ಮೈಸೂರು: ಜುಬಿಲಂಟ್ ಕಾರ್ಖಾನೆಯ ಮೊದಲ ಸೋಂಕಿತನಿಂದ ಇಂದು 11 ಜನರಿಗೆ ಸೋಂಕು ಹರಡಿದೆ. ಈತನಿಗೆ ಸೋಂಕು ಎಲ್ಲಿಂದ ಬಂತು ಎಂಬ ಪ್ರಶ್ನೆ ಜಿಲ್ಲೆಯ ಜನರನ್ನು ಕಾಡುತ್ತಿದೆ.
ಕೊರೊನಾ ಸೋಂಕಿತರ ಹಾಟ್ ಸ್ಪಾಟ್ ಆಗಿರುವ ಜುಬಿಲಂಟ್ ಕಾರ್ಖಾನೆಯ ಮೊದಲ ಸೋಂಕಿತ ಪಿ.52 ರ ಸಂಪರ್ಕದಲ್ಲಿದ್ದ 11 ಜನರಿಗೆ ಇಂದು ಕೊರೊನಾ ಪಾಸಿಟಿವ್ ಬಂದಿದೆ. ಈತ ಜುಬಿಲಂಟ್ ಕಾರ್ಖಾನೆಯಲ್ಲಿ ನೌಕರನಾಗಿದ್ದು, ಈತನ ಟ್ರಾವೆಲ್ ಹಿಸ್ಟರಿಯನ್ನು ನೋಡಿದರೆ ಈತ ಎಲ್ಲೂ ವಿದೇಶಿ ಪ್ರವಾಸ ಮಾಡಿಲ್ಲ. ಆದರೂ ಈತನ ಸಂಪರ್ಕದಲ್ಲಿ ಇದ್ದವರಿಗೆಲ್ಲಾ ಬಹುತೇಕ ಪಾಸಿಟಿವ್ ಬಂದಿದ್ದು, ಈಗ ಜಿಲ್ಲಾಡಳಿತಕ್ಕೆ ತಲೆನೋವಾಗಿದೆ. ಈ ಮೊದಲ ಸೋಂಕಿತ ಪಿ.52 ಈಗಾಗಲೇ ಗುಣಮುಖನಾಗಿದ್ದು, ಆದರೆ ಮನೆಗೆ ಹೋಗದೆ ಜಿಲ್ಲಾಡಳಿತದ ವಿಶೇಷ ಕ್ವಾರಂಟೈನ್ ನಲ್ಲಿ ಇದ್ದಾನೆ.
ಈತನ ಬಗ್ಗೆ ಶಾಸಕರು ಹೇಳಿದ್ದೇನು.. ?
ಜುಬಿಲಂಟ್ ಜನರಿಕ್ ಫಾರ್ಮಾಸಿಟಿಕಲ್ ಕಂಪನಿಯ ಮೊದಲ ಸೋಂಕಿತ ವ್ಯಕ್ತಿ ಮೊದಲು ತನಗೆ ಹುಷಾರು ಇಲ್ಲ ಎಂದು ಖಾಸಗಿ ಆಸ್ಪತ್ರೆಗೆ ಹೋಗಿದ್ದ. ಅಲ್ಲಿಂದ ಕೆ.ಆರ್ ಆಸ್ಪತ್ರೆಗೆ ಹೋದ ಮೇಲೆ ಅಲ್ಲಿ ಕೊರೊನಾ ಇರುವುದು ದೃಢಪಟ್ಟ ನಂತರ ಚಿಕಿತ್ಸೆ ಪಡೆದು ಗುಣಮುಖನಾಗಿದ್ದಾನೆ. ಆದರೆ ಆ ಸಂದರ್ಭದಲ್ಲಿ ಕಾರ್ಖಾನೆಗೆ ವಿದೇಶದಿಂದ ಜನ ಬಂದು ಹೋಗಿದ್ದಾರೆ. ಈ ಸಂದರ್ಭದಲ್ಲಿ ಕಂಪನಿ ಯಾವುದೇ ರೀತಿಯ ಮುಂಜಾಗ್ರತಾ ಕ್ರಮವನ್ನು ಕೈಗೊಂಡಿಲ್ಲ ಎನ್ನಲಾಗ್ತಿದೆ. ಜುಬಿಲಂಟ್ ಕಂಪನಿಯ ದೆಹಲಿ ಶಾಖೆಯ ಎಕ್ಸಿಕ್ಯೂಟಿವ್ಗಳು ಮೈಸೂರಿಗೆ ಬಂದಿದ್ದರು. ಈ ಮೊದಲ ಸೋಂಕಿತ ಪಿ.52ರ ಜೊತೆಗಿನ ಸಂಪರ್ಕ ಮಾಡಿದ್ದಾರೆ.
ಎಕ್ಸಿಕ್ಯೂಟ್ ಗಳು ವಾಪಸ್ ದೆಹಲಿಗೆ ಹೋದ ಮೇಲೆ ಮೊದಲ ಸೋಂಕಿತ ಕಂಪನಿಯ ಇತರ ನೌಕರರ ಜೊತೆ ಸಂಪರ್ಕ ಮಾಡಿದ್ದಾನೆ. ಆದ್ದರಿಂದ ಈ ಕಂಪನಿಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗಿದೆ. ಈಗ ನಮಗೆ ಗೊತ್ತಾಗಬೇಕಿರುವುದು ಮೊದಲ ಸೋಂಕಿತನ ಸಂಪರ್ಕ ಯಾರ ಜೊತೆ ಇತ್ತು ಎಂಬುದು ತನಿಖೆಯಾಗಬೇಕು. ಇದು ಜುಬಿಲಂಟ್ ಕಾರ್ಖಾನೆಯವರಿಗೆ ಗೊತ್ತಿದೆ. ಅವರು ಯಾಕೆ ಮುಚ್ಚಿಹಾಕುತ್ತಿದ್ದಾರೆ ಅನ್ನೋದು ತಿಳಿಯುತ್ತಿಲ್ಲವೆಂದು ಸ್ಥಳೀಯ ಬಿಜೆಪಿ ಶಾಸಕ ಹರ್ಷವರ್ಧನ್ ಹೇಳಿದ್ದಾರೆ.
