ಹೈದರಾಬಾದ್: ನಟ ಮಹೇಶ್ ಬಾಬು ಅಭಿನಯದ ಬಹು ನಿರೀಕ್ಷಿತ ಚಿತ್ರ 'ಗುಂಟೂರ್ ಖಾರಂ' ಇಂದು ಅಭಿಮಾನಿಗಳ ಸಂಭ್ರಮಾಚರಣೆಯೊಂದಿಗೆ ಭರ್ಜರಿಯಾಗಿ ತೆರೆ ಕಂಡಿದೆ. ಚಿತ್ರದ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಉತ್ತಮ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಎರಡು ವರ್ಷಗಳ ಅಂತರದ ಬಳಿಕ ನಟ ಮಹೇಶ್ ಬಾಬು ಅದ್ದೂರಿಯಾಗಿ ಬೆಳ್ಳೆತೆರೆ ಮೇಲೆ ಕಾಣಿಸಿಕೊಂಡಿದ್ದು, ಜನರು ಮೆಚ್ಚಿದ್ದಾರೆ.
ಚಿತ್ರ ಬಿಡುಗಡೆ ಮೊದಲ ದಿನದ ಬೆಳಗ್ಗೆ ತ್ರಿವಿಕ್ರಂ ಶ್ರೀನಿವಾಸ್ ಮತ್ತು ಎಸ್ ಥಾಮನ್ ಒಟ್ಟಿಗೆ ಚಿತ್ರ ವೀಕ್ಷಣೆ ಮಾಡಿದ್ದಾರೆ. ನಟ ಮಹೇಶ್ ಬಾಬು ಹೆಂಡತಿ ನಮ್ರತಾ ಮತ್ತು ಮಗಳು ಸಿತಾರಾ ಜೊತೆಯಲ್ಲಿ ಸುದರ್ಶನ್ ಥಿಯೇಟರ್ನಲ್ಲಿ ಮೊದಲ ಶೋ ವೀಕ್ಷಿಸಿದ್ದಾರೆ. ಈ ವೇಳೆ, ನಟನಿಗೆ ಅಭಿಮಾನಿಗಳು ಹೂವಿನ ಮಳೆ ಸುರಿಸಿ ಸ್ವಾಗತಿಸಿದ್ದು, ಈ ವಿಡಿಯೋವನ್ನು ಪ್ಯಾಪಾರಾಜಿಗಳು ವಿಡಿಯೋದಲ್ಲಿ ಸೆರೆ ಹಿಡಿದಿದ್ದಾರೆ.
ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಪ್ಯಾಪಾರಾಜಿಗಳು, ಸೂಪರ್ಸ್ಟಾರ್ ಮಹೇಶ್ ಬಾಬು ದೀರ್ಘಕಾಲದ ಬಳಿಕ ಸುದರ್ಶನ್ ಥಿಯೇಟರ್ನಲ್ಲಿ ಗುಂಟೂರ್ ಖಾರಂ ವೀಕ್ಷಣೆ ಮಾಡಿದ್ದಾರೆ. ನಟ ಥಿಯೇಟರ್ನಲ್ಲಿ ಕೆಂಪು ಬಣ್ಣದ ಶರ್ಟ್ನಲ್ಲಿ ಕ್ಯಾಶುವಲ್ ಲುಕ್ನಲ್ಲಿ ಕಂಡು ಬಂದಿದ್ದರೆ, ನಮ್ರತಾ ಪಿಂಕ್ ಬಣ್ಣದ ಉಡುಗೆಯಲ್ಲಿ ಕಂಗೊಳಿಸಿದರು. ಇನ್ನು ಮಗಳು ಸಿತಾರಾ ನೀಲಿ ಬಣ್ಣದ ಟೀ ಶರ್ಟ್ಗೆ ಬಿಳಿ ಬಣ್ಣದ ಜೀನ್ಸ್ ಪ್ಯಾಂಟ್ ತೊಟ್ಟಿದ್ದರು.
ಆ್ಯಕ್ಷನ್ ಡ್ರಾಮಾದ ಕಥೆ ಹೊಂದಿರುವ ಚಿತ್ರವೂ ಸಿನಿಮಾ ಥಿಯೇಟರ್ನಲ್ಲಿ ಉತ್ತಮ ಪ್ರದರ್ಶನ ಕಾಣುತ್ತಿದೆ. ತ್ರಿವಿಕ್ರಂ ಶ್ರೀನಿವಾಸ್ ನಿರ್ದೇಶನದ ಈ ಚಿತ್ರದಲ್ಲಿ ನಟ ಮಹೇಶ್ ಬಾಬುಗೆ ನಟಿ ಶ್ರೀಲೀಲಾ ಮತ್ತು ಮೀನಾಕ್ಷಿ ಚೌಧರಿ ಜೊತೆಯಾಗಿದ್ದಾರೆ. ಮಹೇಶ್ ಬಾಬು ಸಿಕ್ಕಾಪಟ್ಟೆ ರಗಡ್ ಲುಕ್ನಲ್ಲಿ ಕಾಣಿಸಿಕೊಂಡಿದ್ದು, ಹೈ ಎನರ್ಜಿಟಿಕ್ ಆಗಿ ನಟಿಸಿದ್ದಾರೆ. ನಗರದ ಅಪರಾಧ ಚಟುವಟಿಕೆಯನ್ನು ತೋರಿಸುವಂತೆ ಕೇಳುವ ಪತ್ರಕರ್ತೆಯ ಜೊತೆಗೆ ನಟ ಪ್ರೀತಿಗೆ ಬೀಳುವ ಕಥೆಯನ್ನು ಇದು ಹೊಂದಿದ್ದು, ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ನಟನ ಅಭಿನಯಕ್ಕೆ ಮೆಚ್ಚುಗೆ ವ್ಯಕ್ತವಾಗಿದೆ.
ಈ ಹಿಂದೆ ಬ್ಲಾಕ್ ಬಸ್ಟರ್ ಸಿನಿಮಾಗಳಾದ 'ಅತಡು' ಮತ್ತು 'ಖಲೇಜಾ' ಚಿತ್ರದ ಮೂಲಕ ಮೋಡಿ ಮಾಡಿದ್ದ ತ್ರಿವಿಕ್ರಂ ಶ್ರೀನಿವಾಸ್ ಮತ್ತು ಮಹೇಶ್ ಬಾಬು 12 ವರ್ಷಗಳ ಬಳಿಕ ಈ ಸಿನಿಮಾದಲ್ಲಿ ಜೊತೆಯಾಗಿದ್ದಾರೆ. ಹರಿಕಾ ಮತ್ತು ಹಾಸನ್ ಕ್ರಿಯೇಷನ್ಸ್ ನಿರ್ಮಾಣದ ಈ ಚಿತ್ರದಲ್ಲಿ ಮುಖ್ಯ ಪಾತ್ರಗಳಲ್ಲಿ ಮೀನಾಕ್ಷಿ ಚೌಧರಿ, ಜಗಪತಿ ಬಾಬು, ರಮ್ಯಾ ಕೃಷ್ಣನ್, ಜಯರಾಮ್, ಪ್ರಕಾಶ್ ರಾಜ್ ಮತ್ತು ಸುನೀಲ್ ಸೇರಿದಂತೆ ಹಲವರು ಅಭಿನಯಿಸಿದ್ದರು.
ಇದನ್ನೂ ಓದಿ: ಮೆರಿ ಕ್ರಿಸ್ಮಸ್ ಬಿಡುಗಡೆಗೂ ಮುನ್ನ ಸಿನಿಮಾದ ಫೋಟೋ ಹಂಚಿಕೊಂಡು ಕುತೂಹಲ ಹೆಚ್ಚಿಸಿದ ಕತ್ರಿನಾ
