ಲೋಕಸಮರ: ಅತಿದೊಡ್ಡ ಹಂತದ ಮತದಾನದಲ್ಲಿ ರಾಗಾ, ಅಮಿತ್ ಶಾ ಭವಿಷ್ಯ ನಿರ್ಧಾರ..!

ಈ ಬಾರಿಯ ಲೋಕಸಭಾ ಚುನಾವಣೆ ಒಟ್ಟು ಏಳು ಹಂತದಲ್ಲಿ ನಡೆಯುತ್ತಿದ್ದು ಇಂದಿನ ಮೂರನೇ ಹಂತ ಮುಕ್ತಾಯದೊಂದಿಗೆ ದಕ್ಷಿಣದ ರಾಜ್ಯಗಳಲ್ಲಿ ಮತದಾನ ಪ್ರಕ್ರಿಯೆ ಕೊನೆಗೊಳ್ಳಲಿದೆ.

ನವದೆಹಲಿ: ಲೋಕಸಭಾ ಚುನಾವಣೆಯ ಮೂರನೇ ಹಾಗೂ ಅತಿದೊಡ್ಡ ಹಂತದ ಮತದಾನ ಪ್ರಕ್ರಿಯೆ ಇಂದು ದೇಶದ 14 ರಾಜ್ಯಗಳ 116 ಕ್ಷೇತ್ರಗಳಲ್ಲಿ ನಡೆಯಲಿದೆ.

ಅಸ್ಸೋಂ(4), ಬಿಹಾರ(5), ಛತ್ತೀಸ್​ಗಢ(7), ಕರ್ನಾಟಕ(14), ಮಹಾರಾಷ್ಟ್ರ(14), ಒಡಿಶಾ(6), ಉತ್ತರ ಪ್ರದೇಶ(10), ಪಶ್ಚಿಮ ಬಂಗಾಳ(5), ಗೋವಾ(2), ಗುಜರಾತ್​(26),ಕೇರಳ(20) ದಾದ್ರ ಮತ್ತು ನಗರಹವೇಲಿ ಹಾಗೂ ದಿಯು ಮತ್ತು ದಮನ್​​ನ ಒಂದೊಂದು ಕ್ಷೇತ್ರಗಳಲ್ಲಿ ಇಂದು ಮತದಾನ ಜರುಗಲಿದೆ. ಕಳೆದ ಹಂತದ ಮತದಾನದ ವೇಳೆ ಮುಂದೂಡಲ್ಪಟ್ಟಿದ್ದ ಪೂರ್ವ ತ್ರಿಪುರಾದ ಕ್ಷೇತ್ರಕ್ಕೂ ಇಂದೇ ವೋಟಿಂಗ್ ನಡೆಯಲಿದೆ. ಜೊತೆಗೆ ಜಮ್ಮು ಕಾಶ್ಮೀರದ ಅನಂತ್​ನಾಗ್​​ ಲೋಕಸಭಾ ಕ್ಷೇತ್ರದಲ್ಲೂ ಇಂದು ವೋಟಿಂಗ್​ ಜರುಗಲಿದೆ.

ಮೂರನೇ ಹಂತದ ಮತದಾನದಲ್ಲಿ 18.56 ಕೋಟಿ ಜನ ಹಕ್ಕು ಚಲಾಯಿಸಲು ಅರ್ಹರಾಗಿದ್ದು, 2.10 ಲಕ್ಷ ಮತಕೇಂದ್ರಗಳನ್ನು ಚುನಾವಣಾ ಆಯೋಗ ನಿರ್ಮಿಸಿದೆ. ಮೊದಲ ಹಂತದ(ಏಪ್ರಿಲ್​ 11) ಚುನಾವಣೆಯಲ್ಲಿ ಶೇ.69.43ರಷ್ಟು ಮತದಾನವಾಗಿದ್ದರೆ, ಎರಡನೇ ಹಂತದಲ್ಲಿ(ಏಪ್ರಿಲ್​​ 18) ಶೇ.62ರಷ್ಟು ವೋಟಿಂಗ್ ನಡೆದಿತ್ತು.

ಈ ಬಾರಿಯ ಲೋಕಸಭಾ ಚುನಾವಣೆ ಒಟ್ಟು ಏಳು ಹಂತದಲ್ಲಿ ನಡೆಯುತ್ತಿದ್ದು, ಇಂದಿನ ಮೂರನೇ ಹಂತ ಮುಕ್ತಾಯದೊಂದಿಗೆ ದಕ್ಷಿಣದ ರಾಜ್ಯಗಳಲ್ಲಿ ಮತದಾನ ಪ್ರಕ್ರಿಯೆ ಕೊನೆಗೊಳ್ಳಲಿದೆ.

ಕಣದಲ್ಲಿರುವ ಪ್ರಮುಖರು:

ಮೂರನೇ ಹಂತದ ಲೋಕಸಮರದ ಕಣದಲ್ಲಿ ಘಟಾನುಘಟಿ ನಾಯಕರ ದಂಡೇ ಇದೆ.ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್​ ಶಾ(ಗಾಂಧಿನಗರ), ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ(ವಯನಾಡು), ಶಶಿ ತರೂರ್​(ತಿರುವನಂತಪುರಂ), ಅಜಂ ಖಾನ್​​(ರಾಂಪುರ), ಜಯಪ್ರದಾ(ರಾಂಪುರ) ಮೂರನೇ ಹಂತದ ಮತದಾನದಲ್ಲಿ ತಮ್ಮ ಅದೃಷ್ಟ ಪರೀಕ್ಷೆ ನಡೆಸಲಿದ್ದಾರೆ.

ಅಮೇಠಿ ಲೋಕಸಭಾ ಕ್ಷೇತ್ರದಲ್ಲಿ ಸೋಲಿನ ಭೀತಿಯಿಂದ ಕೇರಳದ ವಯನಾಡಿನಲ್ಲಿ ಸ್ಪರ್ಧೆಗಿಳಿದಿರುವ ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ ಭವಿಷ್ಯವನ್ನು ದೇವರ ನಾಡಿನ ಜನತೆ ಇಂದು ನಿರ್ಧರಿಸಲಿದ್ದಾರೆ.