ಶ್ರೀನಗರ(ಜಮ್ಮು ಕಾಶ್ಮೀರ): ಕಳೆದ ತಿಂಗಳು ಭಾರತೀಯ ಜನತಾ ಪಕ್ಷದ ಮಾಜಿ ವಕ್ತಾರೆ ಸುದ್ದಿ ವಾಹಿನಿಯೊಂದರಲ್ಲಿ ಮುಸ್ಲಿಂರ ಧರ್ಮ ಗುರು ಪ್ರವಾದಿ ಮುಅಹ್ಮದ್ ಕುರಿತಾಗಿ ನೀಡಿದ್ದ ಆಕ್ಷೇಪಾರ್ಹ ಹೇಳಿಕೆಯಿಂದ ದೇಶಾದ್ಯಂತ ಆಕ್ರೋಶ ವ್ಯಕ್ತವಾಗಿದೆಯಲ್ಲದೆ, ಪ್ರತಿಭಟನೆಗಳು ನಡೆದು ಕೆಲವೆಡೆ ಹಿಂಸಾಚಾರ ಉಂಟಾಗಿದೆ. ಈ ಮಧ್ಯೆ ಕಾಶ್ಮೀರದಲ್ಲಿ ಯೂಟ್ಯೂಬರ್ಅನ್ನು ಪೊಲೀಸರು ಬಂಧಿಸಿದ್ದಾರೆ.
ವಿವಾದಿತ ಹೇಳಿಕೆ ನೀಡಿದ್ದ ನೂಪುರ್ ಶರ್ಮಾ ಅವರ ಶಿರಚ್ಛೇದ ಮಾಡಿದ ರೀತಿಯಲ್ಲಿರುವ ಗ್ರಾಫಿಕ್ಸ್ಅನ್ನು ತಮ್ಮ ಯೂಟ್ಯೂಬ್ ಚಾನಲ್ನಲ್ಲಿ ಪ್ರಸಾರ ಮಾಡಿದ ಫೈಸಲ್ ವಾನಿಯನ್ನು ಜಮ್ಮು ಕಾಶ್ಮೀರ ಪೊಲೀಸರು ಬಂಧಿಸಿದ್ದಾರೆ.
ಈ ಕುರಿತು 'ಈಟಿವಿ ಭಾರತ'ಕ್ಕೆ ಮಾಹಿತಿ ನೀಡಿರುವ ಶ್ರೀನಗರ ಪೊಲೀಸ್ ವರಿಷ್ಠಾಧಿಕಾರಿ ರಾಕೇಶ್ ಬಾಲ್ವಾಲ್, ವಾನಿ ಸಫಾ ಕಾದಲ್ ನಿವಾಸಿಯಾಗಿದ್ದು, ಆತನನ್ನು ಇಂದು ಬಂಧಿಸಲಾಗಿದೆ. ಸದ್ಯ ಆತ ಸಾಫಾ ಕಾದಲ್ ಪೊಲೀಸ್ ಠಾಣೆಯಲ್ಲಿ ಇದ್ದಾನೆ. ಕಾನೂನು ಸುವ್ಯವಸ್ಥೆಗೆ ಧಕ್ಕೆ ತಂದಿರುವ ಆರೋಪದಡಿ ವಾನಿಯನ್ನು ಬಂಧಿಸಲಾಗಿದೆ. ಯಾರೂ ಕೂಡ ಸಾಮಾಜಿಕ ಸಾಹಾರ್ದತೆಯನ್ನು ಕದಡುವಂತಹ ವಿಡಿಯೋ ಅಥವಾ ಪೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿ ಹಿಂಸೆಗೆ ಪ್ರಚೋದನೆ ನೀಡಬೇಡಿ ಎಂದು ಮನವಿ ಮಾಡಿದ್ದಾರೆ.
ಫೈಸಲ್ ವಾನಿ Deep Pain Fitness ಹೆಸರಿನ ಯೂಟ್ಯೂಬ್ ಚಾನಲ್ ನಡೆಸುತ್ತಿದ್ದು, ಈ ವಿವಾದಾತ್ಮಕ ವಿಡಿಯೋ ಹಾಕಿ ಬಳಿಕ ಅದನ್ನು ತೆಗೆದಿದ್ದಾನೆ. ಅಲ್ಲದೆ, ಇದಕ್ಕೆ ಸಂಬಂಧಿಸಿದಂತೆ ಕ್ಷಮೆ ಕೇಳಿದ್ದಾನೆ. ಈ ಮಾತನಾಡಿರುವ ವಾನಿ 'ಹೌದು ನಾನು ಆ ವಿಡಿಯೋ ಹಾಕಿದ್ದು, ನಿಜ. ಅದು ಕೆಲ ಗಂಟೆಗಳಲ್ಲಿ ವೈರಲ್ ಆಗಿತ್ತು. ಆದ್ರೆ ಅದರ ಹಿಂದೆ ನನಗೆ ಯಾವುದೇ ದುರುದ್ದೇಶ ಇರಲಿಲ್ಲ. ಮತ್ತು ತಕ್ಷಣವೇ ಅದನ್ನು ನನ್ನ ಅಕೌಂಟ್ನಿಂದ ಡಿಲಿಟ್ ಮಾಡಿರುವುದಾಗಿ ಸ್ಪಷ್ಟನೆ ನೀಡಿದ್ದಾನೆ.
ಇದನ್ನೂ ಓದಿ.. ನಡುರಸ್ತೆಯಲ್ಲೇ ನೂಪುರ್ ಶರ್ಮಾ ಅಣಕು ಪ್ರತಿಕೃತಿ ನೇಣಿಗೆ; ಸುಮೋಟೋ ಕೇಸ್ ದಾಖಲಿಸಿಕೊಂಡ ಬೆಳಗಾವಿ ಪೊಲೀಸರು
ಮೇ 28ರಂದು ನೂಪುರ್ ಶರ್ಮಾ ಪ್ರವಾದಿ ಕುರಿತು ನೀಡಿದ ಹೇಳಿಕೆಗಳು ಎಲ್ಲೆಡೆ ವೈರಲ್ ಆದ ಬಳಿಕ, ಖತಾರ್, ಅಫ್ಘಾನಿಸ್ತಾನ, ಪಾಕಿಸ್ತಾನ, ಸೌದಿ ಅರೇಬಿಯಾ ಸೇರಿದಂತೆ 14 ಮುಸ್ಲಿಂ ದೇಶಗಳಿಂದಲೂ ಸಹ ವಿರೋಧ ವ್ಯಕ್ತವಾಗಿತ್ತು. ಈ ಕುರಿತು ಅಲ್ಲಿನ ಹೈಕಮಿಷನ್ರಗಳಿಗೆ ಆ ದೇಶಗಳಲ್ಲಿ ನೋಟಿಸ್ ಜಾರಿ ಆಗಿದ್ದವು. ಈ ವಿವಾದ ಭುಗಿಲೇಳುತ್ತಿದ್ದಂತೆ ಎಚ್ಚೆತ್ತ ಬಿಜೆಪಿ ನಾಯಕರು, ವಿವಾದ ಮತ್ತು ಪ್ರತಿಭಟನೆ ತಣ್ಣಗಾಗಿಸಲು ನೂಪುರ್ ಶರ್ಮಾ ಮತ್ತು ನವೀನ್ ಜಿಂದಾಲ್ ಅವರನ್ನು ಪಕ್ಷದಿಂದ ಅಮಾನತುಗೊಳಿಸಿದ್ದರು. ಅಲ್ಲದೆ ಅವರ ಹೇಳಿಕೆಗೂ ಪಕ್ಷಕ್ಕೂ ಸಂಬಂಧವಿಲ್ಲವೆಂದು ಸ್ಪಷ್ಟನೆ ನೀಡಿದ್ದರು.
ಆದ್ರು ಸಹ ದೇಶಾದ್ಯಂತೆ ಮುಸ್ಲಿಂ ಧರ್ಮಿಯರಿಂದ ಆಕ್ರೋಶ ವ್ಯಕ್ತವಾಗುತ್ತಿದ್ದು, ಹಲವೆಡೆ ಪ್ರತಿಭಟನೆ, ಕಲ್ಲು ತೂರಾಟದಂತ ಘಟನೆಗಳು ಮುಂದುವರಿದಿವೆ. ಈ ಕುರಿತು ಪ್ರತಿಕ್ರಿಯಿಸುತ್ತಿರುವ ಬಿಜೆಪಿ ನಾಯಕರು ಶರ್ಮಾರ ಹೇಳಿಕೆಯನ್ನು ಮುಂದಿಟ್ಟುಕೊಂಡು ಕೆಲವರು ರಾಜಕೀಯ ಮಾಡಲು ಹೊರಟಿದ್ದಾರೆ ಎಂದು ಆರೋಪಿಸಿದ್ದಾರೆ.
