ಲಿಮಾ: ಉತ್ತರ ಪೆರುವಿನಲ್ಲಿ ಭಾನುವಾರ 7.5 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ಚರ್ಚ್ ಟವರ್ ಸೇರಿದಂತೆ ಸುಮಾರು 75 ಮನೆಗಳು ನೆಲಸಮಗೊಂಡಿವೆ. ಈ ದುರ್ಘಟನೆಯಲ್ಲಿ ಕನಿಷ್ಠ 10 ಜನರು ಗಾಯಗೊಂಡಿದ್ದಾರೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
ಪೆರುವಿನ ಜಿಯೋಫಿಸಿಕಲ್ ಇನ್‌ಸ್ಟಿಟ್ಯೂಟ್ ಪ್ರಕಾರ, 131 ಕಿಲೋಮೀಟರ್ (81 ಮೈಲಿಗಳು) ಆಳದಲ್ಲಿ ಬೆಳಗ್ಗೆ 5.52 (10:52 am GMT) ಕ್ಕೆ ಪ್ರಬಲ ಭೂಕಂಪ ಸಂಭವಿಸಿದೆ. ಈ ಭೂಕಂಪನದಲ್ಲಿ ಕನಿಷ್ಠ 10 ಜನರು ಗಾಯಗೊಂಡಿದ್ದು, ಸುಮಾರು 75 ಮನೆಗಳು ಉರುಳಿ ಬಿದ್ದಿವೆ. ಕೆಲವರು ಅವಶೇಷಗಳಡಿ ಸಿಲುಕಿರುವ ಶಂಕೆ ವ್ಯಕ್ತವಾಗಿದ್ದು, ಕಾರ್ಯಾಚರಣೆ ಸಾಗುತ್ತಿದೆ ಎಂದು ನಾಗರಿಕ ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದಾರೆ.
ಭೂಕಂಪನವು ನೆರೆ ಪ್ರದೇಶ ಈಕ್ವೆಡಾರ್‌ನಲ್ಲಿಯೂ ಹಾನಿಯನ್ನುಂಟುಮಾಡಿದೆ. ಪೆರುವಿಯನ್ ಅಮೆಜಾನ್‌ನಲ್ಲಿನ ಸಾಂಟಾ ಮಾರಿಯಾ ಡಿ ನೀವಾದಿಂದ ಪೂರ್ವಕ್ಕೆ 98 ಕಿಲೋಮೀಟರ್‌ಗಳಷ್ಟು ದೂರದಲ್ಲಿ ಕೇಂದ್ರ ಬಿಂದುವಾಗಿದೆ. ಇದು ಅಮೆಜೋನಿಯನ್ ಸ್ಥಳೀಯ ಜನರು ವಾಸಿಸುವ ವಿರಳ ಜನಸಂಖ್ಯೆಯ ಪ್ರದೇಶವಾಗಿದೆ.
ಭೂಕಂಪನದಿಂದ ಅಮೆಜಾನ್‌ನ ಲಾ ಜಲ್ಕಾ ಜಿಲ್ಲೆಯಲ್ಲಿ ವಸಾಹತುಶಾಹಿ ಯುಗದ ಚರ್ಚ್‌ನ 14 ಮೀಟರ್ ಗೋಪುರವು ಕುಸಿದಿದೆ. ವ್ಯಾಪಕ ವಿದ್ಯುತ್ ಕಡಿತವಾಗಿದೆ. ಕಂಪನದಿಂದಾಗಿ ರಸ್ತೆಗಳ ಮೇಲೆ ಬೃಹದಾಕಾರದ ಬಂಡೆಗಳು ಬಿದ್ದಿವೆ. ಇದರ ವಾಹನ ಸವಾರರು ಪರದಾಡುವಂತಹ ಸ್ಥಿತಿ ನಿರ್ಮಾಣವಾಗಿದೆ.
ಕರಾವಳಿ ಮತ್ತು ಆಂಡಿಯನ್ ಪ್ರದೇಶಗಳು ಹಾಗು ರಾಜಧಾನಿ ಲಿಮಾ ಸೇರಿದಂತೆ ದೇಶದ ಅರ್ಧದಷ್ಟು ಭಾಗದಲ್ಲಿ ಭೂಕಂಪದ ಅನುಭವವಾಗಿದೆ. ಸಂಬಂಧಿತ ಸಚಿವಾಲಯಗಳಿಗೆ ತಕ್ಷಣ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಪೆರುವಿಯನ್ ಅಧ್ಯಕ್ಷ ಪೆಡ್ರೊ ಕ್ಯಾಸ್ಟಿಲ್ಲೊ ಆದೇಶಿಸಿದ್ದಾರೆ.
ಭೂಕಂಪನದ ದಕ್ಷಿಣಕ್ಕೆ 1,000 ಕಿಲೋಮೀಟರ್‌ಗಿಂತಲೂ ಹೆಚ್ಚು ದೂರದಲ್ಲಿರುವ ಲಿಮಾದಲ್ಲಿ ಭೂಮಿ ನಡುಕವು ಸಂಭವಿಸಿದೆ. ಭೂಮಿ ಕಂಪಿಸಿದ ಹಿನ್ನೆಲೆ ಲಿಮಾದಲ್ಲಿ ಅನೇಕ ಜನರು ಮನೆ ಬಿಟ್ಟು ಹೊರ ಬಂದಿದ್ದರು. ಭೂಕಂಪದ ನಂತರ ಯುಎಸ್ ಮಾನಿಟರ್‌ಗಳು ಯಾವುದೇ ಸುನಾಮಿ ಎಚ್ಚರಿಕೆ ನೀಡಲಿಲ್ಲ.
10 ಮಿಲಿಯನ್ ಜನಸಂಖ್ಯೆಯನ್ನು ಹೊಂದಿರುವ ಪೆರುವಿಯನ್ ರಾಜಧಾನಿ 5.2 ತೀವ್ರತೆಯ ಭೂಕಂಪದಿಂದ ನಲುಗಿದೆ. ಪೆರುವಿನಲ್ಲಿ ಪ್ರತಿ ವರ್ಷ ಕನಿಷ್ಠ 400 ಭೂಕಂಪಗಳು ಸಂಭವಿಸುತ್ತವೆ. ಏಕೆಂದರೆ ಇದು ಪೆಸಿಫಿಕ್ ರಿಂಗ್ ಆಫ್ ಫೈರ್ ಎಂದು ಕರೆಯಲ್ಪಡುವ ಪ್ರದೇಶದಲ್ಲಿ ನೆಲೆಗೊಂಡಿದೆ. ಹೀಗಾಗಿ ಇದು ಅಮೆರಿಕನ್ ಖಂಡದ ಪಶ್ಚಿಮ ಕರಾವಳಿಯ ಉದ್ದಕ್ಕೂ ಹರಡಿರುವ ಭೂಕಂಪನ ಚಟುವಟಿಕೆಯ ಪ್ರದೇಶವಾಗಿದೆ.
ಆಗಸ್ಟ್ 15, 2007 ರಂದು ಪ್ರಬಲವಾದ 7.9 ತೀವ್ರ ಭೂಕಂಪವು ಪೆರುವಿನ ಮಧ್ಯ ಕರಾವಳಿಯನ್ನು ಅಪ್ಪಳಿಸಿತು, ಇದರಿಂದಾಗಿ 500 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದರು.
