ಬಾಲಿವುಡ್ ನಟ ಅಜಯ್ ದೇವಗನ್ ಪ್ರಸ್ತುತ 'ದೃಶ್ಯಂ 2' ಯಶಸ್ಸನ್ನು ಆನಂದಿಸುತ್ತಿದ್ದಾರೆ. ನವೆಂಬರ್ 18ರಂದು ತೆರೆಕಂಡ ಈ ಚಿತ್ರಕ್ಕೆ ಪ್ರೇಕ್ಷಕರು ಉತ್ತಮ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. ಇದೀಗ ಅವರ ಮುಂದಿನ ಭೋಲಾ ಚಿತ್ರದ ಟೀಸರ್ ಬಿಡುಗಡೆ ಆಗಿದೆ. ಇದರಲ್ಲಿ ಅಜಯ್ ದೇವಗನ್ ಸಾಹಸಮಯ, ನಿಗೂಢ ಮತ್ತು ಆಕ್ರಮಣಕಾರಿಯಾಗಿ ಕಾಣುತ್ತಾರೆ.
1.21 ನಿಮಿಷಗಳ ಟೀಸರ್ ಒಂದು ಅನಾಥಾಶ್ರಮದಿಂದ ಆರಂಭವಾಗುತ್ತದೆ. ಅನಾಥಾಶ್ರಮದಲ್ಲಿ ಕೆಲಸ ಮಾಡುವವರು ಒರ್ವ ಅನಾಥ ಹುಡುಗಿಗೆ, ನಾಳೆ ಮುಂಜಾನೆ ಬೇಗ ಎದ್ದು ಹೊರಡುವಂತೆ ಹೇಳುತ್ತಾರೆ. ನಿನ್ನನ್ನು ಕರೆದುಕೊಂಡು ಹೋಗಲು ಓರ್ವರು ಬರುತ್ತಿದ್ದಾರೆಂದು ತಿಳಿಸುತ್ತಾರೆ. ಆಗ ಆ ಹುಡುಗಿ ಯಾರೆಲ್ಲಾ ಬರಬಹುದು ಎಂದು ಯೋಚಿಸತೊಡಗುತ್ತಾಳೆ. ಇನ್ನುಳಿದ ಸೀನ್ನಲ್ಲಿ ಅಜಯ್ ದೇವಗನ್ ಎಂಟ್ರಿ. ಅಜಯ್ ದೇವಗನ್ ಜೈಲಿನಲ್ಲಿ ಹಣೆಯ ಮೇಲೆ ಚಿತಾಭಸ್ಮ ಹಾಕಿ, ಕೈಯಲ್ಲಿ ಭಗವದ್ಗೀತೆಯೊಂದಿಗೆ ಕಾಣಿಸಿಕೊಂಡಿದ್ದಾರೆ.
ಜೈಲಿನಿಂದ ಬಿಡುಗಡೆ ಅಗಲಿರುವ ಈ ಕೈದಿ ಮತ್ತು ಅನಾಥ ಹುಡುಗಿಯ ಕಥೆ ಹೇಳಲಿದೆ ಭೋಲಾ ಸಿನಿಮಾ. ಅಜಯ್ ದೇವಗನ್ ಅವರ ಮುಖವು ಟೀಸರ್ನಲ್ಲಿ ಸರಿಯಾಗಿ ಕಂಡಿಲ್ಲ. ಒಟ್ಟಿನಲ್ಲಿ ಅಜಯ್ ದೇವಗನ್, ಟಬು ಮತ್ತು ದಕ್ಷಿಣ ನಟಿ ಅಮಲಾ ಪೌಲ್ ಅಭಿನಯದ ಈ ಚಿತ್ರದ ಬಗ್ಗೆ ಅಭಿಮಾನಿಗಳು ಕುತೂಹಲರಾಗಿದ್ದಾರೆ.
ಚಿತ್ರವು 2023ರ ಮಾರ್ಚ್ 30ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಪ್ರಸ್ತುತ, ಅಜಯ್ ದೇವಗನ್ ಅವರ ಚಿತ್ರ 'ದೃಶ್ಯಂ-2' ಸಾಕಷ್ಟು ಸುದ್ದಿ ಮಾಡುತ್ತಿದೆ. ಮೂರು ದಿನದಲ್ಲಿ ಚಿತ್ರ ಬಾಕ್ಸ್ ಆಫೀಸ್ನಲ್ಲಿ 60 ಕೋಟಿ ಕಲೆಕ್ಷನ್ ಮಾಡಿದೆ.
ಇದನ್ನೂ ಓದಿ: ಶಾರುಖ್ ಖಾನ್ ನಿವಾಸ 'ಮನ್ನತ್' ಗೇಟ್ಗೆ ವಜ್ರದ ಹರಳುಗಳ ಅಲಂಕಾರ!
'ಭೋಲಾ' ಲೋಕೇಶ್ ಕನಕರಾಜ್ ನಿರ್ದೇಶನದ 2019ರ ತಮಿಳು ಬ್ಲಾಕ್‌ಬಸ್ಟರ್ ಚಿತ್ರ 'ಕೈತಿ'ನ ಅಧಿಕೃತ ರಿಮೇಕ್. ಹಿಂದಿ ರಿಮೇಕ್ ಅನ್ನು ಅಜಯ್ ದೇವಗನ್ ಸ್ವತಃ ನಿರ್ದೇಶಿಸಿದ್ದಾರೆ. ಚಿತ್ರದಲ್ಲಿ ಅಜಯ್ ಜೊತೆ ಟಬು ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ದಕ್ಷಿಣ ನಟಿ ಅಮಲಾ ಪೌಲ್ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.
