ಕನ್ನಡ ಸಿನಿಮಾಗಳು ವಿಶ್ವದಾದ್ಯಂತ ಬಿಡುಗಡೆ ಆಗಿ ಯಶಸ್ವಿ ಪ್ರದರ್ಶನಗೊಳ್ಳುತ್ತಿದೆ. ಕನ್ನಡ ಚಿತ್ರಗಳು ಕ್ವಾಲಿಟಿ ಹಾಗೂ ಬಹುಕೋಟಿ ವೆಚ್ಚದಲ್ಲಿ ನಿರ್ಮಾಣ ಆಗುತ್ತಿದೆ. ಯಾವ ಮಟ್ಟಿಗೆ ಅಂದ್ರೆ ಕೇವಲ ಹಾಡುಗಳಿಗೆ ಕೋಟಿ ಖರ್ಚು ಮಾಡಲಾಗುತ್ತಿದೆ. ಈಗಾಗ್ಲೇ 50 ರಿಂದ 1 ಕೋಟಿ ವೆಚ್ಚದಲ್ಲಿ ಕೆಲ ಅದ್ಧೂರಿ ಸಾಂಗ್ಗಳು ರೆಡಿಯಾಗಿ ಸಕ್ಸಸ್ ಕಂಡಿವೆ. ಈ ಸಾಲಿಗೆ ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ ತ್ರಿಬಲ್ ರೈಡಿಂಗ್ ಚಿತ್ರದ ಹಾಡುಗಳು ಹೊಸ ಸೇರ್ಪಡೆ.
ಟೈಟಲ್ ಹಾಗೂ ಅದ್ಧೂರಿ ವೆಚ್ಚದ ಹಾಡುಗಳ ಮೂಲಕ ಸೌತ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಕ್ರೇಜ್ ಹುಟ್ಟಿಸಿರೋ ಚಿತ್ರ ತ್ರಿಬಲ್ ರೈಡಿಂಗ್. ಈ ಸಿನಿಮಾದ ಯಟ್ಟ ಯಟ್ಟ ಹಾಡು ಈಗಾಗ್ಲೇ ಬಿಡುಗಡೆ ಆಗಿ ಯೂ ಟ್ಯೂಬ್ನಲ್ಲಿ 7 ಮಿಲಿಯನ್ಗೂ ಹೆಚ್ಚು ಪ್ರೇಕ್ಷಕರು ನೋಡಿ ಮೆಚ್ಚಿಕೊಂಡಿದ್ದಾರೆ. ಹಾಡಿನಲ್ಲಿ ಗಣೇಶ್ ಮೂವರು ಸುಂದರಿಯರು ಜೊತೆ ರೊಮ್ಯಾನ್ಸ್ ಮಾಡುವುದರ ಜೊತೆ ಅದ್ಧೂರಿ ಸ್ಟೆಪ್ ಹಾಕಿದ್ದಾರೆ.
ಈ ಹಿನ್ನೆಲೆ ಚಿತ್ರರಂಗದಲ್ಲಿ ಸಖತ್ ಟಾಕ್ ಆಗುತ್ತಿರುವ ತ್ರಿಬಲ್ ರೈಡಿಂಗ್ ಚಿತ್ರದ ಯಟ್ಟ ಯಟ್ಟ ಹಾಡಿನ ಮೇಕಿಂಗ್ ವಿಡಿಯೋ ಅನ್ನು ಚಿತ್ರತಂಡ ರಿವೀಲ್ ಮಾಡಿದೆ.
ಅಂದಹಾಗೆ, ಈ ಯಟ್ಟ ಯಟ್ಟ ಹಾಡಿಗಾಗಿ ಬರೋಬ್ಬರಿ ಅರ್ಧ ಕೋಟಿ ಖರ್ಚು ಮಾಡಲಾಗಿದೆ. ಹೌದು, 50 ಲಕ್ಷ ರೂಪಾಯಿ ವೆಚ್ಚದಲ್ಲಿ ನಿರ್ಮಾಪಕ ರಾಮ್ ಗೋಪಾಲ್ ಮೂರು ಅದ್ಧೂರಿ ಸೆಟ್ ಹಾಕಿ, 50ಕ್ಕೂ ಹೆಚ್ಚು ಸಹ ಕಲಾವಿದರನ್ನು ಬಳಸಿಕೊಂಡು ಈ ಹಾಡನ್ನು ಚಿತ್ರೀಕರಣ ಮಾಡಲಾಗಿದೆ.
ಸಾಂಗ್ ಕ್ವಾಲಿಟಿ ರಿಚ್ ಆಗಿ ಬರಬೇಕು ಎಂಬ ಕಾರಣಕ್ಕೆ ನಿರ್ಮಾಪಕ ರಾಮ್ ಗೋಪಾಲ್ ಹಾಡಿನ ಖರ್ಚುನ ಬಗ್ಗೆ ಯೋಚನೆ ಮಾಡದೇ, ಬೆಂಗಳೂರಿನ ಅಕ್ಷಯ್ ಸ್ಟುಡಿಯೋದಲ್ಲಿ ಮೂರು ವಿಭಿನ್ನ ಸೆಟ್ಟುಗಳನ್ನು ಹಾಕಿ ಈ ಯಟ್ಟ ಯಟ್ಟ ಹಾಡಿನ ದೃಶ್ಯ ಸೆರೆ ಹಿಡಿಯಲಾಗಿದೆ.
ಸಾಕಷ್ಟು ಹಿಟ್ ಹಾಡುಗಳ ಕೋರಿಯೋಗ್ರಾಫರ್ ಮುರಳಿ ಮಾಸ್ಟರ್ ಈ ಹಾಡಿಗೆ ನೃತ್ಯ ಸಂಯೋಜನೆ ಮಾಡಿದ್ದಾರೆ. ಈ ಹಾಡಿನ ಬಗ್ಗೆ ನಟಿಯರಾದ ರಚನಾ ಇಂದರ್, ಮೇಘಾ ಶೆಟ್ಟಿ ಮತ್ತು ಆದಿತಿ ಪ್ರಭುದೇವ ಮೇಕಿಂಗ್ ವಿಡಿಯೋದಲ್ಲಿ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. ಇನ್ನು ಗಣೇಶ್ ಕೂಡ ನಾಲ್ಕೈದು ದಿನ ಪ್ರಾಕ್ಟೀಸ್ ಮಾಡಿ ಈ ಹಾಡಿಗೆ ಹೆಜ್ಜೆ ಹಾಕಿದ್ದಾರೆ.
ಇನ್ನೂ ತ್ರಿಬಲ್ ರೈಡಿಂಗ್ ಕೇವಲ ಕಾಮಿಡಿ ಸಿನಿಮಾ ಅಲ್ಲ. ಈ ಪ್ರಯಾಣದಲ್ಲಿ ಹಾಸ್ಯದ ಜೊತೆ ಅಷ್ಟೇ ತಿರುವುಗಳಿವೆ. ಚಿತ್ರದ ಕೊನೆಯ 20 ನಿಮಿಷ ನಿಮ್ಮೆಲ್ಲರನ್ನು ಹೊಟ್ಟೆ ಹುಣ್ಣಾಗುವಂತೆ ನಗಿಸುತ್ತೆ ಎನ್ನುವ ಭರವಸೆಯನ್ನು ಚಿತ್ರತಂಡ ಈ ಮೊದಲೇ ನೀಡಿದೆ. ತ್ರಿಬಲ್ ರೈಡಿಂಗ್ ಮೂಲಕ ಗಣೇಶ್ ಮತ್ತೊಂದು ಹಿಟ್ ಸಿನಿಮಾ ಕೊಡುವ ಲಕ್ಷಣಗಳು ಕಾಣುತ್ತಿವೆ.
ಇದನ್ನೂ ಓದಿ: ಯಟ್ಟ..ಯಟ್ಟ..ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ ತ್ರಿಬಲ್ ರೈಡಿಂಗ್ ಸಾಂಗ್ ರಿಲೀಸ್
ಇನ್ನೂ ರಚನಾ ಇಂದರ್, ಮೇಘಾ ಶೆಟ್ಟಿ ಮತ್ತು ಆದಿತಿ ಪ್ರಭುದೇವ ಅವರಿಗೆ ತ್ರಿಬಲ್ ರೈಡಿಂಗ್ ತುಂಬಾನೇ ವಿಶೇಷವಾದ ಸಿನಿಮಾ. ಗಣೇಶ್ ಜೊತೆ ನಟಿಸಿರುವ ಮೊದಲ ಸಿನಿಮಾವಿದು. ಮಹೇಶ್ ಗೌಡ ಈ ಚಿತ್ರದ ಸೂತ್ರಧಾರ. ಅನೇಕ ವರ್ಷಗಳಿಂದ ಗಣಿಗೆ ಚೆಂದದ ಸಿನಿಮಾ ಮಾಡಬೇಕೆಂಬ ಕನಸು ಕಂಡಿದ್ದ ಮಹೇಶ್ ಗೌಡ ಕೊನೆಗೂ ತಮ್ಮ ಕನಸನ್ನು ನನಸು ಮಾಡಿಕೊಂಡಿದ್ದಾರೆ.
ಸಿನಿಮಾ ಬಗ್ಗೆ ಫ್ಯಾಶನ್ ಹೊಂದಿರುವ ನಿರ್ಮಾಪಕ ರಾಮ್ ಗೋಪಾಲ್ ಈ ಚಿತ್ರವನ್ನು ಅದ್ಧೂರಿ ವೆಚ್ಚದಲ್ಲಿ ನಿರ್ಮಾಣ ಮಾಡಿದ್ದಾರೆ. ಸಾಯಿ ಕಾರ್ತಿಕ್ ಸಂಗೀತ ನಿರ್ದೇಶನದಲ್ಲಿ ಚಿತ್ರದ ಹಾಡುಗಳು ಮೂಡಿ ಬಂದಿವೆ. ಸದ್ಯಕ್ಕೆ ಹಲವಾರು ವಿಶೇಷತೆಗಳಿಗೆ ಸದ್ದು ಮಾಡುತ್ತಿರೋ ತ್ರಿಬಲ್ ರೈಡಿಂಗ್ ಚಿತ್ರ ನವೆಂಬರ್ 25ಕ್ಕೆ ಬಿಡುಗಡೆಯಾಗಲಿದೆ.
ಇದನ್ನೂ ಓದಿ: ನ. 25ಕ್ಕೆ ಬಿಡುಗಡೆಯಾಗಲಿದೆ 'ತ್ರಿಬಲ್ ರೈಡಿಂಗ್'.. ಟ್ವಿಂಕಲ್ ಟ್ವಿಂಕಲ್ ಲಿಟಲ್ ಸ್ಟಾರ್ ಅಂತಿದ್ದಾರೆ ಗೋಲ್ಡನ್ ಸ್ಟಾರ್
