ದೇಶದ ಮಾಜಿ ಪ್ರಧಾನಿ, ದಿವಂಗತ ಅಟಲ್ ಬಿಹಾರಿ ವಾಜಪೇಯಿ ಅವರ ಜೀವನಾಧಾರಿತ ಚಲನ ಚಿತ್ರ ಸಿದ್ಧವಾಗುತ್ತಿದೆ. ಈ ಚಿತ್ರವನ್ನು ವಿನೋದ್ ಭಾನುಶಾಲಿ ಮತ್ತು ಸಂದೀಪ್ ಸಿಂಗ್ ಒಟ್ಟಾಗಿ ನಿರ್ಮಾಣ ಮಾಡಲಿದ್ದಾರೆ. ಮೈನ್ ರಹೂನ್ ಯಾ ನಾ ರಹೂನ್, ಯೇ ದೇಶ್ ರೆಹನಾ ಚಾಹಿಯೇ - ATAL (Main Rahoon Ya Na Rahoon, Yeh Desh Rehna Chahiye: ATAL) ಚಿತ್ರದ ಟೈಟಲ್. ಅಟಲ್ ಬಿಹಾರಿ ವಾಜಪೇಯಿ ಪಾತ್ರವನ್ನು ನಟ ಪಂಕಜ್ ತ್ರಿಪಾಠಿ ನಿರ್ವಹಿಸಲಿದ್ದಾರೆ ಎಂದು ಚಿತ್ರತಂಡ ಇಂದು ತಿಳಿಸಿದೆ.
- " class="align-text-top noRightClick twitterSection" data="
">
ಅಟಲ್ ಬಿಹಾರಿ ವಾಜಪೇಯಿ ಅವರಂತಹ ಅಪ್ರತಿಮ ವ್ಯಕ್ತಿತ್ವದ ಪಾತ್ರವನ್ನು ನಿರ್ವಹಿಸುವುದು ಬಹಳ ಸಂತೋಷಕರ ಮತ್ತು ಗೌರವದ ವಿಷಯ. ಅವರು ಕೇವಲ ರಾಜಕಾರಣಿಯಾಗಿರಲಿಲ್ಲ, ಅತ್ಯುತ್ತಮ ಬರಹಗಾರ ಮತ್ತು ಹೆಸರಾಂತ ಕವಿಯಾಗಿದ್ದರು. ಅವರ ಪಾತ್ರದಲ್ಲಿ ನಟಿಸುವುದು ನನಗೆ ಸಿಕ್ಕಿರುವ ಭಾಗ್ಯ ಎಂದು ನಟ ಪಂಕಜ್ ತ್ರಿಪಾಠಿ ತಿಳಿಸಿದರು.
ಮರಾಠಿ ಚಲನಚಿತ್ರಗಳಾದ ನಟರಂಗ್ ಮತ್ತು ಬಲ್ಗಂಧರ್ವ ಖ್ಯಾತಿಯ ರವಿ ಜಾಧವ್ ಈ ಚಿತ್ರವನ್ನು ನಿರ್ದೇಶಿಸಲಿದ್ದಾರೆ. ಈ ಮೊದಲು ಮೂರು ಬಾರಿ ರಾಷ್ಟ್ರ ಪ್ರಶಸ್ತಿ ಪಡೆದಿದ್ದು, ಮರಾಠಿ ಚಿತ್ರರಂಗದಲ್ಲಿ ಸಾಕಷ್ಟು ಖ್ಯಾತಿ ಗಳಿಸಿದ್ದಾರೆ. ಚಿತ್ರ ನಿರ್ದೇಶಿಸಲಿರುವ ಬಗ್ಗೆ ಮಾತನಾಡಿರುವ ಅವರು, ''ಓರ್ವ ನಿರ್ದೇಶಕನಾಗಿ ಅಟಲ್‌ಜಿ ಕಥೆಗಿಂತ ಉತ್ತಮವಾದ ಕಥೆಯನ್ನು ನಾನು ಕೇಳಲು ಸಾಧ್ಯವಿಲ್ಲ. ಪಂಕಜ್ ತ್ರಿಪಾಠಿಯಂತಹ ಆದರ್ಶ ನಟನನ್ನು ನಿರ್ಮಾಪಕರ ಬೆಂಬಲದೊಂದಿಗೆ ತೆರೆ ಮೇಲೆ ಉತ್ತಮವಾಗಿ ತರಲು ಪ್ರಯತ್ನಿಸುತ್ತೇನೆ'' ಎಂದು ತಿಳಿಸಿದರು.
ವಾಜಪೇಯಿ ಪಾತ್ರಕ್ಕೆ ಪಂಕಜ್ ತ್ರಿಪಾಠಿ ಸೂಕ್ತ ಆಯ್ಕೆ ಎಂದು ಚಿತ್ರತಂಡ ಸರ್ವಾನುಮತದಿಂದ ಭಾವಿಸಿದೆ ಎಂದು ನಿರ್ಮಾಪಕ ವಿನೋದ್ ಭಾನುಶಾಲಿ ತಿಳಿಸಿದರು. ಭಾರತದ ಅತ್ಯುತ್ತಮ ನಟರಲ್ಲಿ ಒಬ್ಬರು ಈ ಪಾತ್ರವನ್ನು ನಿರ್ವಹಿಸುತ್ತಿರುವುದಕ್ಕೆ ನಾವು ಸಂತೋಷಪಡುತ್ತೇವೆ. ನಮ್ಮಲ್ಲಿ ಅಸಾಧಾರಣ ನಿರ್ದೇಶಕ ರವಿ ಜಿ ಕೂಡ ಇದ್ದಾರೆ. ಅವರು ನಮ್ಮ ಆದರ್ಶ ನಾಯಕನ ಕಥೆಯನ್ನು ಸುಂದರವಾಗಿ ತರುತ್ತಾರೆ ಎಂದು ನಮಗೆ ನಂಬಿಕೆ ಇದೆ ಎಂದು ಅವರು ಹೇಳಿದರು.
ಇದನ್ನೂ ಓದಿ: ತೆರೆಗೆ ಬರಲಿದೆ 'ಅಟಲ್' ಜೀವನಾಧಾರಿತ ಸಿನಿಮಾ; ನಟನ ಹುಡುಕಾಟದಲ್ಲಿ ನಿರ್ಮಾಪಕರು
ವಾಜಪೇಯಿಯವರ 99ನೇ ಜನ್ಮದಿನದಂದು ಅಂದರೆ 2023ರ ಕ್ರಿಸ್‌ಮಸ್ ಸಂದರ್ಭದಲ್ಲಿ ಈ ಚಿತ್ರವನ್ನು ಬಿಡುಗಡೆ ಮಾಡುವ ಗುರಿಯನ್ನು ಚಿತ್ರತಂಡ ಹೊಂದಿದೆ ಎಂದು ನಿರ್ಮಾಪಕ ಸಂದೀಪ್ ಸಿಂಗ್ ಹೇಳಿದ್ದಾರೆ. ATAL ಅನ್ನು ಭಾನುಶಾಲಿ ಸ್ಟುಡಿಯೋಸ್ ಲಿಮಿಟೆಡ್ ಮತ್ತು ಲೆಜೆಂಡ್ ಸ್ಟುಡಿಯೋಸ್ ಪ್ರಸ್ತುತಪಡಿಸಲಿದೆ.
