ಮಂಗಳೂರು: ಮಹಿಳೆಯೊಬ್ಬಳಿಗೆ ನೆರೆ ಮನೆಯ ಯುವಕನೊಬ್ಬ ಖಾಸಗಿ ವಿಡಿಯೋ ಇದೆ ಎಂದು ಬೆದರಿಸಿ ಕಿರುಕುಳ ನೀಡುತ್ತಿದ್ದ ಬಗ್ಗೆ ಕಾವೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಆರೋಪಿಯನ್ನು ರವಿರಾಜ ಎಂದು ಗುರುತಿಸಲಾಗಿದೆ. ಈತ ನೆರೆ ಮನೆಯ ಮಹಿಳೆಗೆ ಕಿರುಕುಳ ನೀಡುತ್ತಿದ್ದ. ಮಹಿಳೆಯ ಪತಿ ವಿದೇಶದಲ್ಲಿ ಉದ್ಯೋಗದಲ್ಲಿದ್ದು, ಮಹಿಳೆಯು 8 ವರ್ಷದ ಮಗಳೊಂದಿಗೆ ವಾಸ ಮಾಡುತ್ತಿದ್ದಾರೆ.
ಆರೋಪಿ ರವಿರಾಜ ಈಕೆಗೆ ಫೋನ್ ಮಾಡಿ ನೀನು ಲಾಡ್ಜ್ಗೆ ಹೋದ ವಿಡಿಯೋ ನನ್ನಲ್ಲಿದೆ. ನೀನು ನನ್ನ ಜೊತೆಯಲ್ಲಿ ಬರಬೇಕು. ಇಲ್ಲದಿದ್ದರೆ ನಿನ್ನ ವಿಡಿಯೋವನ್ನು ವೈರಲ್ ಮಾಡುತ್ತೇನೆ ಎಂದು ಬೆದರಿಸುತ್ತಿದ್ದನಂತೆ. ಕೆಲವೊಮ್ಮೆ ಕುಡಿದು ಬಂದು ವಿಡಿಯೋ ವೈರಲ್ ಮಾಡುವುದಾಗಿ ಹೆದರಿಸುತ್ತಿದ್ದನಂತೆ.
ಮಹಿಳೆಯ ಖಾಸಗಿ ವಿಡಿಯೋವನ್ನು ಆಕೆಯ ಗಂಡನಿಗೆ ಕಳುಹಿಸಿಕೊಡುವುದಾಗಿ ಬೆದರಿಸಲು ಆರಂಭಿಸಿದ ಹಿನ್ನೆಲೆ ಮಹಿಳೆ ಕಾವೂರು ಠಾಣೆಯಲ್ಲಿ ಆರೋಪಿ ರವಿರಾಜ್ ವಿರುದ್ಧ ದೂರು ದಾಖಲಿಸಿದ್ದಾರೆ.
