'ಹನುಮಂತ ದೇವರಲ್ಲ': ಪೊಲೀಸರ ಭದ್ರತೆಯಲ್ಲಿರುವಾಗ ಆದಿಪುರುಷ್​​ ಸಂಭಾಷಣೆ ಬರಹಗಾರ ಮನೋಜ್ ಮುಂತಶಿರ್ ಶುಕ್ಲಾ ಹೇಳಿಕೆ

'ಹನುಮಂತ ದೇವರಲ್ಲ, ಅವರು ಕೇವಲ ರಾಮನ ಭಕ್ತರಾಗಿದ್ದರು' ಎಂದು ಆದಿಪುರುಷ್​​ ಚಿತ್ರಕ್ಕೆ ಸಂಭಾಷಣೆ ಬರೆದ ಮನೋಜ್ ಮುಂತಶಿರ್ ಶುಕ್ಲಾ ತಿಳಿಸಿದ್ದಾರೆ.

ಮೂರೇ ದಿನದಲ್ಲಿ 300 ಕೋಟಿ ರೂ. ಗಡಿ ದಾಟಿ ಇದೀಗ ಕಳಪೆ ಪ್ರದರ್ಶನ ಕಾಣುತ್ತಿರುವ ಆದಿಪುರುಷ್​​ ಚಿತ್ರಕ್ಕೆ ದೇಶವಲ್ಲದೇ ಹೊರದೇಶಗಳಲ್ಲೂ ಟೀಕೆ ವ್ಯಕ್ತವಾಗುತ್ತಿದೆ. ರಾಮಾಯಣದ ಹೆಸರಿನಲ್ಲಿ 'ಆದಿಪುರುಷ್' ಸಿನಿಮಾ​​ ಮಾಡುವ ಮೂಲಕ ಸನಾತನ ಸಂಸ್ಕೃತಿಯನ್ನು ನಾಶ ಮಾಡಿದ್ದಾರೆ ಎನ್ನುತ್ತಾರೆ ಕೆಲ ಹಿರಿಯ ಹಿರಿಯ ಕಲಾವಿದರು. ಚಿತ್ರಕ್ಕೆ ದೇಶಾದ್ಯಂತ ವಿರೋಧ ವ್ಯಕ್ತವಾಗುತ್ತಿದ್ದು, ಬ್ಯಾನ್​ ಮಾಡುವಂತೆ ಪ್ರಧಾನಿಗೆ ಪತ್ರ ಕೂಡ ಹೋಗಿದೆ.

'ಹನುಮಂತ ದೇವರಲ್ಲ'.. ರಾಮ, ರಾವಣ, ಹನುಮಂತನ ನೋಟ, ಡೈಲಾಗ್ಸ್​ಗೆ ಸಂಬಂಧಿಸಿದಂತೆ ಹಲವು ಪ್ರೇಕ್ಷಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಚಿತ್ರದ ನಿರ್ದೇಶಕ ಓಂ ರಾವುತ್ ಮತ್ತು ಸಂಭಾಷಣೆ ಬರೆದ ಮನೋಜ್ ಮುಂತಶಿರ್ ಶುಕ್ಲಾ ಅವರ ಮೇಲೆ ಸಿನಿಪ್ರಿಯರು ಕಿಡಿಕಾರಿದ್ದಾರೆ. ಹಲವು ವಿವಾದಗಳನ್ನು ಎದುರಿಸುತ್ತಿವುದರ ನಡುವೆಯೇ ಮನೋಜ್ ಮುಂತಶಿರ್​ 'ಹನುಮಂತ ದೇವರಲ್ಲ' ಎಂದು ಹೇಳುವ ಮೂಲಕ ಭಕ್ತರನ್ನು ಕೆರಳಿಸಿದ್ದಾರೆ.

'ದೇವರಲ್ಲ, ರಾಮನ ಭಕ್ತ': ಸಂಭಾಷಣೆ ಬರಹಗಾರ ಮನೋಜ್ ಮುಂತಶಿರ್ ಶುಕ್ಲಾ ಅವರು ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ, ''ಹನುಮಂತ ದೇವರಲ್ಲ, ಆದರೆ ಅವರು ಭಗವಾನ್​ ಶ್ರೀರಾಮನ ಭಕ್ತರಾಗಿದ್ದರು. ನಾವು ಅವರನ್ನು ದೇವರಾಗಿ ಮಾಡಿದ್ದೇವೆ, ಅವರು ಶ್ರೀರಾಮನಂತೆ ತತ್ವಜ್ಞಾನಿ ಅಲ್ಲ' ಎಂದು ತಿಳಿಸಿದರು.

ಪೊಲೀಸ್​ ಭದ್ರತೆ ನಡುವೆ ಹೇಳಿಕೆ: ಭಾರಿ ಪ್ರತಿಭಟನೆಗಳ ನಡುವೆ ಮುಂಬೈ ಪೊಲೀಸರ ರಕ್ಷಣೆಯಲ್ಲಿರುವಾಗಲೇ ಮನೋಜ್ ಮುಂತಶಿರ್ ಶುಕ್ಲಾ ಅವರು ಈ ಹೇಳಿಕೆ ನೀಡಿದ್ದಾರೆ. ತಮ್ಮ ಜೀವಕ್ಕೆ ಅಪಾಯವಿರುವುದನ್ನು ಅರಿತ ಡೈಲಾಗ್​​ ರೈಟರ್​​​ ಮುಂಬೈ ಪೊಲೀಸರ ರಕ್ಷಣೆಗೆ ಒತ್ತಾಯಿಸಿದ್ದರು. ವಿಷಯದ ಗಂಭೀರತೆಯನ್ನು ಕಂಡ ಮುಂಬೈ ಪೊಲೀಸರು ಮನೋಜ್ ಅವರಿಗೆ ಭದ್ರತೆ ಒದಗಿಸಿದ್ದರು.

ಆದಿಪುರುಷ್​ ಬ್ಯಾನ್​ಗೆ ಒತ್ತಾಯ: ಡೈಲಾಗ್​ ಒಂದರ ಸಲುವಾಗಿ ನೇಪಾಳ ಸಿನಿಮಾ ಮೇಲೆ ಆಕ್ರೋಶ ವ್ಯಕ್ತಪಡಿಸಿ, ಚಿತ್ರ ಪ್ರದರ್ಶನವನ್ನು ನಿಷೇಧಿಸಿದೆ. ಇತ್ತ ನಮ್ಮ ಭಾರತದಲ್ಲಿಯೂ ಈ ಸಿನಿಮಾ ನಿಷೇಧಿಸಬೇಕು ಎಂಬ ಬೇಡಿಕೆ ವ್ಯಕ್ತವಾಗಿದೆ. ಆಲ್ ಇಂಡಿಯನ್ ಸಿನಿ ವರ್ಕರ್ಸ್ ಅಸೋಸಿಯೇಷನ್ ​​ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಮನವಿ ಪತ್ರವೊಂದನ್ನು ಬರೆದಿದೆ. ಸಿನಿಮಾ ಪ್ರದರ್ಶನ ನಿಷೇಧಿಸುವಂತೆ ಮತ್ತು ಮುಂದಿನ ದಿನಗಳಲ್ಲಿ ಡಿಜಿಟಲ್​​ ವೇದಿಕೆಗಳಲ್ಲಿ ಬರದಂತೆ ತಡೆ ನೀಡಬೇಕು ಎಂದು ಒತ್ತಾಯಿಸಿದೆ. ರಾಮಾಯಣವನ್ನು ತಪ್ಪಾಗಿ ತೋರಿಸಲಾಗಿದೆ. ಧಾರ್ಮಿಕ ಭಾವನೆಗಳಿಗೆ ನೋವುಂಟು ಮಾಡಿದೆ, ಮುಂದಿನ ದಿನಗಳಲ್ಲಿ ಮಕ್ಕಳಲ್ಲಿ ರಾಮಾಯಣದ ಬಗ್ಗೆ ತಪ್ಪು ಅಭಿಪ್ರಾಯವನ್ನು ಮೂಡಿಸುತ್ತದೆ. ಹಾಗಾಗಿ ಸಿನಿಮಾ ಪ್ರದರ್ಶನವನ್ನು ನಿಲ್ಲಿಸಿ ಎಂದು ಕೇಳಿಕೊಂಡಿದೆ.

ಇದನ್ನೂ ಓದಿ: Adipurush: ಆದಿಪುರುಷ ಕಲೆಕ್ಷನ್​​​ನಲ್ಲಿ ಇಳಿಕೆ.. ಐದನೇ ದಿನ ಪ್ರಭಾಸ್​​​​​ ಸಿನಿಮಾ ಗಳಿಸಿದ್ದೆಷ್ಟು?

ಕಳೆದ ಶುಕ್ರವಾರ ತೆರೆಕಂಡಿರುವ ಈ ಚಿತ್ರವನ್ನು ಓಂ ರಾವುತ್​ ನಿರ್ದೇಶಿಸಿದ್ದು, ಪ್ರಭಾಸ್​ ರಾಮನ​ ಪಾತ್ರದಲ್ಲಿ, ಕೃತಿ ಸನೋನ್​ ಸೀತೆ ಪಾತ್ರದಲ್ಲಿ, ರಾವಣನ ಪಾತ್ರದಲ್ಲಿ ಸೈಫ್ ಅಲಿ ಖಾನ್, ಸನ್ನಿ ಸಿಂಗ್ ಲಕ್ಷ್ಮಣನ ಪಾತ್ರದಲ್ಲಿ, ದೇವ್​ದತ್ತ ಹನುಮಂತನ ಪಾತ್ರದಲ್ಲಿ ನಟಿಸಿದ್ದಾರೆ. ಮೂರು ದಿನಗಳಲ್ಲಿ 300 ಕೋಟಿ ಗಳಿಸಿದ ಈ ಸಿನಿಮಾ ನಿನ್ನೆ ಕಲೆಕ್ಷನ್​ ಮಾಡಿದ್ದು ಕೇವಲ 10.80 ಕೋಟಿ ರೂಪಾಯಿ.