ಬಾಲಿವುಡ್ ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ ಅವರ ಬಹುನಿರೀಕ್ಷಿತ ಸಿನಿಮಾ ಈದ್ ಸಂದರ್ಭ, ಏಪ್ರಿಲ್ 21ರಂದು ತೆರೆ ಕಂಡಿದೆ. ಬಹು ಸಮಯದ ನಂತರ ತೆರೆ ಮೇಲೆ ಬಂದ ಸಲ್ಮಾನ್ ಮತ್ತು ಚಿತ್ರತಂಡಕ್ಕೆ ಕಲೆಕ್ಷನ್ ವಿಚಾರದಲ್ಲಿ ನಿರಾಸೆಯಾಗಿದೆ. ಸಿನಿಮಾ ಗಳಿಕೆ ಇಳಿಕೆಯಾಗತೊಡಗಿದೆ.
ಬಹು ನಿರೀಕ್ಷೆಯೊಂದಿಗೆ ಸಿನಿಮಾ ಮಾಡಿದ ಬಾಲಿವುಡ್ ಬ್ಯಾಚುಲರ್ ಸಲ್ಮಾನ್ ಖಾನ್ಗೆ 2023ನೇ ಸಾಲು ಅದೃಷ್ಟ ತಂದುಕೊಟ್ಟಿಲ್ಲ. 'ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್' ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಕಳಪೆ ಪ್ರದರ್ಶನ ನೀಡಿದೆ. ಅದ್ಧೂರಿ ವೆಚ್ಚದಲ್ಲಿ ತಯಾರಾದ ಭಾಯ್ಜಾನ್ನ ಸಿನಿಮಾ ಏಪ್ರಿಲ್ 21ರಂದು ಬಿಡುಗಡೆ ಆಯಿತು. ಸಲ್ಮಾನ್ ಸಿನಿಮಾ ತೆರೆಕಂಡು 15 ದಿನಗಳು ಕಳೆದಿದ್ದು, 16ನೇ ದಿನಕ್ಕೆ ಕಾಲಿಡುತ್ತಿದೆ. ಆದರೆ ಈ 15 ದಿನಗಳಲ್ಲಿ 'ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್' ಚಿತ್ರದ ಬಾಕ್ಸ್ ಆಫೀಸ್ ಕಲೆಕ್ಷನ್ ಸಂಖ್ಯೆ ಚಿತ್ರ ತಂಡಕ್ಕೆ ನಿರಾಸೆಯುಂಟುಮಾಡಿದೆ. ಈ ಚಿತ್ರದ ಮೂಲಕ ಬಾಲಿವುಡ್‌ಗೆ ಪದಾರ್ಪಣೆ ಮಾಡಿದ ಪಲಕ್ ತಿವಾರಿ ಮತ್ತು ಶೆಹನಾಜ್ ಗಿಲ್ ಕೂಡ ಜಾದೂ ಮಾಡುವಲ್ಲಿ ವಿಫಲರಾಗಿದ್ದಾರೆ.
ವರದಿಗಳ ಪ್ರಕಾರ, ಸದ್ಯ ಚಿತ್ರ ಒಂದು ದಿನಕ್ಕೆ 1 ಕೋಟಿ ರೂ. ಕೂಡ ಕಲೆಕ್ಷನ್ ಮಾಡುತ್ತಿಲ್ಲ. ಆರಂಭಿಕ ಗಳಿಕೆ ಒಂದು ಮಟ್ಟಕ್ಕೆ ಉತ್ತಮವಾಗಿತ್ತಾದರೂ, ಸದ್ಯ ಅಂಕಿ - ಅಂಶಗಳು ಇಳಿಕೆಯಾಗಿದೆ. ಚಿತ್ರವು ಈವರೆಗೆ ದೇಶೀಯ ಬಾಕ್ಸ್ ಆಫೀಸ್‌ನಲ್ಲಿ 115 ಕೋಟಿ ರೂಪಾಯಿ ಸಂಗ್ರಹಿಸಿದೆ ಮತ್ತು ವಿಶ್ವಾದ್ಯಂತ 165 ಕೋಟಿ ರೂ. ಕಲೆಕ್ಷನ್ ಮಾಡಿದೆ.
"ಟೈಗರ್ 3" ಸಲ್ಮಾನ್ ಖಾನ್ ಅವರ ಮುಂದಿನ ಬಹುನಿರೀಕ್ಷಿತ ಸಿನಿಮಾ. ಅವರ ಕೊನೆ ಚಿತ್ರ ಈದ್ ಸಂದರ್ಭ ತೆರೆಕಂಡಿದ್ದು, ಮುಂದಿನ ಸಿನಿಮಾ ದೀಪಾವಳಿ ವೇಳೆಗೆ ಬಿಡುಗಡೆ ಆಗಲು ಸಜ್ಜಾಗುತ್ತಿದೆ. ಯಶ್ ರಾಜ್ ಫಿಲ್ಮ್ಸ್ನ ಆದಿತ್ಯ ಚೋಪ್ರಾ ಅವರು ಅದ್ಧೂರಿ ವೆಚ್ಚದಲ್ಲಿ ಚಿತ್ರ ನಿರ್ಮಾಣ ಮಾಡುತ್ತಿದ್ದಾರೆ. ತಮ್ಮ ಸಿನಿಮಾ ಬಗ್ಗೆ ಚಿತ್ರತಂಡ ಹೆಚ್ಚಿನ ಗುಟ್ಟು ಬಿಟ್ಟುಕೊಟ್ಟಿಲ್ಲವಾದರೂ, ಆಪ್ತ ಮೂಲಗಳ ಮಾಹಿತಿ ಸಿನಿ ಪ್ರಿಯರ ಕುತೂಹಲ ಕೆರಳಿಸಿದೆ.
ಇದನ್ನೂ ಓದಿ: 40 ಕೋಟಿ ಬಜೆಟ್‌ನಲ್ಲಿ ತಯಾರಾದ 'ದಿ ಕೇರಳ ಸ್ಟೋರಿ' ಮೊದಲ ದಿನದ ಕಲೆಕ್ಷನ್ ಎಷ್ಟು ಗೊತ್ತಾ?
ಸಲ್ಮಾನ್ ಖಾನ್ ಜೊತೆಗೆ ಕತ್ರಿನಾ ಕೈಫ್, ಇಮ್ರಾನ್ ಹಶ್ಮಿ ಈ ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಗಮನ ಸೆಳೆಯುತ್ತಿರುವ ವಿಚಾರವೆಂದರೆ, ಪಠಾಣ್ ಹೀರೋ ಶಾರುಖ್ ಖಾನ್ ಈ ಚಿತ್ರದಲ್ಲಿ ವಿಶೇಷ ಪಾತ್ರ ನಿರ್ವಹಿಸಲಿದ್ದಾರೆ. ಮೇ. 8ರಂದು ಸಲ್ಲು ಮತ್ತು ಎಸ್ಆರ್ಕೆ ಸೀನ್ನ ಶೂಟಿಂಗ್ ಆರಂಭಗೊಳ್ಳಲಿದೆ. ಈ ಒಂದು ಸೀನ್ಗಾಗಿ ಸುಮಾರು 5-6 ತಿಂಗಳಿನಿಂದ ಕೆಲಸ ನಡೆಯುತ್ತಿದೆ. ಇವರಿಬ್ಬರ ಆ್ಯಕ್ಷನ್ ದೃಶ್ಯವನ್ನು ಭರ್ಜರಿಯಾಗಿ ಪ್ರದರ್ಶಿಸಲು 35 ಕೋಟಿ ರೂಪಾಯಿಯ ಸೆಟ್ ನಿರ್ಮಾಣ ಮಾಡಲಾಗಿದೆ ಎಂಬ ಮಾಹಿತಿ ಆಪ್ತ ಮೂಲಗಳಿಂದ ಬಂದಿದೆ.
ಇದನ್ನೂ ಓದಿ: ಕುದುರೆ ಸವಾರಿ ಮಾಡುವಾಗ ಬಿದ್ದ ಮಿಸ್ ಯೂನಿವರ್ಸ್ ಫೈನಲಿಸ್ಟ್ ಕೊನೆಯುಸಿರು
