ಮೈಸೂರಿನ ಆದಿಲ್ ಜೊತೆ ಗೌಪ್ಯ ಮದುವೆಯಾದ್ರಾ ರಾಖಿ ಸಾವಂತ್?

ಮೈಸೂರಿನ ಆದಿಲ್ ದುರಾನಿ ಜೊತೆ ಬಾಲಿವುಡ್​ ನಟಿ ರಾಖಿ ಸಾವಂತ್ ರಹಸ್ಯವಾಗಿ ಮದುವೆಯಾಗಿದ್ದಾರೆ ಎನ್ನಲಾಗುತ್ತಿದ್ದು, ಇಬ್ಬರು ಹೂವಿನ ಹಾರ ಹಾಕಿಕೊಂಡಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿವೆ.

ಹೈದರಾಬಾದ್ (ತೆಲಂಗಾಣ): ಸದಾ ಒಂದಿಲ್ಲೊಂದು ಕಾರಣಕ್ಕೆ ಸುದ್ದಿ ಇರುವ ಬಾಲಿವುಡ್​ ನಟಿ ರಾಖಿ ಸಾವಂತ್ ರಹಸ್ಯವಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ತಮ್ಮ ಗೆಳೆಯ, ಮೈಸೂರಿನ ಆದಿಲ್ ದುರಾನಿ ಜೊತೆ ರಾಖಿ ಮದುವೆಯಾಗಿದ್ದಾರೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಅಲ್ಲದೇ, ಇಬ್ಬರು ಸಹ ಹೂವಿನ ಹಾರ ಹಾಕಿಕೊಂಡಿರುವ ಫೋಟೋಗಳು ವೈರಲ್​ ಆಗಿದ್ದು, ಸಾವಂತ್ ಮತ್ತು ಆದಿಲ್​ ವಿವಾಹವನ್ನು ಸಾಕ್ಷೀಕರಿಸುವಂತಿವೆ.

ರಾಖಿ ಸಾವಂತ್ ಮತ್ತು ಆದಿಲ್ ದುರಾನಿ ಸಾಮಾನ್ಯವಾಗಿ ಮಾಧ್ಯಮಗಳು ಸುದ್ದಿಯಲ್ಲೇ ಇರುತ್ತಾರೆ. ಆದಿಲ್​ಗಾಗಿ ರಾಖಿ ಮೈಸೂರಿಗೂ ಬಂದಿದ್ದರು. ಇಬ್ಬರು ಸಹ ಬಹಿರಂಗವಾಗಿ ಒಟ್ಟಿಗೆ ಮಾಧ್ಯಮಗಳ ಮುಂದೆ ಬಂದಿದ್ದರು. ಆದಾಗ್ಯೂ, ಇಬ್ಬರೂ ತಮ್ಮ ಮದುವೆ ವಿಷಯವನ್ನು ಮುಚ್ಚಿಟ್ಟು ಗೌಪ್ಯವಾಗಿ ಜೀವನದ ಹೊಸ ಇನ್ನಿಂಗ್ಸ್​​ ಆರಂಭಿಸಿದ್ದಾರೆ ಎಂದು ಹೇಳಲಾಗುತ್ತಿದೆ. ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ರಾಖಿ ಮತ್ತು ಆದಿಲ್ ಅವರ ವೈರಲ್ ಫೋಟೋಗಳು ಸಖತ್​ ಸದ್ದು ಮಾಡುತ್ತಿವೆ.

ಕಳೆದ ವರ್ಷವೇ ವಿವಾಹ ಬಂಧನ?.. ಡ್ರಾಮಾ ಕ್ವೀನ್ ಎಂದೇ ಹೆಸರಾಗಿರುವ​ ರಾಖಿ ಸಾವಂತ್ ಚಿಕ್ಕ ವಿಷಯಗಳಿಂದಲೂ ಸುದ್ದಿ ಆಗುತ್ತಲೇ ಇರುತ್ತಾರೆ. ಆದರೆ, ತಮ್ಮ ಮದುವೆಯ ವಿಷಯವನ್ನು ಮಾತ್ರ ತಿಂಗಳುಗಳ ಕಾಲ ರಹಸ್ಯವಾಗಿರಿಸಿದ್ದರಾ ಎಂಬ ಅನುಮಾನ ಈಗ ವ್ಯಕ್ತವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಮಾಹಿತಿ ಪ್ರಕಾರ, 2022ರ ಮೇ 5ರಂದೇ ಗೆಳೆಯ ಆದಿಲ್ ದುರಾನಿ ಅವರನ್ನು ರಾಖಿ ವರಿಸಿದ್ದಾರೆ ಎಂದು ಹೇಳಲಾಗುತ್ತಿದೆ.

ಸರಳವಾಗಿ ಕೋರ್ಟ್​ನಲ್ಲಿ​ ಮದುವೆ?.. ರಾಖಿ ಮತ್ತು ಆದಿಲ್ ಒಟ್ಟಿಗೆ ಕೊರಳಿಗೆ ಹಾರವನ್ನು ಧರಿಸಿರುವುದು ಆ ವೈರಲ್​ ಆಗಿರುವ ಫೋಟೋಗಳಲ್ಲಿ ಕಾಣಬಹುದಾಗಿದೆ. ಇದರೊಂದಿಗೆ ಮದುವೆ ಪ್ರಮಾಣಪತ್ರವನ್ನೂ ಇಬ್ಬರೂ ತಮ್ಮ ಕೈಯಲ್ಲಿ ಇಟ್ಟುಕೊಂಡಿರುವುದು ಮತ್ತು ಮದುವೆಯ ಪುಸ್ತಕಕ್ಕೆ ಸಹಿ ಹಾಕುತ್ತಿರುವ ಫೋಟೋಗಳು ಸಹ ಹರಿದಾಡುತ್ತಿವೆ. ಸಾವಂತ್ ಮತ್ತು ದುರಾನಿ ಸರಳವಾಗಿ ನ್ಯಾಯಾಲಯದಲ್ಲಿ ವಿವಾಹವಾಗಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ: 'ಪ್ರೇಮಿಗಳ ದಿನ'ದ ಸಂದರ್ಭದಲ್ಲೇ ರಾಖಿ ಸಾವಂತ್ ದಾಂಪತ್ಯ ಅಂತ್ಯ

ಇದು ರಾಖಿಗೆ ಎರಡನೇ ಮದುವೆ.. ಆದಿಲ್ ದುರಾನಿ ಅವರನ್ನು ವರಿಸಿರುವ ಸುದ್ದಿ ನಿಜವೇ ಆದರೆ, ಇದು ರಾಖಿ ಸಾವಂತ್​ಗೆ ಎರಡನೇ ಮದುವೆಯಾಗಲಿದೆ. ಈ ಹಿಂದೆ ರಿಯಾಲಿಟಿ ಶೋ ಆಗಿರುವ ಹಿಂದಿಯ ಬಿಗ್​ ಬಾಸ್ ಸೀಸನ್ 15ರ ಸಮಯದಲ್ಲಿ ಬಿಗ್ ಬಾಸ್ ಸ್ಟಾರ್​ ರಿತೇಶ್ ಅವರನ್ನು ತನ್ನ ಪತಿ ಎಂದು ಖುದ್ದು ರಾಖಿ ಪರಿಚಯಿಸಿಕೊಂಡಿದ್ದರು. ಇದಾದ ನಂತರ ಕಳೆದ ಫೆಬ್ರವರಿಯಲ್ಲಿ ರಿತೇಶ್​ರಿಂದ ಬೇರ್ಪಡುತ್ತಿರುವುದಾಗಿ ಸಾವಂತ್​ ಘೋಷಿಸಿದ್ದರು.

ಪ್ರೇಮಿಗಳ ದಿನಕ್ಕೆ ಒಂದೇ ದಿನ ಮುಂಚೆ ಬ್ರೇಕಪ್​.. ಮದುವೆಯಾದ ಬಳಿಕ ರಾಖಿ ಸಾವಂತ್ ಮತ್ತು ರಿತೇಶ್ ಜಂಟಿಯಾಗಿ ಬಿಗ್​ ಬಾಸ್ ಸೀಸನ್ 15ರಲ್ಲಿ ವೈಲ್ಡ್​ ಕಾರ್ಡ್ ಎಂಟ್ರಿ ಮೂಲಕ ಪಾಲ್ಗೊಂಡಿದ್ದರು. ಈ ರಿಯಾಲಿಟಿ ಶೋ ಮುಕ್ತಾಯವಾದ ಬಳಿಕ ಇಬ್ಬರೂ ನಾನೊಂದು ತೀರ ನೀನೊಂದು ತೀರ ಎಂಬಂತಿದ್ದರು. ಬಳಿಕ ನಾವು ಜಸ್ಟ್ ಫ್ರೆಂಡ್ಸ್ ಎಂದು ರಾಖಿ ಹೇಳಿಕೆ ಕೊಟ್ಟಿದ್ದರು. ಇದಾದ ನಂತರದಲ್ಲಿ ಏಕಾಏಕಿ ಪ್ರೇಮಿಗಳ ದಿನಕ್ಕೆ ಒಂದೇ ದಿನ ಮುಂಚೆ ಎಂದರೆ ಫೆಬ್ರವರಿ 13ರಂದು ರಾಕೇಶ್​ನಿಂದ ಬೇರೆಯಾಗುವುದಾಗಿ ನಟಿ ಪ್ರಕಟಿಸಿದ್ದರು.

ಇದೀಗ ಆದಿಲ್ ದುರಾನಿ ಜೊತೆ ರಾಖಿ ಸಾವಂತ್​ ಮದುವೆಯಾಗಿದ್ದಾರೆ ಎನ್ನಲಾದ ಫೋಟೋಗಳು ವೈರಲ್​ ಆಗುವ ಮೂಲಕ ರಾಖಿ ಮದುವೆ ವಿಷಯವು ಮತ್ತೆ ಮನ್ನಲೆಗೆ ಬಂದಿದೆ. ಆದರೆ, ಈ ಸುದ್ದಿಯನ್ನು ಸಾವಂತ್​ ಆಗಲಿ ಅಥವಾ ಆದಿಲ್​ ಆಗಲಿ ಇನ್ನೂ ಖಚಿತಪಡಿಸಿಲ್ಲ. ಕಳೆದ ವಾರ ರಾಖಿ ತನ್ನ ತಾಯಿ ಬ್ರೈನ್ ಟ್ಯೂಮರ್‌ನಿಂದ ಬಳಲುತ್ತಿರುವ ಸುದ್ದಿಯನ್ನು ಹಂಚಿಕೊಂಡಿದ್ದರು. ತನ್ನ ತಾಯಿಗಾಗಿ ಪ್ರಾರ್ಥಿಸುವಂತೆ ಅಭಿಮಾನಿಗಳಿಗೆ ರಾಖಿ ವಿಡಿಯೋದಲ್ಲಿ ಭಾವನಾತ್ಮಕವಾಗಿ ಮನವಿ ಮಾಡಿದ್ದರು.

ಇದನ್ನೂ ಓದಿ: ರಾಖಿ ಸಾವಂತ್- ಶೆರ್ಲಿನ್ ಚೋಪ್ರಾ ಕೆಸರೆರಚಾಟ: ಇಬ್ಬರ ವಿರುದ್ಧವೂ ಕೇಸು ದಾಖಲು