ಮುಂಬೈ: ಲೈಂಗಿಕ ಅಲ್ಪಸಂಖ್ಯಾತರೆಂದು ಕರೆಸಿಕೊಳ್ಳುವ ಲೆಸ್ಬಿಯನ್, ಸಲಿಂಗಕಾಮಿಗಳು, ದ್ವಿಲಿಂಗಿ ಮತ್ತು ತೃತೀಯಲಿಂಗಿ ಸೇರಿದಂತೆ ಎಲ್ಲ ಸಮುದಾಯದವರ (LGBTQ+) ದನಿಗಳಿಗೆ ಬೆಂಬಲ ನೀಡುವ ಉದ್ದೇಶದಿಂದ ಜೂನ್ ಇಡೀ ತಿಂಗಳು 'ಪ್ರೈಡ್ ಮಾಸ' ಎಂದು ಆಚರಿಸಲಾಗುತ್ತದೆ. ಜೂನ್ 1 ರಿಂದ ಜೂನ್ 30 ರವರೆಗೆ ಈ ಸಂಭ್ರಮವನ್ನು ಆಚರಿಸಲಾಗುತ್ತದೆ. ಭಿನ್ನ ಲೈಂಗಿಕ ಅಭಿವ್ಯಕ್ತಿಯನ್ನು ಸಂಭ್ರಮಿಸುವ ಈ ಸಮುದಾಯವು ಮೆರವಣಿಗೆಯಂತಹ ಸಭೆ-ಸಮಾರಂಭಗಳನ್ನು ಮಾಡುವ ಮೂಲಕ ಆಚರಿಸುವುದು ವಾಡಿಕೆ.
ಈ ತಿಂಗಳು ಉತ್ಸವ ಮಾಡುವ ಮೂಲಕ ತಮ್ಮ ಸಮುದಾಯದ ಬಗ್ಗೆ ಅರಿವು ಸಹ ಮೂಡಸಲಾಗುತ್ತದೆ. ತಾವು ಎದುರಿಸುತ್ತಿರುವ ಅವಮಾನ, ದಬ್ಬಾಳಿಕೆಗಳನ್ನು ಬದಿಗಿಟ್ಟು ಜೂನ್ ತಿಂಗಳನ್ನು ಹೆಮ್ಮೆಯ ತಿಂಗಳು ಎಂದು ಸ್ಮರಿಸುತ್ತಾರೆ. ಇದೇ ಸಮುದಾಯವನ್ನು ಕೇಂದ್ರವಾಗಿಟ್ಟುಕೊಂಡು ಬಾಲಿವುಡ್ನ ಕೆಲವು ನಿರ್ದೇಶಕರು ಸಿನಿಮಾಗಳನ್ನು ಮಾಡಿದ್ದಾರೆ. ದೊಡ್ಡ ಪರದೆ ಮೇಲೆ ತೆರೆಕಂಡ ಹಲವು ಚಿತ್ರಗಳು ಪ್ರೇಕ್ಷಕರ ಗಮನ ಕೂಡ ಸೆಳೆದಿದೆ. ಈ ವಿಭಿನ್ನ ಸಮುದಾಯದ ವಿಶೇಷತೆ ಹೇಳುವ ಬಾಲಿವುಡ್ನ ಟಾಪ್ 5 ಸಿನಿಮಾಗಳು ಇಲ್ಲಿವೆ.
ಬಧಾಯಿ ದೋ: ಹರ್ಷವರ್ಧನ್ ಕುಲಕರ್ಣಿ ನಿರ್ದೇಶನದ ಬಧಾಯಿ ದೋ ಚಿತ್ರ ಇದೇ ಸಮುದಾಯದ ಕಥೆಯನ್ನು ಒಳಗೊಂಡಿದೆ. ಚಿತ್ರದಲ್ಲಿ ರಾಜ್‌ಕುಮಾರ್ ರಾವ್ ಮತ್ತು ಭೂಮಿ ಪೆಡ್ನೇಕರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಲಿಂಗ ಸಂಬಂಧದ ಸುತ್ತ ಹೆಣೆದಿರುವ ಚಿತ್ರಕಥೆ ಇದಾಗಿದ್ದು 'ಲ್ಯಾವೆಂಡರ್ ಮದುವೆ' (ಅನುಕೂಲತೆಯ ವಿವಾಹ)ಬಗ್ಗೆ ಪ್ರಸ್ತಾಪಿಸಲಾಗಿದೆ. ಚಿತ್ರದಲ್ಲಿ ನಟ ರಾಜ್ ಕುಮಾರ್ ರಾವ್ ಅವರು ಪೊಲೀಸ್ ಪಾತ್ರದಲ್ಲಿ ನಟಿಸಿದರೆ, ಭೂಮಿ ಪೆಡ್ನೇಕರ್ ಪಿಟಿ ಶಿಕ್ಷಕಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ತಮಗಿಷ್ಟವಾದವರ ಜೊತೆ ಮದುವೆಯಾಗುವ ಬಗ್ಗೆಯೂ ಚಿತ್ರ ಹೇಳುತ್ತದೆ. ಪರಸ್ಪರ ಮದುವೆಯಾಗಲು ನಿರ್ಧರಿಸಿದ ಇಬ್ಬರು ಸಲಿಂಗಕಾಮಿಗಳು ಸಾಮಾಜದಲ್ಲಿ ಏನೆಲ್ಲ ಸಮಸ್ಯೆಗಳನ್ನು ಎದುರಿಸುತ್ತಾರೆ, ಯಾವುದಕ್ಕೆಲ್ಲ ರಾಜೀ ಮಾಡಿಕೊಳ್ಳುತ್ತಾರೆ ಅನ್ನೋದೆ ಬಧಾಯಿ ದೋ ಚಿತ್ರ.
ಅಲಿಗಢ: ಹನ್ಸಲ್ ಮೆಹ್ತಾ ನಿರ್ದೇಶನದ ಈ ಚಲನಚಿತ್ರವು 2015ರಲ್ಲಿ ಬಿಡುಗಡೆಯಾಯಿತು. ಮನೋಜ್ ಬಾಜಪೇಯಿ ನಟನೆಯ ಈ ಚಿತ್ರ ಪ್ರೊಫೆಸರ್ ರಾಮಚಂದ್ರ ಸಿರಸ್ ಅವರ ನೈಜ ಘಟನೆಯನ್ನು ಆಧರಿಸಿದೆ. ಇದು ಕೂಡ ಸಲಿಂಗಕಾಮಿಯ ಬಗ್ಗೆಯೆ ಹೇಳುತ್ತದೆ. ಪ್ರೊಫೆಸರ್ ಶ್ರೀನಿವಾಸ್ ರಾಮಚಂದ್ರ ಸಿರಸ್ ಅವರು ಓರ್ವ ಆಟೋ ಚಾಲಕನೊಬ್ಬನೊಂದಿಗೆ ಲೈಂಗಿಕ ಪ್ರೀತಿಯ ಸಂಬಂಧ ಹೊಂದಿದ್ದರಂತೆ. ಈ ಆರೋಪ ಕೇಳಿ ಬಂದ ಬಳಿಕ ಅವರನ್ನು ಕೆಲಸದಿಂದ ವಜಾ ಮಾಡಲಾಗಿತ್ತು. ಅಲಿಗಢ ಚಿತ್ರ ಇದೇ ಘಟನೆಯನ್ನು ಹೇಳುತ್ತದೆ.
ರಾಮಚಂದ್ರ ಸಿರಸ್ ಪಾತ್ರಕ್ಕೆ ಮನೋಜ್ ಬಾಜಪೇಯಿ ಬಣ್ಣ ಹಚ್ಚಿದ್ದಾರೆ. ಸಲಿಂಗ ಸಂಬಂಧದ ಸುದ್ದಿ ಹಬ್ಬದಿ ಬಳಿಕ ಅವರು ಸಮಾಜವನ್ನು ಹೇಗೆ ಎದುರಿಸುತ್ತಾರೆ? ಏನೆಲ್ಲ ಸಮಸ್ಯೆ ಎದುರಿಸುತ್ತಾರೆ? ಅನ್ನೋದನ್ನು ಸೆರೆ ಹಿಡಿಯಲಾಗಿದೆ. ಈ ಚಿತ್ರಕ್ಕೆ ಹಲವು ಪ್ರಶಸ್ತಿಗಳು ಲಭಿಸಿವೆ. ಸಿರಸ್ ಅವರಿಗೆ ನ್ಯಾಯ ಕೊಡಿಸುವ ದೀಪು ಸೆಬಾಸ್ಟಿಯನ್ ಎಂಬ ಪತ್ರಕರ್ತನ ಪಾತ್ರದಲ್ಲಿ ರಾಜ್‌ಕುಮಾರ್ ರಾವ್ ನಟಿಸಿದ್ದಾರೆ. ಚಿತ್ರ ಬಿಡುಗಡೆಗೂ ಮುನ್ನ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತು.
ಏಕ್ ಲಡ್ಕಿ ಕೋ ದೇಖಾ ತೋ ಐಸಾ ಲಗಾ: ಇದು ಕೂಡ ಸಲಿಂಗ ಪ್ರೇಮ ಸಂಬಂಧ ಹೇಳುವ ಚಿತ್ರವಾಗಿದೆ. ಶೆಲ್ಲಿ ಚೋಪ್ರಾ ಧಾರ್ ಚಿತ್ರಕ್ಕೆ ನಿರ್ದೇಶನ ಹೇಳಿದ್ದು ಸೋನಮ್ ಕಪೂರ್, ಜೂಹಿ ಚಾವ್ಲಾ, ಅನಿಲ್ ಕಪೂರ್ ಮತ್ತು ರಾಜ್‌ಕುಮಾರ್ ರಾವ್ ನಟಿಸಿದ್ದಾರೆ. ಚಿತ್ರದಲ್ಲಿ ಅಕ್ಷಯ್ ಒಬೆರಾಯ್ ಮತ್ತು ರೆಜಿನಾ ಕಸ್ಸಂದ್ರ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸ್ವೀಟಿ ಚೌಧರಿ ಎಂಬ ಹುಡುಗಿಯ ಸುತ್ತ ಈ ಚಿತ್ರಕಥೆಯನ್ನು ಹೆಣೆಯಲಾಗಿದೆ. ಬಾಲ್ಯದಲ್ಲಿದ್ದ ಭಾವನೆ ಬೆಳೆದ ಬಳಿಕ ಏನೆಲ್ಲ ಆಗುತ್ತದೆ ಅನ್ನೋದನ್ನು ಈ ಚಿತ್ರದಲ್ಲಿ ಹೇಳಲಾಗಿದೆ.
ಶುಭ್ ಮಂಗಲ್ ಜ್ಯಾದಾ ಸಾವಧಾನ್: ಈ ಚಿತ್ರ ಕೂಡ ಅದೇ ಸಮುದಾಯದವನ್ನು ಪ್ರಮುಖವಾಗಿಟ್ಟುಕೊಂಡು ತೆರೆಕಂಡಿದೆ. ಚಿತ್ರದಲ್ಲಿ ನಟರಾದ ಆಯುಷ್ಮಾನ್ ಖುರಾನಾ, ಜಿತೇಂದ್ರ ಕುಮಾರ್, ಗಜರಾಜ್ ರಾವ್ ಮತ್ತು ನೀನಾ ಗುಪ್ತಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರವು 2020 ರಲ್ಲಿ ಬಿಡುಗಡೆಯಾಯಿತು. ಸಲಿಂಗ ವಿವಾಹದ ವಿಷಯವನ್ನು ಕೇಂದ್ರೀಕರಿಸಲಾಗಿದೆ.
ಮಾರ್ಗರಿಟಾ ವಿತ್ ಎ ಸ್ಟ್ರಾ: ಮಾರ್ಗರಿಟಾ ವಿತ್ ಎ ಸ್ಟ್ರಾ ಚಿತ್ರವು ಸಲಿಂಗಕಾಮ ಮತ್ತು ಅಂಗವೈಕಲ್ಯ ಎಂಬ ಎರಡು ಸಮಸ್ಯೆಗಳನ್ನು ಎತ್ತಿ ತೋರಿಸುವ ಚಿತ್ರವಾಗಿದೆ. ವಯಾಕಾಮ್ 18 ಮೋಷನ್ ಪಿಕ್ಚರ್ಸ್ ಸಹಭಾಗಿತ್ವದಲ್ಲಿ ಚಿತ್ರ ನಿರ್ಮಾಣಗೊಂಡಿದೆ. ಶೋನಾಲಿ ಬೋಸ್ ನಿರ್ದೇಶಿಸಿದ ಈ ಚಿತ್ರದಲ್ಲಿ ಕಲ್ಕಿ ಕೋಚ್ಲಿನ್, ರೇವತಿ, ಸಯಾನಿ ಗುಪ್ತಾ, ವಿಲಿಯಂ ಮೊಸ್ಲಿ ನಟಿಸಿದ್ದಾರೆ. ಸೆರೆಬ್ರಲ್ ಪಾಲ್ಸಿ ಹೊಂದಿರುವ ಲೈಲಾ ಎಂಬ ಪಾತ್ರದಲ್ಲಿ ಕಲ್ಕಿ ಕೊಚ್ಲಿನ್ ಕಾಣಿಸಿಕೊಂಡಿದ್ದಾರೆ. ಚಿತ್ರವು ಸಲಿಂಗಕಾಮಿ ಲೈಂಗಿಕತೆಯ ಜೊತೆಗೆ ಅಂಗವೈಕಲ್ಯ ಹೊಂದಿದವರು ಯಾವೆಲ್ಲ ಸಮಸ್ಯೆ ಎದಿರಿಸುತ್ತಾರೆ ಅನ್ನೋದನ್ನು ಹೇಳುತ್ತದೆ.
ಇದನ್ನೂ ಓದಿ: ಧೂಮಪಾನ ಮಾಡದ ಸೆಲೆಬ್ರಿಟಿಗಳು: ಮೊದಲು ಧೂಮಪಾನಕ್ಕೆ ದಾಸರಾಗಿದ್ದ ಈ ಸ್ಟಾರ್ಗಳು ಯಾವ ಕಾರಣಕ್ಕೆ ಬಿಟ್ಟರು ಗೊತ್ತಾ?
