ಆಸ್ಕರ್​ ಪ್ರಶಸ್ತಿ ಗೆದ್ದವರಿಗೆ, ನಾಮಿನಿಗಳಿಗೆ ಕೋಟಿ ಮೌಲ್ಯದ ವಿಶೇಷ ಗಿಫ್ಟ್: ​ಅದರಲ್ಲೇನಿದೆ ಗೊತ್ತಾ?

ಆಸ್ಕರ್​ ಪ್ರಶಸ್ತಿ ವಿಜೇತರಿಗೆ ಮತ್ತು ನಾಮಿನಿಗೆ ಡಿಸ್ಟಿಂಕ್ಟಿವ್ ಅಸ್ಸೆಟ್ ಹೆಸರಿನ ಸಂಸ್ಥೆಯು ಕೋಟಿ ರೂಪಾಯಿ ಮೌಲ್ಯದ ಗಿಫ್ಟ್​ ಬ್ಯಾಗ್​ ನೀಡಿದೆ. ಅದರಲ್ಲಿ ಸೌಂದರ್ಯವರ್ಧಕ ಸೇರಿದಂತೆ ದುಬಾರಿ ಬೆಲೆಯ ಗಿಫ್ಟ್​ಗಳಿವೆ.

ಚೆನ್ನೈ: ಭಾರತೀಯ ಚಿತ್ರರಂಗಕ್ಕೆ ಇಂದು ಅದ್ಭುತ ಗಳಿಗೆ. ಪ್ಯಾನ್​ ಇಂಡಿಯಾ ಸಿನಿಮಾ ಆರ್​ಆರ್​ಆರ್​ನ ನಾಟು ನಾಟು ಹಾಡು, ದಿ ಎಲಿಫೆಂಟ್​ ವಿಸ್ಪರರ್ಸ್​ಗೆ ಆಸ್ಕರ್​ ಪ್ರಶಸ್ತಿ ದಕ್ಕಿದೆ. ಇದೇ ವೇಳೆ ಪ್ರಶಸ್ತಿ ಪಡೆದ ಮತ್ತು ವಂಚಿತರಾದ ಸಿನಿಮಾ ಮತ್ತು ವ್ಯಕ್ತಿಗಳಿಗೆ ಕೋಟ್ಯಂತರ ರೂಪಾಯಿ ಮೌಲ್ಯದ ಗಿಫ್ಟ್​ ಬ್ಯಾಗ್​ ಮಾತ್ರ ಸಿಕ್ಕಿದೆ.

ಪ್ರಶಸ್ತಿಗೆ ನಾಮಿನೇಟ್​ ಆದ ಸಿನಿಮಾ ಅಥವಾ ವ್ಯಕ್ತಿಗೆ ನೀಡಲಾದ ಗಿಫ್ಟ್​ ಬ್ಯಾಗ್​ನಲ್ಲಿ ದುಬಾರಿ ಬೆಲೆಯ ವಸ್ತುಗಳ ಜೊತೆಗೆ ಭಾರಿ ಮೌಲ್ಯದ ಗಿಫ್ಟ್​ ವೋಚರ್​ಗಳು ಕೂಡ ಸಿಕ್ಕಿವೆ. ಈ ಗಿಫ್ಟ್​ ಬ್ಯಾಗ್​ನ ಮೌಲ್ಯ 1.25 ಲಕ್ಷ ಡಾಲರ್​ ಆಗಿದೆ. ಅಂದರೆ 1.03 ಕೋಟಿ ರೂಪಾಯಿಗಳಾಗಿವೆ. ಈ ಬಾರಿ 23 ವಿಭಾಗಗಳಿಗೆ ಪ್ರಶಸ್ತಿ ನೀಡಲಾಗಿದ್ದು, 23 ವಿಭಾಗಗಳಿಗೆ 120 ಕ್ಕಿಂತಲೂ ಹೆಚ್ಚಿನ ಸಿನಿಮಾ ಅಥವಾ ವ್ಯಕ್ತಿಗಳು ಪ್ರಶಸ್ತಿಗಾಗಿ ನಾಮಿನೇಟ್ ಆಗಿದ್ದರು. ಅವರೆಲ್ಲರಿಗೂ ಈ 1 ಕೋಟಿಗೂ ಹೆಚ್ಚು ಬೆಲೆಯ ಗಿಫ್ಟ್ ಬ್ಯಾಗ್​ ಉಡುಗೊರೆಯಾಗಿ ನೀಡಲಾಗಿದೆ.

ಡಿಸ್ಟಿಂಕ್ಟಿವ್ ಅಸ್ಸೆಟ್ ಹೆಸರಿನ ಸಂಸ್ಥೆಯು ಈ ಗಿಫ್ಟ್ ಬ್ಯಾಗ್​ಗಳನ್ನು ನೀಡಿದೆ. ಇದಕ್ಕೆ ‘ಎವರಿಬಡಿ ವಿನ್ಸ್’ ಎಂದು ಹೆಸರಿಸಲಾಗಿದೆ. 16 ಡಾಲರ್ ಬೆಲೆಯ ಚಾಕೊಲೇಟ್​ನಿಂದ ಹಿಡಿದು 40 ಸಾವಿರ ಡಾಲರ್ ಮೌಲ್ಯದ ಗಿಫ್ಟ್ ವೋಚರ್​ಗಳನ್ನು ಇದು ಒಳಗೊಂಡಿದೆ. ಗಿಫ್ಟ್ ಬ್ಯಾಗ್​ ಪಡೆದವರು ವಿಮಾನದಲ್ಲಿ ಅದನ್ನು ಹೊತ್ತೊಯ್ಯಲು ಅನುಕೂಲವಾಗುವಂತೆ ವ್ಯವಸ್ಥಿತವಾಗಿ ಎರಡು ಸೂಟ್​ಕೇಸ್​ಗಳಲ್ಲಿ ಪ್ಯಾಕ್ ಮಾಡಿ ನೀಡಲಾಗಿದೆ. ನಾಮಿನಿಗಳು ಉಳಿದುಕೊಂಡಿರುವ ಹೋಟೆಲ್​ಗೇ ಅಸ್ಸೆಟ್ ಸಂಸ್ಥೆಯವರು ಗಿಫ್ಟ್ ಬ್ಯಾಗ್​​ಗಳನ್ನು ತಂದು ನೀಡಿದ್ದಾರೆ.

ಗಿಫ್ಟ್ ಬ್ಯಾಗ್​​ನಲ್ಲಿ 9000 ಡಾಲರ್ ಬೆಲೆಯ ವೋಚರ್ ಇದೆ. ಈ ವೋಚರ್ ಬಳಸಿ ಇಟಲಿಯ ಫಾರಾ ಪುಂಟಾ ಇಂಪೆರೆಟರ್ ಹೋಟೆಲ್​ನಲ್ಲಿ ಮೂರು ರಾತ್ರಿ-ಮೂರು ಹಗಲು ತಂಗಬಹುದು. 40,000 ವೋಚರ್ ಬಳಸಿ ಕೆನಡಾದ ಐಷಾರಾಮಿ ಒಟ್ಟಾಯ ಪ್ರಾಪರ್ಟಿಯಲ್ಲಿ ಕೆಲ ದಿನ ತಂಗಬಹುದು. ಅದೂ ಪ್ರಶಸ್ತಿ ರೇಸ್​ನ ನಾಮಿನಿ ಸೇರಿದಂತೆ ಅವರ ಏಳು ಗೆಳೆಯರೊಟ್ಟಿಗೆ ಎಂಜಾಯ್​ ಮಾಡಬಹುದು.

ಗಿಫ್ಟ್​ ಬ್ಯಾಗ್​ನಲ್ಲಿ ಇನ್ನೂ ಏನೇನಿವೆ?: ಡಾ ಥಾಮಸ್ ಸೂ ಸಂಸ್ಥೆಯ 12 ಸಾವಿರ ಡಾಲರ್ ಮೌಲ್ಯದ ತ್ವಚೆ ಅಂದಗಾಣಿಸುವ ಉತ್ಪನ್ನಗಳ ಕಿಟ್, ಕೂದಲ ಆರೋಗ್ಯಕ್ಕೆ ಬೇಕಾದ ವಸ್ತುಗಳು ಹಾಗೂ ವೈದ್ಯರ ಕನ್ಸಲ್ಟೇಶನ್​ ವೋಚರ್, 10 ಸಾವಿರ ಡಾಲರ್ ಮೌಲ್ಯದ ಆರೋಗ್ಯ ಹಾಗೂ ಸೌಂದರ್ಯಕ್ಕೆ ಸಂಬಂಧಿಸಿದ ವಸ್ತುಗಳು ಹಾಗೂ ಚಿಕಿತ್ಸಾ ಕ್ರಮಗಳ ಮಾಹಿತಿ ಹಾಗೂ ಕೆಲವು ಸೋಪುಗಳು, ಟಿ ಶರ್ಟ್, ಚಪ್ಪಲಿ, ಟೋಪಿ, ಚಾಕೊಲೇಟ್​ ಗಳನ್ನು ಈ ಗಿಫ್ಟ್ ಬ್ಯಾಗ್​ ಒಳಗೊಂಡಿದೆ. ಗಿನ್ಝಾ ನಿಶಿಕಾವಾದಿಂದ 13.56 ಡಾಲರ್​ ಮೌಲ್ಯದ ಪ್ಯಾಕ್ ಕ್ಲಿಫ್ ಥಿನ್ಸ್ ಮತ್ತು 18 ಡಾಲರ್​ ಬೆಲೆಯ ಜಪಾನೀಸ್ ಹಾಲಿನ ಬ್ರೆಡ್ ಗಿಫ್ಟ್ ಐಟಂ ಕೂಡ ಇದೆ.

ಈ ಗಿಫ್ಟ್ ಬ್ಯಾಗ್​​ಗಳ ಮೇಲೆ ತೆರಿಗೆಯನ್ನು ಗಿಫ್ಟ್ ಪಡೆದವರೇ ತೆರಬೇಕಾಗುತ್ತದೆ. ತೆರಿಗೆ ಮೊತ್ತ ಆಯಾ ದೇಶದ ತೆರಿಗಾ ವಿಧಾನ ಹಾಗೂ ಮೊತ್ತದ ಮೇಲೆ ನಿರ್ಣಯವಾಗಿರುತ್ತದೆ. ಕುತೂಹಲಕಾರಿ ವಿಷಯವೆಂದರೆ 2016 ರ ಪ್ರಶಸ್ತಿ ಸಮಾರಂಭದ ವೇಳೆ ನೀಡಲಾದ ಗಿಫ್ಟ್ ಬ್ಯಾಗ್‌ನಲ್ಲಿ ಲೈಂಗಿಕ ಆಟಿಕೆಗಳು, ಗಾಂಜಾ ವೇಪ್ ಪೆನ್‌ಗಳು ಇಡಲಾಗಿತ್ತು. ಕಂಪನಿಯ ಈ ಗಿಫ್ಟ್​ಗಳು ಪ್ರಶಸ್ತಿ ಸಮಿತಿಯ ಟೀಕೆಗೆ ಗುರಿಯಾಗಿತ್ತು. ಇದು ವಿವಾದಕ್ಕೆ ಕಾರಣವಾದ ಬಳಿಕ ಆಸ್ಕರ್​ ಅಕಾಡೆಮಿ ವಿವಾದಿತ ಗಿಫ್ಟ್​ಗಳನ್ನು ಇನ್ನು ಮುಂದೆ ಅನುಮತಿಸಲಾಗುವುದಿಲ್ಲ ಎಂದು ಹೇಳಿತ್ತು.

ಓದಿ: ಆಸ್ಕರ್​ ವಿಜೇತ ಚಿತ್ರಗಳು ಓಟಿಟಿಯಲ್ಲಿ ಬಿಡುಗಡೆ: ಇಲ್ಲಿದೆ ಕಂಪ್ಲೀಟ್​ ಡಿಟೇಲ್ಸ್