ಬಾಲಿವುಡ್​ ಬೆಡಗಿ ಕತ್ರಿನಾ ಕೈಫ್​ ರೋಲ್​ ಮಾಡೆಲ್ ಯಾರು ಗೊತ್ತಾ?

ತಮ್ಮ ಮುಂದಿನ ಸಿನಿಮಾ 'ಮೇರಿ ಕ್ರಿಸ್ಮಸ್​​' ಪ್ರಚಾರದಲ್ಲಿ ಬ್ಯುಸಿಯಾಗಿರುವ ಕತ್ರಿನಾ ಕೈಫ್​ ಸಂದರ್ಶನವೊಂದರಲ್ಲಿ ಕೆಲ ಆಸಕ್ತಿಕರ ವಿಚಾರಗಳನ್ನು ಬಹಿರಂಗಪಡಿಸಿದ್ದಾರೆ.

ಬಾಲಿವುಡ್‌ನ ಬಾರ್ಬಿ ಡಾಲ್ ಕತ್ರಿನಾ ಕೈಫ್ ಇತ್ತೀಚಿನ ದಿನಗಳಲ್ಲಿ 'ಮೇರಿ ಕ್ರಿಸ್ಮಸ್​​' ಸಲುವಾಗಿ ಸುದ್ದಿಯಲ್ಲಿದ್ದಾರೆ. ದಕ್ಷಿಣದ ಜನಪ್ರಿಯ ನಟ ವಿಜಯ್​​ ಸೇತುಪತಿ ಅವರೊಂದಿಗೆ ತೆರೆ ಹಂಚಿಕೊಂಡಿರುವ ಈ ಸಿನಿಮಾ 2024ರ ಆರಂಭದಲ್ಲಿ ತೆರೆಗಪ್ಪಳಿಸಲಿದೆ. ಈ ಬಹುನಿರೀಕ್ಷಿತ ಚಿತ್ರ ಇದೇ ಸಾಲಿನಲ್ಲಿ ತೆರೆಕಾಣಬೇಕಿತ್ತು. ಆದ್ರೆ ಕಾರಣಾಂತರಗಳಿಂದ ಕೆಲವು ಬಾರಿ ಮುಂದೂಡಿಕೆಯಾಗಿದ್ದು, ಇದೀಗ 2024ರ ಜನವರಿಯಲ್ಲಿ ಬಿಡುಗಡೆ ಆಗಲು ಸಜ್ಜಾಗಿದೆ.

ಟೈಗರ್​​ ಸಿನಿಮಾ ಖ್ಯಾತಿಯ ನಟಿ ಕತ್ರಿನಾ ಕೈಫ್ ಈಗಾಗಲೇ ತಮ್ಮ ಮುಂದಿನ ಬಹುನಿರೀಕ್ಷಿತ ಸಿನಿಮಾ ಪ್ರಚಾರದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಪ್ರಚಾರದ ಭಾಗವಾಗಿ ಸಂದರ್ಶನವೊಂದರಲ್ಲಿ ನಟಿ ಕತ್ರಿನಾ ಕೈಫ್​ ತಮ್ಮ ವೈಯಕ್ತಿಕ ಮತ್ತು ವೃತ್ತಿಪರ ಜೀವನದ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ತಮ್ಮ ಮಾಡೆಲಿಂಗ್ ದಿನಗಳನ್ನು ನೆನಪಿಸಿಕೊಳ್ಳುತ್ತಾ, ಅಂದಿನ ಕೆಲ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

ಕತ್ರಿನಾ ಕೈಫ್ ರೋಲ್ ಮಾಡೆಲ್ ಯಾರು? ಕತ್ರಿನಾ ಕೈಫ್ ಸಂದರ್ಶನದಲ್ಲಿ ತಮ್ಮ ರೋಲ್​ ಮಾಡೆಲ್​​ ಯಾರು ಎಂಬುದನ್ನು ಬಹಿರಂಗಪಡಿಸಿದರು. ಫಿಟ್ನೆಸ್ ಕ್ವೀನ್ ಮಲೈಕಾ ಅರೋರಾ ಅವರನ್ನು ಬಹಳ ಇಷ್ಟಪಡುವುದಾಗಿ ಬಹಿರಂಗಪಡಿಸಿದರು. ತಮ್ಮ ಮಾಡೆಲಿಂಗ್ ದಿನಗಳಲ್ಲಿ ಮಲೈಕಾ ಅರೋರಾ, ಮಧು ಸಪ್ರೆ ಮತ್ತು ಲಕ್ಷ್ಮಿ ಮೆನನ್ ಅವರನ್ನು ತಮ್ಮ ರೋಲ್ ಮಾಡೆಲ್​​ ಆಗಿ ಪರಿಗಣಿಸಿದ್ದೆ ಎಂಬುದನ್ನು ಕತ್ರಿನಾ ಬಹಿರಂಗಪಡಿಸಿದ್ದಾರೆ. ಇವರನ್ನು ಅನುಸರಿಸುತ್ತಿದ್ದೆ, ಸೂಪರ್ ಮಾಡೆಲ್ ಆಗಲು ಬಯಸಿದ್ದೆ ಎಂದು ಕತ್ರಿನಾ ಸಂದರ್ಶನದಲ್ಲಿ ತಿಳಿಸಿದ್ದಾರೆ.