ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಅವರ ಡೀಪ್ಫೇಕ್ ವಿಡಿಯೋ ವೈರಲ್ ಆದ ನಂತರ ಮೊದಲ ಬಾರಿಗೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದಾರೆ. ರಣ್ಬೀರ್ ಕಪೂರ್ ಹಾಗೂ ಸಂದೀಪ್ ರೆಡ್ಡಿ ವಂಗಾ ಅವರೊಂದಿಗೆ ಮುಂಬೈನಲ್ಲಿರುವ ಟಿ - ಸೀರೀಸ್ನ ಪ್ರಧಾನ ಕಚೇರಿಯಿಂದ ಹೊರಟಿರುವ ದೃಶ್ಯ ವೈರಲ್ ಆಗಿದೆ.
ಪಾಪರಾಜಿಗಳು ಶೇರ್ ಮಾಡಿರುವ ವಿಡಿಯೋದಲ್ಲಿ, ಈ ಮೂವರು ಒಟ್ಟಿಗೆ ಕಾಣಿಸಿಕೊಂಡಿದ್ದಾರೆ. ಜೀನ್ಸ್, ಟೀ-ಶರ್ಟ್ ಧರಿಸಿ ರಶ್ಮಿಕಾ ಕ್ಯಾಶುವಲ್ ಲುಕ್ ಬೀರಿದ್ದಾರೆ. ಕೈಯಲ್ಲಿ ಬ್ಯಾಗ್, ಪೇಪರ್ ಹಿಡಿದಿದ್ದರು. ರಶ್ಮಿಕಾ ಮಂದಣ್ಣ ವೇಗವಾಗಿ ನಡೆದು ಕಾರ್ ಹತ್ತಿದ್ದಾರೆ. ರಣ್ಬೀರ್ ಸಹ ಅದೇ ಕಾರ್ನಲ್ಲಿ ಕುಳಿತು ಹೊರಟಿದ್ದಾರೆ. ಇದೇ ಮೊದಲ ಬಾರಿ ರಶ್ಮಿಕಾ - ರಣ್ಬೀರ್ ಸ್ಕ್ರೀನ್ ಶೇರ್ ಮಾಡಿದ್ದು, ಅನಿಮಲ್ ಸಿನಿಮಾ ಡಿಸೆಂಬರ್ 1ರಂದು ತೆರೆಕಾಣಲಿದೆ.
ರಶ್ಮಿಕಾ ಮಂದಣ್ಣ ವಿಡಿಯೋ: ಪಾಪರಾಜಿ ಸಂಸ್ಕೃತಿಗೆ ರಶ್ಮಿಕಾ ಮಂದಣ್ಣ ಒಗ್ಗಿಕೊಂಡಿದ್ದಾರೆ. ಸದಾ ಪಾಪರಾಜಿಗಳ ಕ್ಯಾಮರಾಗಳಿಗೆ ಮುಗುಳ್ನಗೆ ಬೀರುವ ರಶ್ಮಿಕಾ ಈ ಬಾರಿ ಕ್ಯಾಮರಾಗಳಿಗೆ ಪೋಸ್ ಕೊಡದೇ ಬೇಗನೆ ಕಾರು ಹತ್ತಿ ಕುಳಿತರು. ಮತ್ತೊಂದೆಡೆ ಬಾಲಿವುಡ್ ನಟ ರಣ್ಬೀರ್ ಕಪೂರ್ ಸ್ವೆಟ್‌ಶರ್ಟ್, ಡೆನಿಮ್ ಪ್ಯಾಂಟ್, ಕ್ಯಾಪ್ ಧರಿಸಿ ಕಂಡುಬಂದರು. ನಟ ಸಹ ರಶ್ಮಿಕಾ ಇದ್ದ ವಾಹನದಲ್ಲೇ ಹೋದರು. ಅದಾಗ್ಯೂ, ಕ್ಯಾಮರಾಗಳಿಗೆ, ಸೆಲ್ಫಿಗಳಿಗೆ ರಣ್ಬೀರ್ ಪೋಸ್ ಕೊಟ್ಟಿದ್ದಾರೆ.
ಹಿರಿಯ ನಟ ಅಮಿತಾಭ್ ಬಚ್ಚನ್ ಸೋಮವಾರ ಡೀಪ್ಫೇಕ್ ವಿಡಿಯೋ ಬಗ್ಗೆ ಪೋಸ್ಟ್ ಶೇರ್ ಮಾಡಿ ಗಮನ ಸೆಳೆದರು. ನಕಲಿ ದೃಶ್ಯಗಳ ವಿರುದ್ಧ ಕಾನೂನು ಕ್ರಮಕ್ಕಾಗಿ ಆಗ್ರಹಿಸಿದರು. ನಂತರ ಸ್ವತಃ ನಟಿ ರಶ್ಮಿಕಾ ಮಂದಣ್ಣ ಅವರೇ ಸೋಷಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿ, ತಮ್ಮ ದುಃಖ ಹೊರಹಾಕಿದ್ದರು.
ಇದನ್ನೂ ಓದಿ: ಡೀಪ್ಫೇಕ್ ಕಂಟೆಂಟ್ ವಿರುದ್ಧ ಕ್ರಮ: ಸರ್ಕಾರಕ್ಕೆ ಕೃತಜ್ಞತೆ ಸಲ್ಲಿಸಿದ ರಶ್ಮಿಕಾ ಮಂದಣ್ಣ
ಆನ್‌ಲೈನ್‌ನಲ್ಲಿ ವೈರಲ್ ಆಗುತ್ತಿರುವ ಡೀಪ್ಫೇಕ್ ವಿಡಿಯೋ ನೋಡಿ ನನಗೆ ನಿಜವಾಗಿಯೂ ನೋವಾಗಿದೆ. ನನಗೆ ಮಾತ್ರವಲ್ಲ, ತಂತ್ರಜ್ಞಾನದ ದುರುಪಯೋಗಕ್ಕೆ ಗುರಿಯಾಗುವ ಎಲ್ಲಾ ಜನರಿಗೂ ಇದೊಂದು ಭಯಾನಕ ಪರಿಸ್ಥಿತಿ. ನನಗೆ ರಕ್ಷಣೆ ಮತ್ತು ಬೆಂಬಲ ನೀಡುತ್ತಿರುವ ನನ್ನ ಕುಟುಂಬ, ಸ್ನೇಹಿತರು ಮತ್ತು ಹಿತೈಷಿಗಳಿಗೆ ನಾನು ಕೃತಜ್ಞಳಾಗಿದ್ದೇನೆ. ಒಂದು ವೇಳೆ ನನ್ನ ವಿದ್ಯಾಭ್ಯಾಸದ ದಿನಗಳಲ್ಲಿ ಇಂತಹ ಘಟನೆ ಸಂಭವಿಸಿದ್ದರೆ, ಹೇಗೆ ನಿಭಾಯಿಸುತ್ತಿದ್ದೆನೋ. ಇಂತಹ ಘಟನೆಗಳಿಗೆ ಬಲಿಯಾಗುವುದನ್ನು ತಡೆಯಲು ಶೀಘ್ರ ಕ್ರಮ ಅತ್ಯಗತ್ಯ ಎಂದು ತಿಳಿಸಿದ್ದರು. ನಿನ್ನೆ ಕೇಂದ್ರದ ಐಟಿ ಸಚಿವಾಲಯ ಸಾಮಾಜಿಕ ಜಾಲತಾಣ ವೇದಿಕೆಗಳಿಗೆ ಮಾರ್ಗಸೂಚಿಗಳನ್ನು ಕಳುಹಿಸಿದ್ದು, ಇದಕ್ಕೆ ನಟಿ ರಶ್ಮಿಕಾ ಮಂದಣ್ಣ ಕೃತಜ್ಞತೆ ಸಲ್ಲಿಸಿದ್ದಾರೆ.
ಇದನ್ನೂ ಓದಿ: 24 ಗಂಟೆಗಳಲ್ಲಿ ಡೀಪ್ಫೇಕ್ ಕಂಟೆಂಟ್ ತೆಗೆದುಹಾಕಿ; ಸಾಮಾಜಿಕ ಮಾಧ್ಯಮಗಳಿಗೆ ಸರ್ಕಾರದ ನಿರ್ದೇಶನ
ಇದೇ ಮೊದಲ ಬಾರಿ ರಣ್ಬೀರ್ ಕಪೂರ್ ಅವರೊಂದಿಗೆ ರಶ್ಮಿಕಾ ಮಂದಣ್ಣ 'ಅನಿಮಲ್' ಚಿತ್ರದಲ್ಲಿ ಕೆಲಸ ಮಾಡಿದ್ದು, ಡಿಸೆಂಬರ್ 1 ರಂದು ಬಿಡುಗಡೆಯಾಗಲಿದೆ. ವಿಕ್ಕಿ ಕೌಶಲ್ ಅವರ ಸ್ಯಾಮ್ ಬಹದ್ದೂರ್ ಸಿನಿಮಾ ಕೂಡ ಅಂದೇ ತೆರೆಕಾಣಲಿದ್ದು, ಬಾಕ್ಸ್ ಆಫೀಸ್ ಫೈಟ್ ನಡೆಯಲಿದೆ.
