ನರೇಂದ್ರ ಮೋದಿ ಕೇವಲ ಹೆಸರಾಗಿದ್ದರು, ಈಗ ಮಂತ್ರವಾಗಿದ್ದಾರೆ: ಮಾಳವಿಕ ಅವಿನಾಶ್​​

2014 ರ ಚುನಾವಣೆ ವೇಳೆ ನರೇಂದ್ರ ಮೋದಿ ಕೇವಲ ಹೆಸರಾಗಿದ್ದರು. ಈಗ ಮಂತ್ರವಾಗಿದ್ದಾರೆ ಎಂದ ಬಿಜೆಪಿ ಸ್ಟಾರ್ ಪ್ರಚಾರಕಿ ಮಾಳವಿಕ ಅವಿನಾಶ್. ಮೋದಿ ಸರ್ಕಾರದ 146 ಯೋಜನೆಗಳನ್ನ ದೇಶದ ಜನರ ಮುಂದಿಟ್ಟು ಚುನಾವಣೆ ಎದುರಿಸಲಾಗುತ್ತಿದೆ ಎಂದ ಮಾಳವಿಕ.

ಮಂಗಳೂರು: 2014ರ ಚುನಾವಣೆ ಸಂದರ್ಭದಲ್ಲಿ ನರೇಂದ್ರ ಮೋದಿ ಕೇವಲ ಹೆಸರಾಗಿದ್ದರು. ಆದರೆ ಈ ಚುನಾವಣೆ ಸಂದರ್ಭದಲ್ಲಿ ಮೋದಿ ಮಂತ್ರವಾಗಿದ್ದಾರೆ ಎಂದು ಬಿಜೆಪಿ ಸ್ಟಾರ್ ಪ್ರಚಾರಕಿ ಮಾಳವಿಕ ಅವಿನಾಶ್ ಹೇಳಿದರು.

ನಗರದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಬಾರಿ ಮೋದಿ ಪರಿಚಯ ಅಗತ್ಯವಿಲ್ಲ. ಭ್ರಷ್ಟಾಚಾರ ನಿರ್ಮೂಲನೆಗೆ ಅವರು ತೆಗೆದುಕೊಂಡ ಕ್ರಮ, ಭ್ರಷ್ಟಾಚಾರ ರಹಿತ ಆಡಳಿತ ನೀಡಿದ್ದು, ಆಂತರಿಕ ಭದ್ರತೆ ಬಗ್ಗೆ ಮತ್ತು ಪಾಕ್ ಬಗ್ಗೆ ತೆಗೆದುಕೊಂಡ ನಿಲುವು ಜನರಿಗೆ ಮೆಚ್ಚುಗೆಯಾಗಿದೆ ಎಂದರು.

ಅಭಿವೃದ್ಧಿಗೆ, ಈ ದೇಶವನ್ನು ಮುನ್ನಡೆಸಲು ಅವರೇ ಸರಿಯಾದ ವ್ಯಕ್ತಿ ಎಂಬುದು ಜನರಿಗೆ ಅರ್ಥವಾಗಿದೆ. ಮೋದಿ ಸರ್ಕಾರದ 146 ಯೋಜನೆಗಳನ್ನ ದೇಶದ ಜನರ ಮುಂದಿಟ್ಟು ಚುನಾವಣೆ ಎದುರಿಸಲಾಗುತ್ತಿದೆ ಎಂದರು.