ಬಾಲಿವುಡ್​ ಹೀರೋ ಆರಾಧನೆ... ಹೆಂಡತಿ ಕೊಂದು ಪತಿಯೂ ನೇಣಿಗೆ ಶರಣು!

ಬಾಲಿವುಡ್​ ನಟರೊಬ್ಬರ ಮೇಲಿನ ಅತಿಯಾದ ಆರಾಧನೆ, ಮಹಿಳೆಗೆ ಯಮಪಾಶವಾಗಿ ಬದಲಾಗಿದೆ. ನಟನೊಬ್ಬನ ಆರಾಧನೆ, ಆತನ ಸಿನಿಮಾ ನೋಡುವುದು ಇಷ್ಟವಿಲ್ಲದೇ ಗಂಡ ತನ್ನ ಹೆಂಡ್ತಿಯನ್ನೇ ಕೊಲೆ ಮಾಡಿರುವ ಘಟನೆ ನ್ಯೂಯಾರ್ಕ್​ ನಗರದಲ್ಲಿ ನಡೆದಿದೆ.

ನ್ಯೂಯಾರ್ಕ್​: ಭಾರತದ ನಿವಾಸಿ ದಿನೇಶ್ವರ್​ (33) ಮತ್ತು ಡೊಜಾಯ್​ (27) ಜೊತೆ ಮದುವೆಯಾಗಿತ್ತು. ಇವರಿಬ್ಬರು ನ್ಯೂಯಾರ್ಕ್​ ನಗರದ ಕ್ವಿನ್ಸ್​ ಅಪಾರ್ಟ್​ಮೆಂಟ್​ನಲ್ಲಿ ವಾಸಿಸುತ್ತಿದ್ದಾರೆ. ಬಾರ್​ ಟೆಂಡರ್​ ಆಗಿ ಕೆಲಸ ನಿರ್ವಹಿಸುತ್ತಿದ್ದ ಡೊಜಾಯ್​ಗೆ ಬಾಲಿವುಡ್​ ನಟ ಹೃತಿಕ್​ ರೋಷನ್​ ಅಂದ್ರೆ ಪಂಚ ಪ್ರಾಣ. ಯಾವಾಗ್ಲೂ ಹೃತಿಕ್​ ಸಿನಿಮಾ, ಹಾಡುಗಳು ನೋಡುತ್ತಿದ್ದರು. ಈ ವಿಷಯಕ್ಕೆ ಸಂಬಂಧಿಸಿದಂತೆ ಇಬ್ಬರ ಮಧ್ಯೆ ಅನೇಕ ಬಾರಿ ಕಲಹಗಳು ನಡೆಯುತ್ತಿದ್ದವು ಎಂಬ ವಿಷಯವನ್ನ ಡೊಜಾಯ್​ ಸ್ನೇಹಿತೆಯರು ಮಾಧ್ಯಮಕ್ಕೆ ತಿಳಿಸಿದ್ದಾರೆ.

2019 ಆಗಸ್ಟ್​ನಲ್ಲಿ ಹೃತಿಕ್​ ವಿಷಯದಲ್ಲಿ ಇಬ್ಬರ ಮಧ್ಯೆ ಗಲಾಟೆ ನಡೆದಿದೆ. ಈ ವೇಳೆ ದಿನೇಶ್ವರ್​ ಡೊಜಾಯ್​ಗೆ ಚಿತ್ರಹಿಂಸೆ ಕೊಟ್ಟು ಹಲ್ಲೆ ಮಾಡಿದ್ದಾನೆ. ಆಕೆಯನ್ನು ತನ್ನ ಕಂಟ್ರೋಲ್​ಗೆ ತರಲು ಪ್ರಯತ್ನಿಸಿದ್ದಾನೆ. ಆದ್ರೆ ಡೊಜಾಯ್​ ಗಂಡನ ವಿರುದ್ಧ ಪೊಲೀಸ್​ ಠಾಣೆಗೆ ದೂರು ನೀಡಿದ್ದಾರೆ. ಆಗಸ್ಟ್​ 21ರಂದು ಪೊಲೀಸರು ದಿನೇಶ್ವರ್​ನನ್ನು ಬಂಧಿಸಿದ್ದರು. ನಾಲ್ಕು ದಿನಗಳ ಹಿಂದೆ ಅಂದ್ರೆ ಬುಧವಾರ ನ್ಯಾಯಾಲಯದಲ್ಲಿ ತನ್ನ ತಪ್ಪನ್ನು ಸಹ ಒಪ್ಪಿಕೊಂಡಿದ್ದ. ಬಳಿಕ ಗಂಡ ಜೈಲಿನಿಂದ ಕೂಡಾ ಹೊರ ಬಂದಿದ್ದ.

ಶುಕ್ರವಾರ ಜೈಲಿನಿಂದ ಹೊರ ಬಂದ ದಿನೇಶ್ವರ್​ ನೇರ ತನ್ನ ಹೆಂಡ್ತಿ ಡೊಜಾಯ್​ ತಂಗಿದ್ದ ಅಪಾರ್ಟ್​ಮೆಂಟ್​ಗೆ ತೆರಳಿ ಮನಬಂದಂತೆ ಚಾಕುವಿನಿಂದ ಚುಚ್ಚಿ ಕೊಲೆ ಮಾಡಿದ್ದಾನೆ. ಬಳಿಕ ತನ್ನ ಸಹೋದರಿಗೆ ಪತ್ನಿಯನ್ನು ಕೊಲೆ ಮಾಡಿರುವ ಸುದ್ದಿಯನ್ನ ಮೆಸೇಜ್​ ಮಾಡಿ ತಿಳಿಸಿದ್ದಾನೆ. ಸಂದೇಶ ಕಳಿಸಿದ ಬಳಿಕ ದಿನೇಶ್ವರ್​ ಮರಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾನೆ. ದಿನೇಶ್ವರ್​ ಸಹೋದರಿ ಕೂಡಲೇ ಅಪಾರ್ಟ್​ಮೆಂಟ್​ಗೆ ತೆರಳಿ ನೋಡಿದಾಗ ಡೊಜಾಯ್​ ಕೊಲೆ ಆಗಿರುವುದು ಕನ್ಫರ್ಮ್​ ಆಗಿದೆ. ಬಳಿಕ ಪೊಲೀಸರಿಗೆ ಮಾಹಿತಿ ತಿಳಿಸಿದ್ದರು. ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.