ಬಾಲಿವುಡ್ ಸೂಪರ್ಸ್ಟಾರ್ ಸಲ್ಮಾನ್ ಖಾನ್ ನಡೆಸಿಕೊಡುವ ಹಿಂದಿ ಬಿಗ್ ಬಾಸ್ OTT ಸೀಸನ್ 2ಗೆ ತೆರೆ ಬಿದ್ದಿದೆ. ಈ ಬಾರಿಯೂ ದೊಡ್ಮನೆಯಲ್ಲಿ ಪ್ರಬಲ ಸ್ಪರ್ಧೆ ಎದುರಾಗಿತ್ತು. ಫಿನಾಲೆಗೆ ತಲುಪಿದ್ದ ಐವರಲ್ಲಿ ವಿಜೇತರು ಯಾರಾಗಲಿದ್ದಾರೆ? ಎಂಬ ಕುತೂಹಲ ಶೋ ವೀಕ್ಷಕರಲ್ಲಿತ್ತು. ಇದೀಗ ಎಲ್ವಿಶ್ ಯಾದವ್ ಬಿಗ್ ಬಾಸ್ ಟ್ರೋಫಿಯನ್ನು ಪಡೆದುಕೊಂಡಿದ್ದಾರೆ. ವಿಶೇಷ ದಾಖಲೆಯೊಂದಿಗೆ ಗೆಲುವಿನ ನಗೆ ಬೀರಿದ್ದಾರೆ. ಬಿಗ್ ಬಾಸ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿ ಶೋ ಗೆದ್ದ ವೈಲ್ಡ್ ಕಾರ್ಡ್ ಸ್ಪರ್ಧಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಎಲ್ವಿಶ್ ಯಾದವ್ ಅವರು ಶೋ ಪ್ರಾರಂಭವಾದ ನಂತರ ನಾಲ್ಕನೇ ವಾರ ಬಿಗ್ ಬಾಸ್ ಮನೆಯನ್ನು ಪ್ರವೇಶಿಸಿದರು. ಬಳಿಕ ಅಭಿಷೇಕ್ ಮಲ್ಹಾನ್ ಜೊತೆ ಉತ್ತಮ ಪೈಪೋಟಿ ನೀಡಿದ್ದರು. ಇವರಿಬ್ಬರ ನಡುವೆ ಸ್ಪರ್ಧೆ ಏರ್ಪಟ್ಟಿತ್ತು. ಆಗಸ್ಟ್ 14, ಸೋಮವಾರ ನಡೆದ ಬಿಗ್ ಬಾಸ್ ಓಟಿಟಿ ಸೀಸನ್ 2ರ ಫಿನಾಲೆ ಹಂತಕ್ಕೆ ಒಟ್ಟು ಐವರು ಆಯ್ಕೆಯಾಗಿದ್ದರು. ಎಲ್ವಿಶ್ ಯಾದವ್, ಅಭಿಷೇಕ್ ಮಲ್ಹಾನ್, ಬೇಬಿಕಾ ಧುರ್ವೆ, ಮನಿಷಾ ರಾಣಿ ಮತ್ತು ಪೂಜಾ ಭಟ್ ಸೆಲೆಕ್ಟ್ ಆಗಿದ್ದರು.
ಇವರಲ್ಲಿ ಅಭಿಷೇಕ್ ಮಲ್ಹಾನ್ ಮತ್ತು ಎಲ್ವಿಶ್ ಯಾದವ್ ನಡುವೆ ಪ್ರಬಲ ಸ್ಪರ್ಧೆ ಎದುರಾಗಿತ್ತು. ಅಂತಿಮವಾಗಿ ಎಲ್ವಿಶ್ ಅವರು ಬಿಗ್ ಬಾಸ್ ಪಟ್ಟವನ್ನು ಏರಿದ್ದಾರೆ. ಅಭಿಷೇಕ್ ಮಲ್ಹಾನ್ ರನ್ನರ್ ಅಪ್ ಆಗಿದ್ದಾರೆ. ಬಿಗ್ ಬಾಸ್ OTT ಸೀಸನ್ 2 ವಿಜೇತರಾಗಿ ಹೊರಹೊಮ್ಮಿದ ಎಲ್ವಿಶ್ ಯಾದವ್ 25 ಲಕ್ಷ ರೂಪಾಯಿ ಬಹುಮಾನದ ಜೊತೆಗೆ ಟ್ರೋಫಿಯನ್ನು ಪಡೆದುಕೊಂಡಿದ್ದಾರೆ. ವೈಲ್ಡ್ ಕಾರ್ಡ್ ಮೂಲಕ ಎಂಟ್ರಿಯಾಗಿ ಶೋ ಗೆದ್ದ ಮೊದಲ ಸ್ಪರ್ಧಿ ಎಂಬ ವಿಶೇಷ ದಾಖಲೆಯನ್ನು ಸೃಷ್ಟಿಸಿದ್ದಾರೆ. ಇವರ ಗೆಲುವನ್ನು ಅಭಿಮಾನಿಗಳು ಸಂಭ್ರಮಿಸಿದ್ದಾರೆ.
ಇದನ್ನೂ ಓದಿ: ಹಿಂದಿ ಬಿಗ್ ಬಾಸ್ ಒಟಿಟಿ ಗ್ರ್ಯಾಂಡ್ ಫಿನಾಲೆಗೆ ಒಂದೇ ವಾರ.. ಜಡ್ ಹದಿದ್, ಅವಿನಾಶ್ ಸಚ್‌ದೇವ್ ಮನೆಯಿಂದ ಔಟ್
ಬಿಗ್ ಬಾಸ್ ಕಿರೀಟವನ್ನು ಮುಡಿಗೇರಿಸಿಕೊಳ್ಳುವ ಮೊದಲು ಮಾತನಾಡಿದ ಎಲ್ವಿಶ್ ಯಾದವ್, "ನನಗಿದು ನಿಜವೆಂದು ನಂಬಲು ಸಾಧ್ಯವಾಗುತ್ತಿಲ್ಲ. ವೈಲ್ಡ್ ಕಾರ್ಡ್ ಎಂಟ್ರಿಯಾದರೂ ಟಾಪ್ 5ನಲ್ಲಿ ಇರುವುದಕ್ಕೆ ನಾನು ಕೃತಜ್ಞನಾಗಿದ್ದೇನೆ. ನಾನು ಗೆದ್ದರೆ ಒಳ್ಳೆಯದು. ಗೆಲ್ಲದೇ ಹೋದರೆ ಪರವಾಗಿಲ್ಲ. ಆದರೆ ನಾನು ಎಲ್ಲರ ಪ್ರೀತಿಯನ್ನು ಪಡೆದುಕೊಂಡಿದ್ದೇನೆ" ಎಂದು ಹೇಳಿದ್ದರು. ಗ್ರ್ಯಾಂಡ್ ಫಿನಾಲೆಗೂ ಮುಂಚೆ ಅಭಿಷೇಕ್ ಮಲ್ಹಾನ್ ವೈರಲ್ ಇನ್ಫೆಕ್ಷನ್ನಿಂದ ಆಸ್ಪತ್ರೆಗೆ ದಾಖಲಾಗಿದ್ದರು.
ಕಾರ್ಯಕ್ರಮದ ಗ್ರ್ಯಾಂಡ್ ಫಿನಾಲೆ ಕಾರ್ಯಕ್ರಮವನ್ನು 70 ಲಕ್ಷಕ್ಕೂ ಹೆಚ್ಚು ಜನರು ವೀಕ್ಷಿಸಿದ್ದಾರೆ. ಸಲ್ಮಾನ್ ಖಾನ್ ಅವರ ಹೋಸ್ಟ್ ಮತ್ತು ಮಾಜಿ ಸ್ಪರ್ಧಿಗಳ ಸಮಾಗಮ ಜೊತೆಗೆ ಫೈನಲ್ ಸ್ಪರ್ಧಿಗಳು ಅವರ ಕುಟುಂಬದವರು ಜೊತೆಯಾಗಿ ಸೇರಿದ್ದರಿಂದ ಹೆಚ್ಚು ಸಂಖ್ಯೆಯಲ್ಲಿ ಬಿಗ್ ಬಾಸ್ ಶೋ ಅಭಿಮಾನಿಗಳು ಕಾರ್ಯಕ್ರಮವನ್ನು ನೋಡಿದ್ದಾರೆ. ಬಿಗ್ ಬಾಸ್ OTT ಸೀಸನ್ 2 ಜಿಯೋ ಸಿನಿಮಾದಲ್ಲಿ ಸ್ಟ್ರೀಮ್ ಆಗುತ್ತಿತ್ತು.
ಇದನ್ನೂ ಓದಿ: Bigg Boss OTT 2 day 52 highlights: ಅಂತಿಮ ಹಂತದ ಹಣಾಹಣಿಯಲ್ಲಿ ಬಿಗ್ಬಾಸ್ ಸ್ಪರ್ಧಿಗಳು; ಫಿನಾಲೆಗೆ ಇನ್ನೊಂದೇ ವಾರ ಬಾಕಿ
