ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಾಧ್ಯಮ ಗೋಷ್ಠಿಗಳಲ್ಲಿ ಮಾತನಾಡುತ್ತಿರುವಾಗ ಅವರ ಹಿಂದೆ ತೆಳ್ಳನೆಯ ವ್ಯಕ್ತಿಯೊಬ್ಬ ನಿಂತುಕೊಂಡಿರುವುದನ್ನು ನೀವು ಗಮನಿಸಿರಬಹುದು. ಅನೇಕ ಸಲ ಸಭೆಗಳಲ್ಲಿ, ಮಾಧ್ಯಮ ಗೋಷ್ಠಿಗಳಲ್ಲಿ ಅಧ್ಯಕ್ಷ ಟ್ರಂಪ್ ಏನಾದರೂ ತಪ್ಪು ಮಾತನಾಡಿದರೆ ತಕ್ಷಣ ಪಕ್ಕಕ್ಕೆ ಬರುವ ಈ ವ್ಯಕ್ತಿ ಅಧ್ಯಕ್ಷರಿಗೆ ಸರಿಯಾದ ಮಾಹಿತಿಯನ್ನು ಹೇಳುತ್ತಾನೆ. ಅಧ್ಯಕ್ಷ ಟ್ರಂಪ್ ಕೂಡ ಸೌಜನ್ಯದಿಂದ ಈತನ ಸಲಹೆ ಸ್ವೀಕರಿಸಿ ಮುನ್ನಡೆಯುತ್ತಾರೆ. ಈ ವ್ಯಕ್ತಿಯೇ ಅಂಥೋನಿ ಫೌಸಿ. ಈಗ ಕೋವಿಡ್-19 ಕುರಿತಂತೆ ಯಾವುದೇ ಮಾಹಿತಿ ಬೇಕಿದ್ದರೂ ಅಮೆರಿಕನ್ನರು ಇವರನ್ನೇ ಅವಲಂಬಿಸಿದ್ದಾರೆ ಎಂದರೆ ಅತಿಶಯೋಕ್ತಿಯೇನಲ್ಲ.
ಡಾ. ಅಂಥೋನಿ ಫೌಸಿ ವೃತ್ತಿಯಿಂದ ಓರ್ವ ವೈದ್ಯ ಹಾಗೂ ರೋಗನಿರೋಧಕ ತಜ್ಞರಾಗಿದ್ದು, ಅಮೆರಿಕದ ಅಲರ್ಜಿ ಮತ್ತು ಸಾಂಕ್ರಾಮಿಕ ರೋಗಗಳ ನ್ಯಾಷನಲ್ ಇನ್ಸ್ಟಿಟ್ಯೂಟ್ನ (NIAID) ನಿರ್ದೇಶಕರಾಗಿ ಕೆಲಸ ಮಾಡುತ್ತಿದ್ದಾರೆ. ಹಿಂದಿನ ಅಧ್ಯಕ್ಷ ರೋನಾಲ್ಡ್ ರೇಗನ್ರಿಂದ ಹಿಡಿದು ಈಗಿನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ವರೆಗೆ ಆರು ಅಧ್ಯಕ್ಷರ ಕೈಕೆಳಗೆ ಕೆಲಸ ಮಾಡಿರುವ ಅನುಭವ ಇವರಿಗಿದೆ. ಕಳೆದ ಮೂವತ್ತು ವರ್ಷಗಳಿಂದ ಅಮೆರಿಕ ನೋಡಿದ ಪ್ರತಿಯೊಂದು ಆರೋಗ್ಯ ವ್ಯವಸ್ಥೆಯ ಸಂಕಷ್ಟ ನಿವಾರಿಸುವಲ್ಲಿ ಫೌಸಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಎಚ್ಐವಿ, ಸಾರ್ಸ್, ಎಬೋಲಾ, ಮರ್ಸ್ ಮತ್ತು 2001ರ ಜೈವಿಕ ಭಯೋತ್ಪಾದನೆ ದಾಳಿಯ ಸಂದರ್ಭಗಳಲ್ಲಿ ಫೌಸಿ ಕ್ರಿಯಾಶೀಲರಾಗಿ ಕೆಲಸ ಮಾಡಿದ್ದಾರೆ.
2014 ರಲ್ಲಿ ಅಮೆರಿಕದ ನರ್ಸ್ ಒಬ್ಬರಿಗೆ ಎಬೋಲಾ ಸೋಂಕು ತಗುಲಿತ್ತು. ಆಗ ಅಮೆರಿಕದ ಒಬ್ಬೇ ಒಬ್ಬ ವೈದ್ಯನೂ ಆಕೆಗೆ ಚಿಕಿತ್ಸೆ ನೀಡಲು ಮುಂದಾಗಲಿಲ್ಲ. ಆದರೆ 74 ವರ್ಷದ ಫೌಸಿ ಸುರಕ್ಷತಾ ಉಡುಪು ಧರಿಸಿ ಆಕೆಗೆ ಚಿಕಿತ್ಸೆ ನೀಡಲಾರಂಭಿಸಿದರು. ಕೆಲವೇ ವಾರಗಳಲ್ಲಿ ನರ್ಸ್ ಎಬೋಲಾದಿಂದ ಸಂಪೂರ್ಣ ಗುಣಮುಖಳಾದಳು. ಮಾಧ್ಯಮಗಳ ಕ್ಯಾಮೆರಾಗಳ ಎದುರಿಗೆ ಆಕೆಯನ್ನು ತಬ್ಬಿಕೊಂಡ ಫೌಸಿ, ಎಬೋಲಾದಿಂದ ಸಮಾಜಕ್ಕೆ ಇನ್ನು ಯಾವುದೇ ಭೀತಿಯಿಲ್ಲ ಎಂಬ ಸಂದೇಶ ಸಾರಿದರು.
ಎಬೋಲಾ ಸಂಕಷ್ಟ ಕಳೆದು ಆರು ವರ್ಷಗಳ ನಂತರ ಫೌಸಿ ಈಗ ವೈಟ್ ಹೌಸ್ನ ಕೋವಿಡ್-19 ಟಾಸ್ಕ್ ಫೋರ್ಸ್ನಲ್ಲಿ ಮುಖ್ಯ ಪಾತ್ರ ವಹಿಸಿದ್ದಾರೆ. ಸಾಕಷ್ಟು ಟೆಸ್ಟ್ಗಳನ್ನು ಮಾಡುವಲ್ಲಿ ಸರಕಾರ ವಿಫಲವಾಗಿದೆ ಎಂದು ಸಂಸತ್ತಿನ ಮುಂದೆ ಧೈರ್ಯವಾಗಿ ಇವರು ಹೇಳಿದ್ದರು. ಅಮೆರಿಕದಲ್ಲಿ ಕೋವಿಡ್ನಿಂದ ಸುಮಾರು 1 ಲಕ್ಷ ಜನ ಪ್ರಾಣ ಕಳೆದುಕೊಳ್ಳಬಹುದು ಎಂಬ ಫೌಸಿ ಅವರ ಅಂದಾಜಿಗೆ ಅಧ್ಯಕ್ಷ ಟ್ರಂಪ್ ಕೂಡ ಒಪ್ಪಿದ್ದಾರೆ. ಮಲೇರಿಯಾ ವಾಸಿ ಮಾಡಲು ಬಳಸಲಾಗುವ ಔಷಧದಿಂದ ಕೋವಿಡ್ ವಾಸಿ ಮಾಡಬಹುದು ಎಂದು ಟ್ರಂಪ್ ಯಾವುದೋ ಉತ್ಸಾಹದಲ್ಲಿ ಹೇಳಿಬಿಟ್ಟಿದ್ದರು. ಆದರೆ ಈ ವಾದಕ್ಕೆ ಯಾವುದೇ ವೈಜ್ಞಾನಿಕ ಆಧಾರಗಳಿಲ್ಲ ಎಂದು ಫೌಸಿ ತಕ್ಷಣ ಹೇಳಿ ಬಿಟ್ಟರು. ಹೀಗಿದ್ದಾರೆ ಡಾ. ಅಂಥೋನಿ ಫೌಸಿ!
