ಹುಬ್ಬಳ್ಳಿ: ರಾಜ್ಯದಲ್ಲಿ ಶಾಸಕರ ರಾಜೀನಾಮೆ ಡೊಂಬರಾಟ ಶುರುವಾಗಿದೆ. ಬಿಜೆಪಿ ಪಕ್ಷ ವಾಮಮಾರ್ಗದಿಂದ ಅಧಿಕಾರ ಹಿಡಿಯಲು ಪ್ರಯತ್ನಿಸುತ್ತಿದೆ ಎಂದು ಮಾಜಿ ಸಚಿವ ಬಸವರಾಜ್ ರಾಯರೆಡ್ಡಿ ಆರೋಪಿಸಿದ್ದಾರೆ.
ನಗರದಲ್ಲಿ ಸುದ್ದಿಗೋಷ್ಟಿ ಉದ್ದೇಶಿಸಿ ಮಾತನಾಡಿದ ಅವರು, ರಾಜೀನಾಮೆ ನೀಡಿರುವ ಶಾಸಕರ ರಾಜೀನಾಮೆಯನ್ನು ಸ್ಪೀಕರ್ ರಮೇಶ್ ಕುಮಾರ್ ಅವರು ಅಂಗೀಕರಿಸುವುದಿಲ್ಲ ಎಂಬ ವಿಶ್ವಾಸವಿದೆ. ಸಂವಿಧಾನ ಸ್ಪೀಕರ್ ಅವರಿಗೆ ನೀಡಿರುವ ಕಾನೂನುಗಳನ್ನು ಅವರು ಪಾಲಿಸುತ್ತಾರೆ.
ವಿಪ್ ಉಲ್ಲಂಘಿಸಿದರೆ ಶಾಸಕರ ಸದಸ್ಯತ್ವ ರದ್ದಾಗುತ್ತದೆ. ಸೋಮವಾರದೊಳಗೆ ಎಲ್ಲ ಶಾಸಕರು ವಾಪಸ್ ಬರಲೇಬೇಕು, ಇಲ್ಲದಿದ್ದರೆ ಪಕ್ಷಾಂತರ ನಿಷೇಧ ಕಾಯ್ದೆ ಅನ್ವಯ ಆಗುತ್ತದೆ ಎಂದರು.
ಇನ್ನು ವಾಮಮಾರ್ಗದಿಂದ ಬಿಜೆಪಿ ಅಧಿಕಾರ ಹಿಡಿಯಲು ಹೊರಟಿದೆ. ರಾಜಕೀಯದ ಅನೈತಿಕ ಚಟುವಟಿಕೆಗೆ ಬಿಜೆಪಿ ಹೈಕಮಾಂಡ್ ಕುಮ್ಮಕ್ಕು ನೀಡುತ್ತಿದೆ. ಶಾಸಕರು ಬರದೇ ಇದ್ದರೆ ಕಾಂಗ್ರೆಸ್ ಪಕ್ಷ ಹೇಬಿಯಸ್ ಕಾರ್ಪಸ್ ಮೊರೆ ಹೋಗಲಿದೆ ಎಂದರು.
ವಿಧಾನಸೌಧದಲ್ಲಿ ಡಾ. ಸುಧಾಕರ್ ಅವರ ಕೊರಳಪಟ್ಟಿ ಹಿಡಿದು ಎಳೆದಾಡಿದ ವಿಚಾರಕ್ಕೆ ಪ್ರತಿಕ್ರಿಯಿಸಿದ ರಾಯರೆಡ್ಡಿ ಅವರು,, ಅವರ ಕೊರಳ ಪಟ್ಟಿಯನ್ನು ಯಾರು ಹಿಡಿದಿಲ್ಲ, ಒಂದು ವೇಳೆ ಹಿಡಿದಿದರೆ ತಪ್ಪು. ಒಂದು ವೇಳೆ ಹಿಡಿದಿದ್ರೆ ಕ್ರಿಮಿನಲ್‌ ಕೇಸ್ ಹಾಕಲಿ ಎಂದರು. ಪ್ರೀತಿ ಸ್ನೇಹದ ಮೇಲೆ ಕರೆದುಕೊಂಡು ಹೋಗಿದ್ದಾರೆ ಎಂದು ಕಾಂಗ್ರೆಸ್ ನಾಯಕರನ್ನು ಸಮರ್ಥಿಸಿಕೊಂಡರು.
