ವಾಷಿಂಗ್ಟನ್: ಉಕ್ರೇನ್ ವಿರುದ್ಧದ ಯುದ್ಧದಲ್ಲಿ ರಷ್ಯಾಗೆ ಸೇನೆ ಅಥವಾ ಆರ್ಥಿಕವಾಗಿ ಸಹಾಯ ನೀಡಲು ಚೀನಾ ಯತ್ನಿಸುತ್ತಿದೆ ಎಂಬ ವರದಿಗಳ ಬೆನ್ನಲ್ಲೇ ರಷ್ಯಾಕ್ಕೆ ಸಂಬಂಧಿಸಿದಂತೆ ಬೀಜಿಂಗ್‌ ತೆಗೆದುಕೊಳ್ಳುವ ನಿರ್ಧಾರಗಳನ್ನು ಜಗತ್ತು ನೋಡುತ್ತಿದೆ ಎಂದು ಅಮೆರಿಕ ಹೇಳಿದೆ.
ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಜೆನ್ ಪ್ಸಾಕಿ ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿ, ರಷ್ಯಾಗೆ ಚೀನಾ ನೆರವಿನ ಬಗ್ಗೆ ಸೂಕ್ಷ್ಮವಾಗಿ ಗಮನಿಸುತ್ತಿದ್ದೇವೆ. ಜಗತ್ತು ಕೂಡ ಇದನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ. ನಿರ್ಬಂಧಗಳನ್ನು ಉಲ್ಲಂಘಿಸಿದರೆ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ನಮ್ಮ ರಾಷ್ಟ್ರೀಯ ಭದ್ರತಾ ಸಲಹೆಗಾರು ಈಗಾಗಲೇ ಸ್ಪಷ್ಟವಾಗಿ ಹೇಳಿರುವುದಾಗಿ ತಿಳಿಸಿದರು. ಚೀನಾ ತೆಗೆದುಕೊಳ್ಳುವ ನಿರ್ಧಾರಗಳನ್ನು ಜಗತ್ತು ವೀಕ್ಷಿಸಲಿದೆ. ಆದರೆ, ಯಾವುದೇ ಸಂಭಾವ್ಯ ಪರಿಣಾಮಗಳ ವಿಷಯದಲ್ಲಿ ನಾವು ಈ ಹಂತದಲ್ಲಿ ಖಾಸಗಿ ರಾಜತಾಂತ್ರಿಕರಿಗೆ ಅವುಗಳನ್ನು ಬಿಡುತ್ತೇವೆ ಎಂದು ಹೇಳಿದರು.
ನಮ್ಮ ರಾಷ್ಟ್ರೀಯ ಭದ್ರತಾ ಸಲಹೆಗಾರರು ಚೀನಾ ನಿಯೋಗದೊಂದಿಗೆ ನಡೆಸಿದ ಸುದೀರ್ಘ ಸಂಭಾಷಣೆ ವೇಳೆ ತೈವಾನ್ ಸಂಬಂಧಗಳ ಕಾಯಿದೆ, ಮೂರು ಸಂವಹನಗಳು ಹಾಗೂ ಆರು ಭರವಸೆಗಳ ಆಧಾರದ ಮೇಲೆ ಏಕ - ಚೀನಾ ನೀತಿಯನ್ನು ಪುನರುಚ್ಚರಿಸಲಾಗಿದೆ. ತೈವಾನ್ ಜಲ ಗಡಿಯಲ್ಲಿ ಬೀಜಿಂಗ್‌ನ ದಬ್ಬಾಳಿಕೆ ಮತ್ತು ಪ್ರಚೋದನಕಾರಿ ಕ್ರಮಗಳ ಬಗ್ಗೆ ಪ್ಸಾಕಿ ಇದೇ ವೇಳೆ ಕಳವಳ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ರಿಯಾಯಿತಿ ದರದ ಕಚ್ಚಾ ತೈಲ ನೀಡುವ ರಷ್ಯಾ ಪ್ರಸ್ತಾಪಕ್ಕೆ ಭಾರತ ಒಪ್ಪಿಗೆ, ನಿರ್ಬಂಧಗಳ ಉಲ್ಲಂಘನೆಯಲ್ಲ - ವೈಟ್‌ಹೌಸ್‌
