ಮಂಗಳೂರು: ನಗರ ಖಾಸಗಿ ಆಸ್ಪತ್ರೆಯಲ್ಲಿ ಸ್ಟಾಫ್ ನರ್ಸ್ ಆಗಿ ಕೆಲಸ ಮಾಡಿಕೊಂಡಿದ್ದ ಲಿನೇಶ್ ಹಾಗೂ ಅವರ ಕುಟುಂಬದವರನ್ನ ಕುತಂತ್ರದಿಂದ ಹೋಂ ಕ್ವಾರಂಟೈನ್ನಲ್ಲಿ ಇಡಲಾಗಿದೆ ಎಂಬ ಆರೋಪ ಕೇಳಿಬಂದಿದೆ.
ಲಿನೇಶ್ ರಜೆ ಹಿನ್ನೆಲೆಯಲ್ಲಿ ಕಡಬದ ನೂಜಿಬಾಳ್ತಿಲ ಗ್ರಾಮದಲ್ಲಿರುವ ತನ್ನ ಮನೆಗೆ ಸ್ವಂತ ವಾಹನದಲ್ಲಿ ಬಂದಿದ್ರು. ಮನೆಯಲ್ಲಿದ್ದ ಇವರನ್ನ ತುರ್ತಾಗಿ ಕೆಲಸಕ್ಕೆ ಪುನಃ ಹಾಜರಾಗುವಂತೆ ಆಸ್ಪತ್ರೆಯಿಂದ ಕರೆಸಲಾಗಿತ್ತಂತೆ. ಅದರಂತೆ ಲಿನೇಶ್, ಅವರ ಗರ್ಭಿಣಿ ಪತ್ನಿ ಹಾಗೂ ನಾಲ್ಕು ವರ್ಷದ ಮಗುವಿನೊಂದಿಗೆ ಕಡಬದಿಂದ ಮಂಗಳೂರಿಗೆ ಬಂದಿದ್ದಾರೆ. ಆದರೆ, ಅವರು ಮಂಗಳೂರಿನ ರೂಂಗೆ ತಲುಪಿದ ನಂತರ ಏಕಾಏಕಿ ಇವರಿಗೆ ಕರೆ ಮಾಡಿದ ಆಸ್ಪತ್ರೆಯ ಆಡಳಿತ ಮಂಡಳಿ, ನೀವು ಕಡಬದಿಂದ ಬಂದಿರುವುದರಿಂದ ಕೂಡಲೇ ಹೋಂ ಕ್ವಾರಂಟೈನ್ನಲ್ಲಿ ಇರಬೇಕೆಂದು ಸೂಚಿಸಿದೆಯಂತೆ. ಮಾತ್ರವಲ್ಲದೆ ತಮ್ಮೊಂದಿಗೆ ಯಾರೊಬ್ಬರೂ ಬೆರೆಯಬಾರದೆಂದು ಆಸ್ಪತ್ರೆಯಲ್ಲಿನ ಉಳಿದ ಸಿಬ್ಬಂದಿಗೆ ತಿಳಿಸಲಾಗಿದೆ ಎಂದು ಲಿನೇಶ್ ಆರೋಪಿಸಿದ್ದಾರೆ.
ಪೊಲೀಸರು ಮತ್ತು ಆರೋಗ್ಯಾಧಿಕಾರಿಗಳು ಲಿನೇಶ್ ಮನೆ ಬಾಗಿಲಿಗೆ ಕ್ವಾರಂಟೈನ್ ಭಿತ್ತಿಪತ್ರ ಅಂಟಿಸಿ ಹೋಗಿದ್ದಾರೆ. ಇದರಿಂದ ತನ್ನ ಗರ್ಭಿಣಿ ಪತ್ನಿಯ ಚಿಕಿತ್ಸೆ ಸೇರಿದಂತೆ ತನ್ನ ಪುಟ್ಟ ಮಗುವಿನ ಸ್ಥಿತಿ ನೆನೆದು ಲಿನೇಶ್ ಆತಂಕಕ್ಕೀಡಾಗಿದ್ದಾರೆ. ಯಾವ ಕಾರಣದಿಂದಾಗಿ ತಮ್ಮನ್ನು ಏಕಾಏಕಿ ಹೋಂ ಕ್ವಾರಂಟೈನ್ ಮಾಡಲಾಗಿದೆ ಎಂಬುದು ಮಾತ್ರ ತಿಳಿದಿಲ್ಲ. ಕೆಲಸ ನಿಮಿತ್ತ ಬಂದಿರುವುದರಿಂದ ತಮಗೆ ಬೇಕಾದ ಆಹಾರ ವಸ್ತುಗಳನ್ನೂ ಈ ಕುಟುಂಬ ಸಂಗ್ರಹಿಸಿಲ್ಲ. ಆ ಕಡೆ ಕೆಲಸನೂ ಇಲ್ಲ. ಈ ಕಡೆ ತನ್ನ ಗರ್ಭಿಣಿ ಪತ್ನಿಯೊಂದಿಗೆ ಊರಿಗೂ ಹೋಗುವ ಹಾಗೆಯೂ ಇಲ್ಲ ಎಂಬ ಪರಿಸ್ಥಿತಿ ಎದುರಾಗಿದೆ.
