಭಾಷಣದ ವಿರುದ್ಧ ಕ್ರಮ ಕೈಗೊಂಡಿಲ್ಲವೆಂದು ಫೇಸ್‌ಬುಕ್‌ ವಿರುದ್ಧ 150 ಬಿಲಿಯನ್‌ ಡಾಲರ್‌ ಪರಿಹಾರದ ಮೊಕದ್ದಮೆ ದಾಖಲಿಸಲಾಗಿದೆ. ಎಡೆಲ್ಸನ್ ಪಿಸಿ ಹಾಗೂ ಫೀಲ್ಡ್ಸ್ ಪಿಎಲ್‌ಎಲ್‌ಸಿ ಎಂಬೆರಡು ಕಾನೂನು ಸಂಸ್ಥೆಗಳು ಕಳೆದ ಸೋಮವಾರ ಕ್ಯಾಲಿಫೋರ್ನಿಯಾದಲ್ಲಿ ದೂರು ದಾಖಲಿಸಿವೆ.
ಫೇಸ್‌ಬುಕ್‌ನಲ್ಲಿ ರೋಹಿಂಗ್ಯಾ ಮತ್ತು ಇತರ ಮುಸ್ಲಿಮರ ಮೇಲೆ ಆಕ್ರಮಣ ಮಾಡುವ ಪೋಸ್ಟ್‌ಗಳು, ಕಾಮೆಂಟ್‌ಗಳು ಹಾಗೂ ಚಿತ್ರಗಳ 1,000ಕ್ಕೂ ಹೆಚ್ಚು ಉದಾಹರಣೆಗಳಿವೆ ಎಂದು ಅಮೆರಿಕಾದಲ್ಲಿ ಸಲ್ಲಿಕೆಯಾಗಿರುವ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಪ್ರಾಣಿಗಳಿಗೆ ಹೋಲಿಸುವುದಕ್ಕೆ ನಿರ್ಬಂಧ
ಹಿಂಸಾತ್ಮಕ ಅಥವಾ ಅಮಾನವೀಯ ಭಾಷಣದಿಂದ ಜನಾಂಗೀಯ ಗುಂಪುಗಳ ಮೇಲೆ ಆಕ್ರಮಣ ಮಾಡುವುದು ಅಥವಾ ಪ್ರಾಣಿಗಳಿಗೆ ಹೋಲಿಸುವುದನ್ನು ನಿರ್ದಿಷ್ಟವಾಗಿ ನಿಷೇಧಿಸುವ ಫೇಸ್‌ಬುಕ್‌ ನಿಯಮಗಳ ಹೊರತಾಗಿಯೂ ಇಂತಹ ಪೋಸ್ಟ್‌ಗಳನ್ನು ಹರಿಬಿಡಲಾಗುತ್ತಿದೆ.
ಮತ್ತೊಂದೆಡೆ, ಲಂಡನ್‌ನಲ್ಲಿರುವ ಫೇಸ್‌ಬುಕ್‌ ಕಚೇರಿಗೆ ಬ್ರಿಟಿಷ್ ವಕೀಲರು ಸಹ ನೋಟಿಸ್ ಕಳುಹಿಸಿದ್ದಾರೆ. ಕೇಸ್‌ ದಾಖಲಿಸಿರುವ ಬಗ್ಗೆ ಫೇಸ್‌ಬುಕ್‌ ಈವರೆಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಕಂಪನಿಯು ಮ್ಯಾನ್ಮಾರ್‌ನಲ್ಲಿ ತಪ್ಪು ಮಾಹಿತಿ, ದ್ವೇಷದ ಪೋಸ್ಟ್‌ಗಳನ್ನು ತಡೆಯುವಲ್ಲಿ ವಿಳಂಬ ನೀತಿ ಅನುಸರಿಸಿದೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: ಒಮಿಕ್ರಾನ್‌ ಪತ್ತೆಯಾದ ದಕ್ಷಿಣ ಆಫ್ರಿಕಾಗೆ ನೇರ ವಿಮಾನ ಸೇವೆ ನಿರ್ಬಂಧ ಬೇಸರ ತಂದಿದೆ - ವಿಶ್ವ ಆರೋಗ್ಯ ಸಂಸ್ಥೆ
