ಬ್ರಹ್ಮ, ಐಲವ್ಯೂ ಸಿನಿಮಾ ಬಳಿಕ ನಟ ಉಪೇಂದ್ರ ಮತ್ತು ನಿರ್ದೇಶಕ ಆರ್. ಚಂದ್ರು ಕಾಂಬಿನೇಷನ್‌ನಲ್ಲಿ ಮೂಡಿ ಬರುತ್ತಿರುವ ಹೊಸ ಚಿತ್ರ 'ಕಬ್ಜ'. ಇದರ ಸೂತ್ರಧಾರ ಹಾಗೂ ನಿರ್ಮಾಪಕ ಆರ್.ಚಂದ್ರು ಸಿನಿಮಾದ ಲೇಟೆಸ್ಟ್ ಅಪ್ಡೇಟ್ ನೀಡಿದ್ದಾರೆ.
ಕನ್ನಡ ಚಿತ್ರರಂಗದಲ್ಲಿ ಕಳೆದ ಮೂರು ವರ್ಷಗಳಿಂದ ಚಿತ್ರೀಕರಣ ಆಗುತ್ತಿರುವ ಬಹು ಕೋಟಿ ವೆಚ್ಚದ ಈ ಸಿನಿಮಾದ ಚಿತ್ರೀಕರಣ ಬಹುತೇಕ ಮುಗಿದಿದ್ದು ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ. ಕೆಲ ದಿನಗಳ ಹಿಂದೆ ಮಂಗಳೂರಿನ ಬೀಚ್ನಲ್ಲಿ ಕೊನೆಯ ಹಂತದ ಚಿತ್ರೀಕರಣ ಮಾಡಿಕೊಂಡು ಬರಲಾಗಿದೆ.
'ನನಗೂ ಕೂಡ ಕಳೆದ ಮೂರು ವರ್ಷದಿಂದ ಒಂದು ರೀತಿಯ ತಪಸ್ಸು ಮಾಡಿದ ಅನುಭವ ಆಗಿದೆ. ಟೀಸರ್ ರಿಲೀಸ್ ಯಾವಾಗ? ಟ್ರೈಲರ್ ಬಿಡುಗಡೆ ಯಾವಾಗ? ಎಂಬೆಲ್ಲ ಹತ್ತಾರು ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆ. ಈ ವರ್ಷದಲ್ಲೇ 'ಕಬ್ಜ' ಬಿಡುಗಡೆ ಪಕ್ಕಾ. ಆದರೆ, ಟೀಸರ್ ಬಿಡುಗಡೆ ಸಂದರ್ಭದಲ್ಲಿ ಅಧಿಕೃತವಾಗಿ ಚಿತ್ರದ ಬಿಡುಗಡೆ ಬಗ್ಗೆ ಘೋಷಣೆ ಮಾಡಲಾಗುತ್ತದೆ. ಉಪ್ಪಿ ಸಾರ್ ಹಾಗೂ ಸುದೀಪ್ ಸಾರ್ ನಡುವಿನ ಸಣ್ಣ ಟಾಕೀ ಭಾಗ ಮಾತ್ರ ಬಾಕಿ ಇದೆ. ಕೋವಿಡ್ ಏನೇ ಸಮಸ್ಯೆ ಇದ್ದರೂ, ಏಳು ಭಾಷೆಯಲ್ಲಿ ಸಿನಿಮಾ ರೆಡಿಯಾಗುತ್ತಿದೆ' ಎಂದು ನಿರ್ದೇಶಕ ಆರ್. ಚಂದ್ರು ತಿಳಿಸಿದರು.
