ಮೈಸೂರು: ಜಿ.ಟಿ.ದೇವೇಗೌಡರ ಜೊತೆ ನಾಲ್ಕೈದು ಜನ ಎಂಎಲ್ಎಗಳನ್ನು ಕೊಟ್ಟರೆ ಕೊಡಲಿ ಅಥವಾ 27 ಶಾಸಕರನ್ನೂ ಕೊಟ್ಟರೂ ಹೈಕ್ಲಾಸ್ ಆಗಿ ಸ್ವೀಕಾರ ಮಾಡುತ್ತೇನೆ ಎಂದು ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವ ವಿ.ಸೋಮಣ್ಣ ಹೇಳಿಕೆ ನೀಡಿದ್ದಾರೆ.
ಮುಡಾ ಕಚೇರಿ ದೀಪಾಲಂಕಾರ ಪೋಸ್ಟರ್ ಬಿಡುಗಡೆ ಮಾಡಿ ಮಾತನಾಡಿದ ಸೋಮಣ್ಣ, ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವರು, ವಸತಿ ಸಚಿವರು ಎಂಬುದನ್ನು ಮರೆತು ದಸರ ಸಚಿವರಾಗಿದ್ದಾರೆ ಎಂದು ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ನೀಡಿದ ಟೀಕೆಗೆ ನಾನು ಉತ್ತರಿಸುವುದಿಲ್ಲ. ಇದರಿಂದ ನಮಗೇನು ಬೇಸರವಿಲ್ಲ. ಒಂದಂತೂ ಸತ್ಯ, ಪ್ರವಾಹದಿಂದ ನೊಂದವರಿಗಾಗಿ ನಾವು ಹಿಂದಿನ ಸರ್ಕಾರಕ್ಕಿಂತ ಚುರುಕಾಗಿ ಕೆಲಸ ಮಾಡುತ್ತಿದ್ದೇವೆ. ಶೀಘ್ರದಲ್ಲೇ ಪ್ರವಾಹ ಪೀಡಿತ ಪ್ರದೇಶಗಳಿಗೆ ಹಣ ಬಿಡುಗಡೆ ಮಾಡುವಂತೆ ಕೇಂದ್ರಕ್ಕೆ ನೆರವು ಕೇಳಿದ್ದೇವೆ. ಈ ಬಾರಿ ದಸರವನ್ನು ಅದ್ದೂರಿಯಾಗಿ ಆಚರಿಸೋಣ ಎಂದರು.
ಜಿ.ಟಿ.ದೇವೇಗೌಡರ ಸಲಹೆ ಪಡೆಯುವುದರಲ್ಲಿ ತಪ್ಪೇನಿದೆ?
ಜಿ.ಟಿ.ದೇವೇಗೌಡ ನನ್ನ ಹಳೆಯ ಸ್ನೇಹಿತರು. ಅವರು ನಾವೆಲ್ಲಾ ಹಿಂದೆ ಒಂದೇ ಮನೆಯಲ್ಲಿದ್ದವರು. ಈಗ ಹೊರ ಬಂದಿದ್ದೇನೆ. ಆದರೂ ದೇವೇಗೌಡರ ಕುಟುಂಬದ ಬಗ್ಗೆ ಗೌರವವಿದೆ. ನಾನೇನು ಹೆಚ್ಚಿಗೆ ಮಾತನಾಡುವುದಿಲ್ಲ. ಅವರ ಜೊತೆ ಇನ್ನೂ ನಾಲ್ಕೈದು ಜನ ಇದ್ದರೆ ಕೊಡಲಿ ಅಥವಾ 27 ಜನರನ್ನೂ ಕೊಟ್ಟರು ನಾವು ಹೈಕ್ಲಾಸ್ ಆಗಿ ಸ್ವೀಕಾರ ಮಾಡುತ್ತೇವೆ. ಜಿ.ಟಿ.ದೇವೇಗೌಡರು ಹಿರಿಯರು. ದಸರಾ ಮಾಡಿ ಅನುಭವವಿದೆ. ಅವರ ಸಲಹೆ ಪಡೆಯುವುದರಲ್ಲಿ ತಪ್ಪೇನು ಎಂದರು.
ಇನ್ನು ತಾಯಿ ಚಾಮುಂಡೇಶ್ವರಿ ಆಶೀರ್ವಾದ ಕುಮಾರಸ್ವಾಮಿ ಅವರಿಗೆ ಮಾಡಿದ್ದು ಮುಗಿದಿದೆ. ಈಗ ಯಡಿಯೂರಪ್ಪ ಹಾಗೂ ನಮಗೆ ಆಶೀರ್ವಾದ ಮಾಡಿದ್ದಾಳೆ. ನಾವು ಕೆಲಸ ಮಾಡುತ್ತೇವೆ. ಜಿ.ಟಿ.ದೇವೇಗೌಡ ಅವರನ್ನು ಪರ್ಮನೆಂಟ್ ಆಗಿ ಕಳುಹಿಸಿದರೆ ನಮಗೇನು ಬೇಸರವಿಲ್ಲ ಎಂದು ಮಾಜಿ ಸಿಎಂ ಕುಮಾರಸ್ವಾಮಿ ಅವರಿಗೆ ಟಾಂಗ್ ನೀಡಿದರು.
