ಶಿವಮೊಗ್ಗ: ಬಂಧಿಸಲು ಹೋಗಿದ್ದ ಪೊಲೀಸರ ಮೇಲೆ ಹಲ್ಲೆಗೆ ಯತ್ನಿಸಿದ ರೌಡಿಶೀಟರ್ನ ಮೇಲೆ ತುಂಗಾ ನಗರ ಪೊಲೀಸರು ಫೈರಿಂಗ್ ಮಾಡಿ ಬಂಧಿಸಿದ ಘಟನೆ ನಡೆದಿದೆ.
ಬಚ್ಚಾ ಗ್ಯಾಂಗ್ನ ಸಹಚರ ದೀಪು ಅಲಿಯಾಸ್ ಡಿಂಗಾ ಪೊಲೀಸರ ಫೈರಿಂಗ್ಗೆ ಒಳಗಾದ ರೌಡಿಶೀಟರ್. ಈತ ಮಾರ್ಕೆಟ್ ಲೋಕಿ ಹಾಗೂ ಕುಖ್ಯಾತ ರೌಡಿ ಬಚ್ಚನ್ ಗ್ಯಾಂಗ್ನಲ್ಲಿ ಗುರುತಿಸಿಕೊಂಡಿದ್ದು, ಬಚ್ಚನ್ ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿದ್ದುಕೊಂಡೇ ತನ್ನ ಸಹಚರ ದೀಪು ಮೂಲಕ ಇಮ್ರಾನ್ ಎಂಬ ವ್ಯಾಪಾರಿಗೆ ಹಣಕ್ಕಾಗಿ ಬೆದರಿಕೆ ಹಾಕಿದ್ದ. ಆದರೂ ಹಣ ನೀಡದ ವ್ಯಾಪಾರಿ ಮೇಲೆ ಸಿಟ್ಟಿಗೆದ್ದ ಬಚ್ಚಾ ಗ್ಯಾಂಗ್, ಮನೆಗೆ ನುಗ್ಗಿ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿತ್ತು. ಈ ಸಂಬಂಧ ಹಲ್ಲೆಯ ಪ್ರಮುಖ ರೂವಾರಿ ದೀಪು ಅಲಿಯಾಸ್ ಡಿಂಗಾನ ಬಂಧನಕ್ಕೆ ತುಂಗಾ ನಗರ ಇನ್ಸ್ಪೆಕ್ಟರ್ ದೀಪಕ್ ಹಾಗೂ ಪಿಎಸ್ಐ ತಿರುಮಲೇಶ್ ನೇತೃತ್ವದ ತಂಡ ಮುಂದಾಗಿತ್ತು.
ಇಂದು ದೀಪು ಅನುಪಿನಕಟ್ಟೆ ಬಳಿ ಇರುವ ಖಚಿತ ಮಾಹಿತಿ ಮೇರೆಗೆ ತುಂಗಾನಗರ ಸಿಪಿಐ ದೀಪಕ್ ಬಂಧಿಸಲು ಹೋದಾಗ ಪೊಲೀಸರ ಮೇಲೆ ಚಾಕುವಿನಿಂದ ಹಲ್ಲೆ ನಡೆಸಿದ್ದಾನೆ. ಈ ವೇಳೆ ಆತ್ಮರಕ್ಷಣೆಗಾಗಿ ಇನ್ಸ್ಪೆಕ್ಟರ್ ದೀಪಕ್, ದೀಪು ಎಡಗಾಲಿಗೆ ಗುಂಡು ಹಾರಿಸಿದ್ದಾರೆ. ಸದ್ಯ ಗಾಯಾಳು ದೀಪುನನ್ನು ಪೊಲೀಸರು ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
