ಭಾರತೀಯ ಚಿತ್ರರಂಗದ ಪ್ರಸಿದ್ಧ, ಹಿರಿಯ ನಟ ಅಮಿತಾಭ್ ಬಚ್ಚನ್ ಇಂದು 81ನೇ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದಾರೆ. ಎವರ್ಗ್ರೀನ್ ಸ್ಟಾರ್ಗೆ ಕುಟುಂಬಸ್ಥರು, ಆತ್ಮೀಯರು, ಚಿತ್ರರಂಗದವರೂ ಸೇರಿದಂತೆ ಕೋಟ್ಯಂತರ ಅಭಿಮಾನಿಗಳು ಶುಭಾಶಯ ಕೋರುತ್ತಿದ್ದಾರೆ. ಬಚ್ಚನ್ ಅಭಿನಯದ ಮುಂದಿನ ಸಿನಿಮಾ 'ಕಲ್ಕಿ 2898 ಎಡಿ'ಯ ತಂಡ ಮತ್ತು ಸಹನಟ ಪ್ರಭಾಸ್ ಕೂಡ ವಿಶೇಷವಾಗಿ ಶುಭ ಕೋರಿದ್ದಾರೆ.
ಅಮಿತಾಭ್ ಬಚ್ಚನ್ ಫಸ್ಟ್ ಲುಕ್: ಅಮಿತಾಭ್ ಬಚ್ಚನ್ ಅವರ ಜನ್ಮದಿನವನ್ನು ವಿಶೇಷವಾಗಿಸಲು, ಕಲ್ಕಿ 2898 ಎಡಿ ಚಿತ್ರ ತಯಾರಕರು ಸಿನಿಮಾದಿಂದ ಅವರ ಫಸ್ಟ್ ಲುಕ್ ಪೋಸ್ಟರ್ ಅನಾವರಣಗೊಳಿಸಿದ್ದಾರೆ. ನಾಗ್ ಅಶ್ವಿನ್ ನಿರ್ದೇಶನ ಬಿಗ್ ಬಜೆಟ್ ಸಿನಿಮಾದಲ್ಲಿ ಪ್ರಭಾಸ್, ದೀಪಿಕಾ ಪಡುಕೋಣೆ, ಕಮಲ್ ಹಾಸನ್, ದಿಶಾ ಪಟಾನಿ ಅವರೊಂದಿಗೆ ಬಿಗ್ ಬಿ ಕಾಣಿಸಿಕೊಳ್ಳಲಿದ್ದಾರೆ.
ಕಲ್ಕಿ 2898 ಎಡಿ ಪೋಸ್ಟರ್ ಕುತೂಹಲ: ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ ಎಕ್ಸ್ನಲ್ಲಿ ಕಲ್ಕಿ 2898 ಎಡಿ ಪೋಸ್ಟರ್ ಹಂಚಿಕೊಂಡಿರುವ ಜನಪ್ರಿಯ ಚಲನಚಿತ್ರ ನಿರ್ಮಾಣ ಸಂಸ್ಥೆ ವೈಜಯಂತಿ ಮೂವೀಸ್, ''ನಿಮ್ಮ ಪ್ರಯಾಣದ ಭಾಗವಾಗುವುದು ಮತ್ತು ನಿಮ್ಮ ಶ್ರೇಷ್ಠತೆಗೆ ಸಾಕ್ಷಿಯಾಗುವುದು ಗೌರವದ ವಿಷಯ. ಹ್ಯಾಪಿ ಬರ್ತ್ ಡೇ ಅಮಿತಾಭ್ ಬಚ್ಚನ್ ಸರ್ - ಕಲ್ಕಿ 2898 ಎಡಿ ಟೀಮ್'' ಎಂದು ಬರೆದುಕೊಂಡಿದೆ. ಬಿಗ್ ಬಿ ಮುಖ ಬಹಿರಂಗಪಡಿಸಿಲ್ಲ, ಆದಾಗ್ಯೂ ಪೋಸ್ಟರ್ ಪ್ರೇಕ್ಷಕರ ಕುತೂಹಲ ಹೆಚ್ಚಿಸಿದೆ.
ಪ್ರಭಾಸ್ ಸ್ಪೆಷಲ್ ವಿಶ್: ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಕೂಡ ಸಹನಟನ ಜನ್ಮದಿನಕ್ಕೆ ಶುಭ ಕೋರಿದ್ದಾರೆ. ಬಾಹುಬಲಿ ನಟ ಪ್ರಭಾಸ್ ಇನ್ಸ್ಟಾಗ್ರಾಮ್ನಲ್ಲಿ ಕಲ್ಕಿ 2898 ಎಡಿ ಪೋಸ್ಟರ್ ಶೇರ್ ಮಾಡಿ, "ತಲೆಮಾರುಗಳಿಗೆ ಸ್ಫೂರ್ತಿ ನೀಡಿದ ದಂತಕಥೆಯೊಂದಿಗೆ ಕೆಲಸ ಮಾಡುತ್ತಿರುವುದು ನನಗೆ ಸಿಕ್ಕ ಆಶೀರ್ವಾದ. ನನ್ನ ಕನಸು ನನಸಾಗಿದೆ. ಜನ್ಮದಿನದ ಶುಭಾಶಯಗಳು ಸರ್" ಎಂದು ಬರೆದಿದ್ದಾರೆ.
ಇದನ್ನೂ ಓದಿ: 5 ದಶಕದಲ್ಲಿ 200ಕ್ಕೂ ಹೆಚ್ಚು ಚಿತ್ರ: ಎವರ್ಗ್ರೀನ್ ಸ್ಟಾರ್ ಅಮಿತಾಭ್ ಬಚ್ಚನ್ ಮುಂದಿನ ಸಿನಿಮಾಗಳಿವು
ಕಲ್ಕಿ 2898 ಎಡಿ ಸಿನಿಮಾ ವೈಜಯಂತಿ ಮೂವೀಸ್ ಬ್ಯಾನರ್ ಅಡಿ ನಿರ್ಮಾಣಗೊಳ್ಳುತ್ತಿದೆ. ಸಿನಿಮಾ 2024ರ ಜನವರಿ 12ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಲಿದೆ. ಸದ್ಯ ಪೋಸ್ಟರ್ ಸಿನಿಪ್ರಿಯರ ಕುತೂಹಲ ಹೆಚ್ಚಿಸಿದ್ದು, ಟೀಸರ್, ಟ್ರೇಲರ್ಗಾಗಿ ಕಾತರ ಹೆಚ್ಚಾಗಿದೆ.
ಇದನ್ನೂ ಓದಿ: 'ಹುವಾ ಮೈನ್' ರೊಮ್ಯಾಂಟಿಕ್ ಸಾಂಗ್: ರಣ್ಬೀರ್-ರಶ್ಮಿಕಾ ಕೆಮಿಸ್ಟ್ರಿ ಮೆಚ್ಚಿದ ಫ್ಯಾನ್ಸ್
ಅಮಿತಾಭ್ ಬಚ್ಚನ್ ಜನ್ಮದಿನ ಹಿನ್ನೆಲೆಯಲ್ಲಿ ಮುಂಬೈನಲ್ಲಿರುವ 'ಜಲ್ಸಾ' ಮನೆ ಬಳಿ ಅಭಿಮಾನಿಗಳು ಜಮಾಯಿಸಿದ್ದರು. ಅಭಿಮಾನಿಗಳನ್ನು ನೋಡಲು ಮಧ್ಯರಾತ್ರಿ ಬಿಗ್ ಬಿ ಸಹ ಹೊರಬಂದರು. ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳು ತಮ್ಮ ಮೆಚ್ಚಿನ ನಟನಿಗೆ ಶುಭಾಶಯ ಕೋರಿದರು. ಅಮಿತಾಭ್ ಅಭಿಮಾನಿಗಳತ್ತ ಕೈ ಬೀಸಿ, ಬಳಿಕ ಕೃತಜ್ಞತೆ ಸಲ್ಲಿಸಿದರು. ಬಿಗ್ ಬಿ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ.
